1 Amuleina 13
13
1Wani Ma didina mi he vuna mi sa mama. Kayam ndata, mi tchol yam ambas sa Juda-d’a, mi i avo Betel. Ata yima mi mbazina, mi fe Jerobowam nga mi ngal ahle suma ngat buzuna akulo yam yima ngal ahle suma ngat buzuna. 2Mi de zlad’a hi Ma didinid’a mi yima ngal ahle suma ngat buzuna ala: Ang yima ngal ahle suma ngat buzuna, ang yima ngal ahle suma ngat buzuna, ang hum zla d’a de d’a Ma didina mi data. Mi dala: Gor mandjufâ mba mi vut aduk suma hi David-na, a mba yum ala Josiyas. Mam mba mi ngal suma ngat buzu suma a tinizi ata yima nding mámina woyo! A mba ngal asok suma kang mi!
3Kur bur máma tamba, sana hAlona máma mi hazi vama taka, mi dala: Wana ni vama tak ma Ma didina mi de kama: Yima ngal ahle suma ngat buzu máma mba mi to kä woyo, but ma akulo kama mba mi dris kä woi mi.
4Ata yima Jerobowam mi hum zla d’a de d’a tcho d’a sana hAlonina mi dat yam yima ngal ahle suma ngat buzu ma Betel-lâ hina d’a, mi mat abom akulo yam yima ngal ahle suma ngat buzuna, mi de ki delem akulo ala: Agi vagi sa máma! Wani abom arza sod’a ata yi máma, mi tche mogod’a, nga mi hulongî kä atam mbi. 5Ata yi máma na wat yima ngal ahle suma ngat buzu máma mi nde to kä, but ma kam akulona nga mi dris kä d’igi vama tak ma sana hAlonina mi de kam ma tcholï avun Ma didinina na.
6Atogo hina zak amulâ mi de sana hAlonina ala: Ang tchen Ma didina Alo mangâ mi vat hurum mbei kanu, mi mbud’un abon blangâm ma adjeuna. Sana hAlonina mi tchen Ma didina; amulâ abom mi mbut blangâm ma adjeuna mi. 7Ata yi máma amulâ mi yi sana hAlonina, mi dum ala: Ang mbeï i avo hatanu, ei i tei tena nde tua ba, an hang he d’a hawad’a.
8Wani sana hAlonina mi dum ala: Ladjï ang wagan nabo aziyang pî, an nga ni i ki sed’eng ngi, an nga ni te bubuk avungôna d’oze tche mbina ka hî ata yi máma d’i! 9Kayam Alona mi han vuna ala: Ang tavungô d’uo mi na, ang tche mbiyo d’uo mi, ang hulong avo hatang ki lovot ta ang hlad’ï á i ki Betel-la d’uo mi.
10Wani mi hulong mi hle nga lovot ta mam hlad’ïd’a d’i.
Sana hAlonina mi so vuna
11Wani ma djok vun Alona ma mamarâ mi nga avo Betel. Groma a mba a dum ahlena pet suma sana hAlona ma tcholï Juda-na mi mba mi lazi avo Betel kur bur mámina ki vama mi dum mamulîna mi. 12Ata yi máma mi djop groma ala: Mi hle ni lovot ta lara ge? Wani groma a tagam lovot ta mam hlata. 13Bugola, abuzi mi dazi ala: Agi minin korona zlupa. Azi zlubum ahlena huyok korona, abuzi mi nga kamu. 14Mi hle lovot ta sana hAlonina mi hlata, mi fumu, kayam mi kak nga kä ad’u anguzu ma ngolâ. Mi djobom ala: Angî sana hAlona ma tcholï Juda-na ko zu?
Mi dum ala: Ni anu.
15Ma Betel-lâ mi dum ala: Ang mbeï i avo hatan á te tena.
16Mam hulong dum ala: Nga na d’i! An nga ni hulong kazigan á i ki sed’eng ngi. An nga ni te va d’oze tche mbiyo ki ang ka hî ata yi máma d’i. 17Kayam Ma didina mi dan ndei ala: Ang te va d’oze ang tche mbiyo sa hî d’uo mi, ang hulong avo hatang ki lovot ta ang hlad’ïd’a d’uo mi.
18Wani ma Betel-lâ mi dum ala: An ni ma djok vun Alona d’igi ang na. Ma didina mi dan zlad’a avun malaikana ala: Ang i vumï avo hatangû, kayam mi te va mi tche mbina do. Wani mi dumî zla d’a kad’a. 19Sana hAlona ma tcholï Juda-na, mi i ki sed’em avo, mi te, mi tche mi.
Alona ka sariyad’a yam sa mama
20Wani ata yima azi djak a nga avun tenina, Ma didina mi de zlad’a mi ma djogom vunam ma mamar ma Betel-lâ. 21Mam tamba mi de mi sana hAlona ma tcholï Juda-na ala: Ma didina mi dala: Ang tchila yam vun ma hed’a hi an Ma didinina, ang ge nga yang kä ad’u vun ma he ma an Ma didina Alo mangâ ni hangzina d’i. 22Ang hulongîya, ang te va, ang tche mbiyona ata yima an Ma didina ni dang ala: Ang te va d’oze ang tche mbiyo kua d’uo mi na. Kayam ndata, ang mba mid’a. A mba tozong hliwing gen abuyong ngolo d’uo mi!
23Kid’a azi dap ted’a ki tched’a da d’a, ma djok vun ma mamarâ mi min korona hi ma djok vun ma tcholï Juda-na zlupa. 24Bugol la mam id’a, azlona mi fum glovot mi vumu. Mad’am ar ged’a kä avun lovota, wani korona mi ar tchola kazlona avun lovota, korona abo hî, azlona abo hî mi. 25Suma a nga kal titina a wum mad’am ged’a kä glovod’o, azlona nga tchola gevem mi. Azi mba, a nga de zla ndata kur azì ma ma djok vun ma mamar máma nga kuana.
26Ata yima ma djok vun ma hulongômï glovotna mi hum zla ndatina, mi dala: Ni sana hAlona ma tcholï Juda ma tchila yam vun ma hed’a hi Ma didinina ba; Ma didina mi hum yam mazlona; mi vum d’igi Ma didina mi dum na wana. 27Ata yi máma mi de mi groma ala: Agi minin korona zlupa. Ata yima abozi dap zlupina, 28ma djok vun ma mamar máma mi tchol mi iya, mi fum mad’am ged’a kä hur lovota, korona azi kazlona a nga tchola kamu, wani azlona mi mud’um nga d’i, mi ve nga korona d’uo mi. 29Ma djok vun ma mamarâ mi djin mad’a sana hAlona máma, mi gum yam korona, mi mbam avo. A tchimu, a tozom mi. 30Mi tozomî kur zul mamba tata, a hle sawal la yor tad’a kamu, a dala: Alë! Wiyena mi mit wa!
31Bugol tos mamba, ma djok vun ma mamarâ mi de mi groma ala: Fata an mita, agi tozon ni kur zula hi sana hAlona mámid’a, agi gan hliwin gen mama. 32Kayam zla d’a ndeï avun Ma didina d’a mam dat yam yima ngal ahle suma ngat buzu ma Betel-lâ ki gongîyo suma ata yima nding suma a nga kur azì ma nglo ma Samari-nid’a, gagazi, mba d’i le hina!
33Bugol ahle ndazina hina pet pî, Jerobowam mi ar nga tcho mam mba led’a d’i, nga mi i avogovogo, mi man suma ngat buzu suma dingâ ata yima ndingâ. Le sana mi min á le sun ndata ni, mam tinim iram vamu, mi mbud’um ma ngat buzuna ata yima ndingâ. 34Ahle ndazina a i andjafâ hi Jerobowam-ma kur tcho d’a led’a pepet. Kayam ndata, Alona mi b’lak andjaf máma woi yam andagad’a ki iram fafat.
Currently Selected:
1 Amuleina 13: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
