1 Samuel 4
4
Suma Filistê-na a hle zandu’â hAlonina
1Samuel mi de zla ndata woi mi Israel-lâ pet mi.
Israel-lâ a buzuk kei á dur ayîna ki suma Filistê-na. Azi vanguvora go kahina d’a Ebenezer-ra, wani suma Filistê-na a vanguvora Afek mi. 2Suma Filistê-na a ndjar á dur ayîna ki Israel-lâ. A dur ayîna, a kus yam Israel-lâ, a tchi suma go ki 4000 ata yima durâ.
3Suma a arâ a hulongî kur kangâ; suma nglo suma Israel-lâ a dala: Ni kayam me ba, Ma didina mi ar suma Filistê-na a kus kei ini hina ge? Ei i halei zanduk ma vun ma djinda hi Ma didinina nga kuana avo Silo. Le mi#4.3 mi ndata: Nala, Ma didina, d’oze zandu’â. mba wa adigeya ni, mi mba sud’i woi abo mei suma djangûna. 4Kayam ndata, a sun suma Silo á hleï zanduk ma vun ma djinda hi Ma didin ma ad’engêm kal pet ma nga kaka yam zlam mam mba amula aduk tcherebê ma lorina nga kuana. Hofni azi ki Fines Eli grom suma mbàna a i ki zanduk máma.
5Ata yima a mba ki zandu’â kur kangîna, Israel-lâ a tum sora gak andagad’a yira. 6Suma Filistê-na a hum siwel ndata, a dala: Ni siwel la me kur kangâ hi Hebre-nina na ge? Ata yima azi hum ala zandu’â hi Ma didina mi kalï wa kur kangâ hi Israel-lîna d’a, 7a le mandarâ, a dala: Alona mi mba wa kur kangâ hi Israel-lîna; ei bai wa woi da’! Ei wei nga vama hina yei tu d’i! 8Ei bai wa woi da’! Ni nge mba mi sud’i woi abo alo ma ad’eng mamba kal tegles ma djop vun Ezipte-na ki tugud’ei d’a tcho d’a tchi matna abagei hur fulîna ge? 9Agi Filistê-na, ei vei teya! Ei kagei andjofâ! Ar ei mbud’i magumeina hi Hebre-na d’igi azi ni magumei meina avok na d’i; ei vei teya! Ei duriziya! 10Suma Filistê-na a nde dur Israel-lâ, a kus kaziya, a tchi azigar suma mayâd’a aduk Israel-lâ 30.000. Israel-lâ a wet ringâ, a i avo hataziya. 11Filistê-na a hle zandu’â hAlonina, a tchi Hofni azi ki Fines Eli grom suma mbàna mi.
Eli mi mid’a
12Kur bur máma sama ad’u andjafâ hi Benjamin ma sud’î avun ayînina, mi ringî gak mi mba avo Silo ki barud’a haûd’a woi atamu, ki butna kam mi. 13Eli nga mi djup kaka kä avun lovota yam zlam mamba, kayam hurum nga mi hat yam zandu’â hAlonina heî. Sa máma mi kal avo hur azì ma ngolâ, mi de zlad’a yam ayî ma durâ; suma kur azina pet a wet tchina gandjau. 14Eli mi hum tchi ma gandjauna, mi djop ala: Suma a tchi nana ge? Sa máma mi mba atogo zak, mi de mi Eli zla ndata. 15(Eli bizamî dok zlengâ yam klavandi, iram nga d’i we d’i.) 16Sa máma mi dum ala: An tcholï navun ayîna, an ringî ni ini ini.
Eli mi djobom ala: Gorona, ni nana ge?
17Sa máma mi hulong dum ala: Israel-lâ a ring avok suma Filistê-na; kayam suma Filistê-na a kus kaziya; vama kalâ, grong suma mbàna Hofni azi ki Fines, a tchaziya; zandu’â hAlonina, Filistê-na a hlum mi.
18Ata yima sa máma mi yi simiyê zandu’â hAlonina, ata yi máma na wat, Eli mi nga kaka yam zlamba, mi puk kazigam kä avun gong nga kud’ora; mogunom pad’a, mi mid’a, kayam mi naneka, bizam kal ngolâ heî mi. Mi kak ma ngolâ yam Israel-lâ bizad’a dok fid’i.
Fines amamba ti mid’a
19Eli akunomba, atchad’a hi Fines-sa, ti nga ki wirâ, ti ar go á vuta. Kid’a ti hum ala Filistê-na a hle wa zandu’â hAlonina, akunotna mi mid’a, ndjuvut mi mit mi d’a, ata yi máma na wat ti grif kä, kayam vuta nga d’i lad’u, ti vud’a. 20Ata yima ti ar go á matnina, arop suma nga gevetna a dat ala: Ndak le mandar ri, ndak vut wa gor mandjufâ da’. Wani ndat dazi nga zla d’i, ti min nga zla mazid’a d’uo ko. 21Ti yum ala Ikabot, nala, Subura hAlonid’a ti wal ki Israel-lâ, kayam Filistê-na a hle wa zandu’â hAlonina, akunotna ki ndjuvut a bo mi. 22Ti dala: Subura wal ki Israel-lâ, kayam Filistê-na a hle wa zandu’â hAlonina.
Currently Selected:
1 Samuel 4: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
