1 Samuel 7
7
1Kayam ndata, suma Kiriyat-Jarim-ma a mba a hlum a i ki sed’em avo hi Abinadap akulo yam yima ndingâ. Azi tin Elazar Abinadap goroma iram vam á ngom zandu’â hi Ma didinina.
SAMUEL AZI KI SAUL
(7.2—15.35)
Samuel mi kak ma ngolâ avok Israel-lâ
2Bugol la a tin zandu’â hi Ma didinina avo Kiriyat-Jarim-mba, mi kak kua bizad’a ablaud’a, mi le bizad’a ni dok mbà. Suma pet a nga tchi kuruzi krovo á hulong gen Ma didina.
3Samuel mi de mi Israel-lâ ala: Le agi hulongôgï gen Ma didina ni ki hurugi tu ni, agi aragi bei kud’or alo d’a a yat ala Astarte-d’a kalo ma dingâ pet teyo. Agi zlabagi ki Ma didina, agi kud’uromî mam tu go. Hina wani, mam mba mi sud’ugi woi abo Filistê-na. 4Ata yi máma Israel-lâ a wal lei kalo ma a yum ala Bäl-lâ kalo d’a a yat ala Astarte-d’a, a kud’orî Ma didina tu go.
5Samuel mi he vuna ala: Agi togogi Israel-lâ pet avo Mispa. An mba ni tchen Alona kagiya. 6Azi tok avo Mispa, a gul mbina, a vom mbei avok Ma didina, a d’el tazi bei te tena. Kur bur máma a de woi ala azi le tchod’a avok Ma didina. Navo Mispa ba, Samuel mi kak ma ngolâ avok Israel-lâ.
7Kid’a Filistê-na a hum ala Israel-lâ a nga tok Mispa d’a, mazi suma nglona a min tazi á ndazi ayîna. Ata yi máma Israel-lâ a hum zla ndata, a le mandarâ abo suma Filistê-na, 8a de mi Samuel ala: Ang ar bei tchen Ma didina Alo meina kei d’i, kayam mi sud’i woi abo suma Filistê-na. 9Samuel mi ve gor timi ma tchapona, mi hum vama ngat buzu ma ngala mi Ma didina, mi ngalam mbei pepet, mi tchen Ma didina yam Israel-lâ; Ma didina mi humum mi.
10Wani ata yima Samuel nga mi he vama ngat buzu ma ngala mi Ma didina tua na, Filistê-na a mba go á ngruf Israel-lâ. Wani kur bur máma Ma didina mi breyêzi ad’enga. Azigar suma Filistê-na a nde tcha tata, a wet ringâ avok Israel-lâ.
11Azigar suma Israel-lâ a buzugï woi Mispa, a dik Filistê-na gak a mba ad’u Bet-Kar, a tchazi ngola.
12Samuel mi hle ahinad’a, mi pat aduk Mispa ki Sen, mi yat ala Ebenezer#7.12 Ebenezer: Nala, Ahina d’a Ndjunda., mi dala: Gak ini Ma didina nga mi ndjuniya.
13Ni hina ba, suma Filistê-na a hulong yazi kä, kayam me ata yima Samuel mi nga ki iram tua na, suma Filistê-na a hulong nga á hlandagad’a hi Israel-lîd’a d’uo d’a, kayam Ma didina nga mi ngobozi teteu. 14Azì ma nglo ma teteng ma suma Filistê-na a yom abo Israel-lâ adjeuna, Israel-lâ a hulong a yomu. Tinï ad’ud’a Ekron dei gak mba Gat, Israel-lâ a yo ambas sa suma Filistê-na a te kata pet. Kur atchogoi ndata, b’leng nga halasa mba aduk Israel-lâ ki suma Amor-râ mi.
15Samuel mi kak ma ngolâ yam Israel-lâ gak mat mama. 16Bizad’a ki bizad’a mam nga mi ngui tita Betel, Gilgal ki Mispa á ka sariyad’a kur azì ma nglo ma hindi máma. 17Bugol mi hulong Rama avo hatamu, nga mi ka sariyad’a yam Israel suma kur azì mamina mi. Mi min yima ngal ahle suma ngat buzuna mi Ma didina ni kua.
Currently Selected:
1 Samuel 7: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
