1 Samuel 21
21
David mi nga avo Nop hi ma ngat buzuna Ahimelek
1Wani David mi i Nop gen ma ngat buzuna Ahimelek. Ahimelek mi ngavam ki mandarâ, mi dum ala: Ni kayam me ba, ang mba vang hina tu bei sa ad’ung nge?
2David mi hulong de mi ma ngol ma ngat buzuna ala: Amulâ mi han vuna mi dan ala: Ar sa mi we sun nda an sunung kat wanda ki vun ma he ma an hangzina d’i. Wani sum mana a we yima ami ngavami tami kuana. 3Ki tchetchemba, ni me nga abong nge? Ang han avungôna vahl hloze vama nga abongâ.
4Ma ngat buzuna mi hulong de mi David ala: Avungô ma hawana nga abon ndi. Le sum mangâ a wal tazi woi karopma ni, avungô ma a tinim iram vam yam Alonina mi nga.
5David mi hulong de mi ma ngat buzuna ala: D’igi avok dei na, ata yima an i dur ayînina, a d’elemi á zlap karopma, ahle suma sïna hi sum manina a tinizi irazi vaziya. Le sun ndata ni sun nda tchod’a pî, mba d’i mbut yed’et yam ahle suma sïna.
6Ata yi máma ma ngat buzuna mi havungô ma a tinim iram vama mi David, kayam avungô ma ding nga d’i; ni ma a tinim iram vam mAlona ma a yomï woi avok Ma didina kur bur ma á vragam ki ma akunina.
7Kur bur máma tamba sana aduk azungeîna hi Saul-lâ mi nga tchola avok Ma didina. Ni sama Edom-ma a yum ala Dowek; ni sama ngolâ hi suma pol aho’â hi Saul-lîna.
8David mi de mi Ahimelek kua ala: Ang nga kasap poze mbigeu d’a fiyak abong nguo zu? Kayam an hle nga mbigeu man nda fiyak koze va man ma sï d’i, kayam amulâ mi sunun natogo zak.
9Ma ngat buzuna mi hulong de mi David ala: Gola! Mbigeud’a hi Goliyat ma Filistê ma ang tchum kur hor ra Ela-d’ina ti d’uta ki barud’a bugol baru d’a efod’a wana. Le ang min hlad’u ni, ang hlad’u, kayam d’a ding nga ka hî d’i.
David mi dala: D’a dinga d’igi ndat hina d’a nga d’i; ang handjiya!
David mi mbaza avo Gat
10David mi tchol kur bur máma, mi ring ngei dei avok Saul, mi mbaza avo hi Akis amul ma Gat-na. 11Azungeîna hi Akis-sâ a dum ala: Wana ni David amul ma yam andaga d’a Israel-lina d’uo zu? Ni ma a lü ndjongâ a hle sawala kam ala: Saul mi tchi suma dubu; David mi tchi dudubud’a dogo na d’uo zu?
12David mi ve zla ndata kurumu, nga mi le mandara Akis amul ma Gat-na ngola. 13David mi mbut tam lilid’a avoroziya, nga mi lahle suma ata yazi d’uo na adigaziya, nga mi b’ir ahlena akulo avun gongîyona, nga mi ar ayôna mi sor kä avunamu. 14Akis mi de mazungeî mama ala: Agi wagi tcha ala sa máma ni sama lilid’a. Ni kayam me ba, agi vandjï ge? 15Ni kayamba, an nga ki sama lili avo hatan nduo d’a ba, agi vanï sama lili ma wana á lan ahle suma lilid’a avoron ndju? Sama wana mi kal ini avo hatan ndang zu?
Currently Selected:
1 Samuel 21: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
