1 Korente-na 5
5
TIT TA BATRANGA,
TIT TA D’INGÊRA KI TIT TA AVO HUR AZINID’A
(5—7)
Mizeuna kur toka hAlonid’a
1Ami humumi ata yina pet ala mizeuna nga adigagiya. Aduk andjaf suma dingâ pî, andjaf mizeu ma hina na nga adigazi d’i. A nga dala sama dingâ adigagi mi vatchad’a habumba. 2Agi nga suburugi ni tagi zango zu? Wani agi nga had’agi hurugi á digigi sama le sunda hina d’a woi adigagi d’uo zu? 3Le an tan nga adigagi d’uo pî, an nga ni djib’er kagiya. An ka wa sariyad’a yam sa máma ki simiyê Salad’a Jesus d’igi an nga ki sed’egi na. 4Ata yima agi nga togogina, djib’er manda ti nga zlapa ki sed’egiya, ad’enga hi Saleina Jesus Christ-sa ti nga adigagi mi, 5agi hagi sama hina na abo Seitan kayam mi b’lagam hliwimu. Hina wani, muzugam mba mi fe suta kur burâ hi Salad’a Jesus-d’a.
6Subur ta magid’a nga ata yat ti. Agi wagi nga d’ala anguf fa ngiyeûd’a nga d’i subur afuta d’uo zu? 7Ar agi pad’agi anguf fa adjeud’a woyo, kayam agi mbud’ugi yed’et d’igi afut ta awili d’a bei angufid’a na. Kayam vun til mei ma Pa’â mi tin ad’ud’a nata yima a ngat Christ d’igi Gor timi mei ma Pa’â na na. 8Kayam ndata, ar ei lei vun til meina ni kavungô ma bei anguf fa adjeud’a, bei anguf fa tchod’a, bei mizeuna mi, wani ei lumî kavungô ma bei angufa kavungô ma yed’et ma gagazina.
9Kur mbaktum mba an b’irigizid’a, an dagi ala agi lagi darigïd’a ki suma mizeuna d’i. 10An dagi nga ni yam suma duniya suma a nga le mizeuna, suma a’arad’a, suma kula ki suma tuwal fileina d’i. Le ni na ni, djivid’a agi walagi woi ki duniyad’a. 11Wani an dagi ni yam sama yi tam ala mam mi kretiyêna na. Wani le ni ma mizeuna, d’oze ma a’arad’a, d’oze ma tuwal fileina, d’oze ma ngul suma, d’oze ma gurut ki süma, d’oze ma kula, ar agi lagi darigïd’a ki sed’em mbi, ar agi tagi va ki sed’em mbuo mi.
12Vama ndolon ni me á ka sariyad’a yam andjaf suma abuna ge? Alona ni ma mba ka sariyad’a kazina d’i? 13Wani ni zla magid’a á ka sariyad’a yam suma Toka d’igi mbaktumba hAlonid’a ti de na ala: Ar agi digigi sama tchona woi adigagiya.
Azumeina Bible © Alliance Biblique du Tchad, 1999.