1 Samuel 27
27
David mi ngei tam avo hi suma Filistê-na
1David mi de kurum ala: Bur tu Saul mba mi tchanu. Vama djivi nga kan ka hî d’i; hotei an i yam ambas sa Filistê-d’a á sut tanu. Hina wani, Saul mba mi aran bei hala yam ambas sa Israel-la. Hina wani, an mba ni sut tei abomu. 2Ata yi máma David mi tchol ki mam suma kikis karagayana á i avo hi Akis Mawok gorom ma amul ma Gat-nina. 3David ki sum mama a kak zlapa ki Akis avo Gat, nge nge pî ki sum mama; David nga kamiyôm suma mbàna, Ahinowam mba Jisreyel-la ki Abigayel atchad’a hi Nabal ma Karmel-lîd’a mi. 4A mba de mi Saul ala David mi ring wa Gat; kayam ndata, Saul mi aram bei hala.
5David mi de mi Akis ala: Le ang wala an ndak sana irang ko ni, ar ang han azì ma kelâ, an kak kua; ni kayam me ba, an azong mangâ ni kak ki sed’eng kur azì ma amula tu ge?
6Kur bur máma tamba Akis mi hum azì ma Sikla’â. Ni kayam ndata ba, azì ma Sikla’â mi arî hamulei suma Juda-na gak ini.
7David mi kak kur azì ma kelâ hi Filistê-nina bizad’a tu ki tilâ fid’i. 8David ki sum mama a nde dur suma Gesur-râ, suma Girzi-na ki suma Amale’â, azi ni kaka adjeu dei kur yima i iram abo ma Sur-râ gak yam hagad’a handaga d’a Ezipte-d’ina. 9David mi tchi suma kur azì mámina woi pepet; mi ar nga mandjuf foze atcha d’i. Mi yo d’uwar ma nglona ki ma gureina, korona, djambala ki baruna, mi hulong avo hi Akis.
10Akis mi djobom ala: Ang durï ayîna ini ni lara ge?
David mi hulong dum ala: Abo ma sutna hi Juda-na, abo ma sutna hi Jeramel-lâ kabo ma sutna hi Ken-na mi. 11David mi ar nga mandjuf foze atcha karid’a á mba avo Gat ti. Kayam mi djib’er mi dala: Ar sa mi mba ki zla meid’a ala: David mi le na d’i. Wana ni vama mam lum ata yima mam nga kaka abagei yam andaga d’a Filistê-d’ina. 12Akis mi he hurum mi David, mi dala: Mi mbut ndjendjed’a ir simiyêm Israel-lâ; mam mba mi arî azong mana ki iram fafat.
Currently Selected:
1 Samuel 27: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
