1 Samuel 12
12
Samuel mi de zla mam mba dabid’a mi Israel-lâ
1Samuel mi de mi Israel-lâ pet ala: An lagi wa ahlena pet suma agi dan kazina. An tinigi wa amulâ kagiya. 2Ki tchetchemba, wana namul ma mi tit avorogina: Le ni anu ni, an mbut wa mamara, abusa deî wa kan mi. Grona a mbut wa suma d’igi agi na mi. An tit avorogi kazongôn dei gak ini. 3Gola! An nga tchola avorogi avok Ma didina kamul ma mam manama wana. Agi dagi woi yam vama tcho ma an lagizina; an vamuhl hi sa d’oze koro hi sa zu? An mbut ir sa zu? An le vama tcho mi sa zu? An ve he d’a hawad’a gumun á duk iran ndei yam zla hi sa zu? Le nga ni, an hulongôgiziya.
4Israel-lâ a hulong dum ala: Ang mbut nga ir sa d’i, ang le nga vama tcho mi sa d’i, ang ve nga he d’a hawad’a abo sa gumun á mbut ir sa d’uo mi.
5Samuel mi hulong dazi ala: Ma didina kamul ma mam manama ni suma glangâsâ kagi ini ala agi fagi nga zla kan ndi.
A dala: Nata yad’u, azi ni glangâsâ. 6Samuel mi hulong dazi kua ala: Ma didin ma le ki Moise azi ki Aron a buzugï abuyogi ngolo woi Ezipte-na ni glangâs mana mi. 7Ki tchetchemba, agi tchologi hina djang avok Ma didina; an nga ni vagi ad’ud’a yam sun nda d’ingêr ra pet ta Ma didina mi lat ki agi kabuyogi ngolod’a. 8Bugol la Jakob ki sum mama a i Ezipte-d’a, abuyogi ngolo a fe djop vuna#12.8 a fe djop vuna: Nala, Mbut adjeud’a tu ti de na. Gol Bzuk 2.23., a yï Ma didina á ndjunuziya. Ma didina mi sun Moise azi ki Aron a buzuguzi woi kur Ezipte á tinizi kur ambas sa wanda. 9Wani abuyogi ngolo a mar yam Ma didina Alo mazina. Kayam ndata, mi hazi woi abo Sisera ma ngolâ hi azigar suma Hasor-râ, abo Filistê-na kabo amul ma Mowap-ma, a dur ayîna ki sed’eziya. 10Abuyogi ngolo a yi Ma didina kua á ndjunuziya, a dum ala: Ma didina, ami lami tchod’a, ami arang ngei á le sunda malo ma hawa yak ma a yum ala Bäl-lâ kalo d’a hawa yak ka a yat ala Astarte-d’a. Wani ki tchetchemba, ang sud’umi woi abo mami suma djangûna; ami mba lang sunda. 11Ata yi máma Ma didina mi sunï Zedeyon, Bedan, Jefte ki an tan Samuel á pad’agi woi abo magi suma djangû suma a nguyugina. Ni kayam ndata ba, agi kagagi ki halasa kur ambas ndata wana. 12Kid’a agi wagi Nahas amul ma Amon-na mi mba á dur ayîna ki sed’egid’a, agi dan ala: Ami minimi amulâ á te kamiya. Wani Ma didina namul magina.
13Samuel mi de kua ala: Ki tchetchemba, wana namul ma agi managizina, ni ma agi tchenen kama, Ma didina mi tinigiziya wa! 14Le agi nga gagi yagi kä avok Ma didina, agi nga lum sunda, agi nga humum vunamu, agi nga tchilagi yam vun ma he mama d’uo, agi kamul magina agi nga tid’igi bugol Alo magina mi ni, ni djiviya. 15Wani le agi nga humum vunam mbuo, agi nga tchilagi yam gat mamba mi ni, Ma didina mba mi ngobogi d’igi mi ngop abuyogi ngolo adjeu na mi. 16Ki tchetchemba, agi tchologi ka hî hina djang á we vama atchap ma ngol ma Ma didina nga mi lagizi iragi kä wana. 17Ei ni kur yima ze gemena d’uo zu? An nga ni tchen Ma didina mam mba mi sunï ini alona mba mi se mi breî mi. Hina agi mba wagi ini ala agi halagi amulâ doli agi lagi ni tcho d’a ngola avok Ma didina.
18Samuel mi tchen Ma didina ata yi máma; Ma didina mi sunï alona mi breyâ, mi se mi. Suma pet a le mandara Ma didina azi ki Samuel, 19a de mi Samuel ala: Ang tchen Ma didina Alo mangâ yam ami azungeî mangâ, kayam ami bomi woi d’i; ami lami tcho d’a ngola yam ndrata kua, kayamba ami halami amulîd’a.
20Samuel mi hulong dazi ala: Agi lagi mandar ri; agi lagi tchod’a gagazi, wani ar agi walagi woi ki Ma didina d’i, ar agi lúm sunda ki hurugi pet. 21Ar agi walagi woi ki sed’em á le sunda malo ma hawa yak ma ndak á ndjun sa d’oze ma ndak á sut sa d’uo na d’i, kayam mam mi alo ma hawa ya’â. 22Ma didina mba mi aragi woi d’i, kayam simiyêm ma nde yinina; kayam ni mam tamba ba, mi min mbud’ugi sum mama. 23Wani an nga ni ve tan ad’enga ped’et á tchen Ma didina kagiya. Le d’uo ni, an le ni tchod’a avoromu. Wani an mba ni tagagi lovot ta djivi d’a d’ingêra. 24Agi djib’eregi yam ad’enga hi Ma didinid’a, agi lum sunda ki gagazid’a ki hurugi pet, agi djib’eregi yam ahle suma nglo suma atchapma pet suma mam lazi kagina mi. 25Wani le agi nga lagi tchod’a ni, agi mba b’lagagi woi kamul magina.
Currently Selected:
1 Samuel 12: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
