1 Korente-na Wana ni modo zla d’a kuruta
Wana ni modo zla d’a kuruta
Kur tita hi Paul-la yam mbà d’a á tchi wala yam Christ-sa, Paul mi kak tilâ dogo yam klavandi kur azì ma Korente ma yam ambas sa Gres-sina. Ablau kretiyê suma kur Tok ka mi gat ad’utina ni suma a we nga Alona adjeu d’uo na.
Yima tchol batod’a mi nga avo Korente mbà. Kayam ndata, suma kurâ a ni suma beged’a heîna, sun nda mbut abona nga heî mi. Suma a min lovot mazi d’a tit ta aduk tazid’a heî, suma a tit ad’u lovot ta wed’a teteng, a nga hal alona teteng mi. Tcho d’a led’a ki batranga a zul heî mi. Kayam ndata, kretiyêna a nga aduk ahle ndazina. Ahle ndazina a nga tanazi á tit d’igi andjaf suma dingâ na mi. Kayam ndata, Paul mi nga ki djib’era kazi heî.
Bugol id’a hi Paul-la, suma a gum humam yam ahle suma teteng suma a nga tit ata yazi d’uo na. Kayam ndata, mi b’irizi mbaktumba teteng, kal fid’i kla. Mbaktumba mbà ti nga kur Vun ma Djin ma Awilina. 1 Kor 5.9-13 ki 2 Kor 2.3, 7.8 a nga de zlad’a yam mbaktum mba dinga mi. Paul mi b’ir mbaktum mba teteng ndata nata yima mi nga kur tit mam mba hindid’ina. Mi b’ir ra avoka kur Efes, (Gol 1 Kor 16.8), mi b’ir ra mbàd’a ni kur Efes soze ni kur Maseduwan.
Kur mbaktum mba avoka, Paul mi ge suma depa, mi lAlona mersi kazi mi (1.1-9), mi tchenezi ala ar wala ti kak adigazi d’i (1.10–4.21), mi tchenezi ala a wal tazi woi ki batranga (sapitre d’a 5), mi tchenezi ala a i sariya mazid’a avok andjaf suma dingâ d’i (6.1-11), mi tagazi ahle suma mbeî azi lazina, ahle suma mbeî azi lazi kur hliwizi d’uo na mi (6.12-20).
Bugola, mi hulong zla d’a ded’a yam djop pa azi djobom kur mbaktum mazid’id’a:
Ved’a hi mandjufâ katchad’id’a (sapitre d’a 7).
Ted’a hi hliwi ma a tinim vama a ngad’am buzuna mi fileinina ki djib’er ra a djib’eret burâ ki burâ yam fileinid’a (8.1–11.1).
Tok ka tetenga hi kretiyênid’a ki tena hi Salad’ina (11.2-34).
He d’a hawa d’a Muzu’â hAlonina mi hat mi suma hAloninid’a (sapitre d’a 12–14).
Tchol la akulod’a hi suma matnid’a (sapitre d’a 15).
Bugola, Paul mi de zlad’a yam he d’a hawad’a yam kretiyê suma sä Jerusalem-mid’a, yam nga hur mama, mi ge suma depa mi (sapitre d’a 16).
Paul mi tagei woi ala d’engzenga hi Christ-sa nga d’i ndjuni á kus yam ahle suma ane’â. O d’a aduk b’oziyoi suma kretiyênid’a ni lovot ta djivid’a kal la dinga peta (sapitre d’a 13). t Wana ni wal mata
Zla d’a avoka 1.1-9
Wal la nga aduk kretiyênid’a 1.10–4.21
Tit ta batranga, tit ta d’ingêra ki tit ta avo hur azinid’a 5.1–7.40
Kretiyêna kandjaf suma dingâ 8.1–11.1
Tita hi Tokid’a ki lovot ta kud’or Alonid’a 11.2–14.40
Christ mi tchola akulo aduk suma matna, kretiyê-na a mba tchol mi 15.1-58
He d’a hawa d’a yam kretiyê suma sä Jerusalem-mid’a 16.1-4
Nga hurâ hi Paul-lâ ki dep mam mba ged’a 16.5-24
Currently Selected:
1 Korente-na Wana ni modo zla d’a kuruta: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.