1 Timote 2
2
Hat ta yam lovot ta tchendid’a
1Avok ahlena pet, an nga ni gigid’egiya, ar agi tchenegi Alona tchen nda irata ki hud’a yam suma pet. Ar agi lagi mersi mAlona yam suma pet, 2yam amuleina, yam suma te yamba pet mi, kayam ei kagei tchugot ki b’leng nga halasa á le mandar Alona, á tid’i memet á gei yei kä avorom mi. 3Wana ni vama djivina avok Alo ma sud’ina, 4ni Ma mi min ala suma pet a fe suta a we gagazid’a mi na. 5Kayam Alona ni tu, Ma aduk suma kAlonina ni tu mi, ni sana, nala, Jesus Christ. 6Ni Ma he tam vama wuraka yam suma pet á le glangâs zla ndata ata yima a ngama ala Alona min suma pet a fe suta. 7Kayam ndata, mi yan á tchi wala, mi tinin ma a sunuma á hat andjaf suma dingâ kur he gagazid’a, kur zla d’a irata mi. An nga ni de ni zla d’a gagazi d’a bei ka zlad’a ba d’a.
8Kayam ndata, an min ala andjofâ a tchen Alona ata yina pet, a yo abozi akulo á tchen Alona ki hur ma djivina, bei ayîna, bei tuguyod’a mi.
9Hina mi, an min ala aropma a tchu’î baru ma bei kidjik tad’a, a tit ni tit ta kukud’uk, a ge yazi kä, a ge yam mba aboina d’i, a tchuk lora atazi d’i, d’oze yeyêna, d’oze baru ma guzum kal teglesâ d’uo mi, 10wani kal pet a le ni sun nda djivid’a d’igi arop suma a nga le mandar Alonina na. 11Djivid’a aropma a hum hata ni ki vunazi ma d’u’â, a ge yazi kä mi. 12Wani an min ala atchad’a ti hat d’oze ti te yam mandjufâ d’i, wani ti ka’î ki vunat ma d’u’â. 13Kayam Alona mi le ni Adam adjewe, bugol mi le Ef. 14Kayam Seitan mi lop mi Adam adjeu d’i, wani mi lop mi atchad’a, ti tchila yam gata hAlonid’a, zlad’a vad’u. 15Wani le d’i nga kaka kur he gagazid’a ki od’a ki yed’eta ki ned’a ni, mba d’i fe suta yam gro suma vuta.
Currently Selected:
1 Timote 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.