1 Amuleina 17
17
(c) MA DJOK VUNA ELIE
(17—19)
Elie mi de woi yam baktara d’a nga d’i mbad’a
1 Elie ma Tisbe ma nga kaka Galät-na, mi de mamulâ Ahap ala: An nga ni dang ngei avok Ma didin ma bei matna Alona hi Israel-lâ ma an nga ni lum sundina: Gola! Biza d’a ar avok wanda wani, mbad’ï mba d’i ge d’i, alo mba mi se d’uo mi, gak bur ma an mba ni tchenema tua mbeî!
Elie mi nga avun toliyon nda Kerit-ta
2Ata yi máma Ma didina mi de mi Elie ala: 3Ang tchola, ang i irang abo ma yorogona, ang i ngei tang avun toliyon nda Kerit-ta abo ma yorogona halum ma Jurdê-nina. 4Ang mba tche mbiyo toliyonda sä hî, an he wa vuna mi gagauna mba mi ing sä tena mi. 5Elie mi le vama Ma didina mi dum kama, mi i kak sä avun toliyon nda Kerit-ta. 6Gagauna nga mi im avungôna ki hliuna yorogo ki fladege, mam mi tche ni mbiyo toliyonda mi.
Elie mi nga avo hatcha d’a modono d’a Sarepta-d’a
7Wani bur tu toliyonda ti so woyo, kayam alona nga mi se kur ambas ndata d’i. 8Ata yi máma Ma didina mi de mi Elie ala: 9Ang tchola, ang i kur azì ma Sarepta ma yam andaga d’a Sidon-ndina, ang kak sä kua. An he wa vuna matcha d’a modono d’a nga kuad’a á hang tena.
10 Elie mi tchol mi i Sarepta. Kid’a mi mbaza huyok azinid’a, mi watcha d’a modonod’a nga d’i kus aguna, mi yat mi dat ala: Atchad’a, ndak i hanï mbiyo ma tche dö. 11Ndat ti i á hal mbina, wani mi yad’u, mi dat ala: Ndak mburugunï avungôna abok nde mi.
12Ti dum ala: An gunung tan avok Ma didina Alo mang ma bei matna, avu nga d’i, afuta ar nga kur deina hina ngiyeû ki mbulâ nga kur gugura hina nde mi. An mba ni kus tchagalaka kä wani, an i ni tib’ek ahle suma ar nde ndazina mi an ki gorona. Le ami tami wa ni, ami djubumi ni mat mamina.
13Elie mi dat ala: Ndak le mandar ri! Ndak i le d’igi ndak de na. Ndak i ganï avungôna hina nde tua. Bugol tua ba, ndak i ge mi agi ki goro’â. 14Kayam Ma didina Alona hi Israel-lîna mi dala: Afuta mba d’i dap pei kur deina d’i, mbulâ mba mi dap pei kur gugura d’uo mi, gak bur Ma didina mi salona kä yam andagad’ina tua.
15Ndat ti i le d’igi Elie mi dat na mi. Azi ki gorotna ki Elie a te burâ ablaud’a. 16Afut ta kur deinid’a ti dap puo mi na, mbul ma kur gugurina mi dap puo d’igi Ma didina mi de mi Elie na.
Elie mi zlit atcha d’a modonod’a gorotna akulo
17Bugol burâ tcha, atcha ndata gorotna mi ve tugud’eid’a; tugud’ei mamba ad’enga heî gak mi mid’a. 18Asum mbi de mi Elie ala: Ang sana hAlonina, vama ndolon ki ang ni me ge? Ang mbeï avo hatan ná ge hum Alona yam tcho manda á tchan gorona woi zu?
19Mi dat ala: Ndak hanï goro’â! Mi vumï adigad’u, mi djak akulo kur gong nga yam ndrata akulod’a ata yi mam ma burâ, mi gum kä yam azang mama, 20mi grif kä, mi tchen Ma didina ala: Ma didina Alo mana, ang min tchi gor ma wana á b’lak hur atcha d’a modono d’a van avo hatata zu? 21Elie mi kulup hurum kä yam gorâ kukulup yam hindi, mi tchen Ma didina ala: Ma didina Alo mana, an nga ni tchenengû, ang zlit gor máma akulo.
22Ma didina mi hum tchenda hi Elie-d’a, mi zlit gor máma akulo, gorâ mi nde muzuka. 23Elie mi hlumu, mi tchugï asem kä ki sed’emu, mi hum masumu, mi dat ala: Ndak gol goro’â wana!
24Atcha ndata ti dum ala: Ki tchetchem wanda, an wala angî ma djok vun Alona. Ang de ni zla d’a tcholï avun Ma didinid’a gagazi.
Currently Selected:
1 Amuleina 17: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
