1 Korente-na 9
9
Ahle suma nda’â ki sunda hi ma a sunuma
1An ni gor vuta d’uo zu? An ni ma a sunuma d’uo zu? An we Jesus Saleina d’uo zu? Agi ni sun man nda led’a yam Salad’id’a d’uo zu? 2Le suma dingâ wan ngala an ni ma a sunuma d’uo pî, agi wagi ala gagazi, an ni ma sun magina. Agi ni vama taka yam sun manda yam Salad’id’a.
3Wana ni zla d’a an nga ni hulongôt mi suma a nga hal á van ki zlad’ina: 4An nga kad’enga ná te ná tche yam sun manda mi d’uo zu? 5An nga kad’enga á ve kretiyêd’a d’igi suma a sunuzi suma dingâ ki Salad’a b’oziyoma ki Pierre a nga le na mi d’uo zu? 6D’oze an ki Barnabas, ami tamid’a ndagami á d’elemi tami bei le sunda á fe te mamina mi d’uo zu? 7Azigar ma lara ba, mi i dur ayîna, mi wurak tam ki bege mamba ge? Sama pe guguzlu ma bei tat vud’utna nga zu? Sama pol tumiyôna ma ba bei tchazi ambirizina nga zu?
8An de ni zlad’a hi sumid’a hawa zu? Gata hi Moise-sa de na mi d’uo zu? 9D’igi a de kur gata hi Moise-sa na ala: Ar ang nik gad’id’a avun amuhlâ ata yima nga mi to awunina d’i. Alona mi de na ni yam amuzleina zu? 10Mi de na ni kayam ei d’uo zu? Gagazi, mi de zla ndata ni yam eya. Kayam sama nga mi zuma ki sama nga mi to awunina, azi nga le sun mazid’a ki hur ma tinda á ve b’rau mazid’a ata yima duta. 11Le ami zarami andjafâ ahlena hi Muzu’îna kurugiya, le ami nga dud’umi ahle suma yam andagad’a ka hina abogiya ni, ni vama ngol ma kalâ zu? 12Le suma dingâ a nga lagi na ni, ami lami na kal luo zu?
Wani ami lami nga na d’i! Ami vami tami kur ahlena pet, tala ami d’elemi lovot Zla d’a Djivid’a hi Christ-sa d’a d’i. 13Agi wagi tetet ala suma a nga le sunda kur gong nga kud’ora hAlonid’ina, a nga fe te mazina ni kua. Suma a nga ngat ahlena ata yima ngal ahle suma ngat buzunina, a fe te mazina ni kua mi. 14Kayam ndata, Salad’a mi he vuna ala: Suma a nga tchi wal Zla d’a Djivid’ina, a fe te mazina ni kua mi.
15Wani an le nga na d’i! An nga ni b’irigi ni kayambala an halî va abogiya d’a d’i. Le sana nga mi las vama an nga subur tan kama ni, an mit pî ni hotei. 16Ata yima an nga ni tchi wal Zla d’a Djivid’ina, an nga ni subur tan ndi. Ni vama a tinindji kan mbeî á led’ina. Le an nga ni lum mbuo ni, ni zla d’a hohoud’a kanu. 17Le an le ni kur min manda ni, wurak manda nga. Wani le an min le d’uo pî, ni mbeî kan á led’a, kayam me ni sun nda Alona mi handji abon á led’id’a. 18Wurak manda ni me ge? Wurak manda ni tchi d’a an nga ni tchi wal Zla d’a Djivid’a hawad’a. Ata yima an nga ni tchi wal Zla d’a Djivid’ina, an nga ni hal va abo sa d’i.
19An nga ni magom hi sa d’i, wani an mbut magoma hi sumina pet, kayam an fe suma ablaud’a ngola. 20Ata yima an nga ni le sunda aduk Juif-fîna, an mbut tan d’igi ma Juif-fâ na á fazi mi. An nga ad’u gata hi Moise-sa d’uo pî, ata yima an nga ni le sunda aduk suma a ge yazi kä ad’u gatina, an mbut d’igi ma ge yam kä ad’u gatina na á fazi mi. 21Hina mi, ata yima an nga aduk suma bei we gatina, an mbut tan d’igi azi na, wani an nga ad’u gat ndata d’i, kayam á faziya. Nala, an ge nga ni yan kä ad’u gata hAlonid’a d’uo na d’i, kayam an ge yan kä ad’u gata hi Christ-sa. 22Aduk suma amangeîd’a kur he gagazid’ina, an mbut tan d’igi azi na á faziya. An le ki suma hina pet á sut suma hiuna adigaziya. 23An le hina pet ni yam Zla d’a Djivid’a á fe wurak manda kua.
24Agi wagi tetet ala suma a nga ringâ pet ata yima a tok á ringîna a ringî á ve va, wani sana tu mi fe ni mamu. Agi ringîgi hina mi á fagi wuraka. 25Suma a nga ringâ pet a nga ve tazi ad’enga kur ahlena pet á fe avaval la mba d’i b’lak keid’a. Wani ei nga vei tei ad’enga ni yam avaval la bei b’lak kei ba d’a. 26Kayam ndata, an nga ni ring iran sod’a yam vama sä avorona. An nga ni tum va, nga ni tum mbloka hawa fufulok ki. 27Wani an nga ni d’el tanu, nga ni le tan magomba kayambala bugol an tchi wala mi suma hiunid’a, an tanda ni mbut ni vama ara woina d’i.
Azumeina Bible © Alliance Biblique du Tchad, 1999.