1 Sunda Hamuleinid’a 23
23
David mi tin suma hi Levi-na ad’u adesâ teng teng
1David mi mbut mamara kikra, mi tin goroma Salomon amula yam Israel-lâ. 2Mi tok nglo suma avok Israel-lîna, suma ngat buzuna ki suma hi Levi-na.
3A ndum suma hi Levi-na, suma bizazi dok hindi dok hindi, d’oze suma bizazi kal dok hindi dok hindina. Ablawazi pet ni 38.000. 4Mi tin suma gol suna gong nga kud’ora hi Ma didinid’ina 24.000, mi tin suma avok suma a le suna gongina ki suma ka sariyad’ina 6000, mi tin suma ngom vun agre’â 4000, 5mi tin suma gile Ma didina kahle suma bud’a d’igi mam minizi á gilem hina na 4000 mi. 6David mi wal suma hi Levi-na kä ad’u adezezi teng teng, nala, suma hi Gerson-na, suma hi Kehat-na ki suma hi Merari-na mi.
7Andjafâ hi Gerson-na ba wana: Ladan azi ki Simei. 8Ladan groma ba wana: Ma ngolâ ni Jehiyel, Zetam ki Joel. Azi pet ni hindi. 9Simei groma ba wana: Selomit, Haziyel ki Haran. Azi pet ni hindi. Azi suma karagaya ndazina ni suma avok suma hi Ladan-nina. 10Simei mi vut gro suma dingâ kua fid’i, nala, Jahat, Zina, Jeus azi ki Beriya. 11Jahat ni ma ngolâ, Zina ni ma kama. Jeus azi ki Beriya a nga ki grona ablaud’a d’i. Ni kayam ndata ba, a ndumuzi d’igi andjafâ hi sama tunina ni na.
12Kehat groma ba wana: Amram, Jisar, Hebron ki Uziyel. Azi pet ni fid’i. 13Amram groma ba wana: Aron ki Moise. A tin Aron azi ki groma ki irazi fafat á kak suma a tinizi irazi vazina á ngal dubang ma his djivid’ina avok Ma didina, á le sun mamba, á b’e vuna yam suma ki simiyêm burâ ki burâ mi. 14Wani Moise sana hAlonina a ndum groma zlapa ni ki suma hi Levi-na. 15Moise groma ba wana: Gersom azi ki Eliyezer. 16Gersom gorom ma avo’â ni Sebuwel. 17Eliyezer goroma ni Rehabiya. Gorom ma ding nga d’i, wani Rehabiya mi vut grona ablaud’a. 18Jisar gorom ma avo’â ni Selomit. 19Hebron groma ba wana: Jeriya ni ma avo’â, Amariya ni ma mbàna, Jahaziyel ni ma hindina, Jekameyam ni ma fid’ina. 20Uziyel groma ba wana: Mika ni ma avo’â, Jisiya ni ma mbàna.
21Merari groma ba wana: Mali azi ki Musi. Mali groma ba wana: Elazar azi ki Kis. 22Elazar mi mit bei vut gor mandjufâ, wani mi vut ni gro aropma; wiyema Kis groma a vigiziya. 23Musi groma ba wana: Mali, Eder ki Jeremot. Azi pet ni hindi.
24Wana nandjaf suma hi Levi suma avok sum mazina ad’u andjavazina, ni suma a ndumuzi ki simiyêzi gagang suma bizazi dok mbà dok mbàna, d’oze suma bizazi kal dok mbà dok mbàna á le suna gong nga kud’ora hi Ma didinid’a. 25Kayam David mi dala: Ma didina Alona hi Israel-lîna, mi he wa tuk tad’a mi sum mama, mba mi kak Jerusalem burâ ki burâ mi. 26Suma hi Levi-na a dok yo zlub’ud’a kahle mat suma sunda burâ ki burâ d’uo d’a. 27Ni yam vun ma he ma dabid’a hi David-na ba, a b’ir simiyê suma hi Levi suma bizazi dok mbà dok mbàna, d’oze suma bizazi kal dok mbà dok mbàna kä kur mbaktumba. 28Sun mazid’a ná ndjun b’oziyozi suma hi Aron-na á le suna gong nga kud’ora hi Ma didinid’a. Azi le sunda kur gulumun ma katna krovo, a le sunda kur gongîyona, a mbus ahle suma a tinizi irazi vazi mAlonina, a le sunda ngad’a yam gonga hAlonid’a, 29a ndjar avungôna avok Alona, a min afut ta adiged’id’a á he he d’a hawad’a, nala, fangasu ma a lum bei angufina ki woî ma a reyêm kur halîna ki gato ma a yum ki mbulîna. A ngom ahle suma teteng suma a tak ngola hahlenid’a ki fiyaka hahlenid’a woina. 30A nga tchola yorogo ki fladege burâ ki burâ á subur Ma didina, á gilemu, 31á hahle suma ngat buzu suma ngala pet mi Ma didina kur bur ma sabatna, kur deîd’a hi tilîd’a, kur vun til ma lara ge ma a ngam ma azi nga ge yazi kä ad’um teteuna. 32A nga ngom zlub’u d’a ngaf tad’a ki yima a tinim iram vam mAlonina. A nga tit yam vun ma hed’a hi b’oziyozi suma andjafâ hi Aron-nina á le suna gong nga kud’ora hi Ma didinid’a mi.
Currently Selected:
1 Sunda Hamuleinid’a 23: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
