1 Sunda Hamuleinid’a 20
20
Jowap mi hle Raba
(Gol 2 Sam 11.1; 12.26-31)
1Tcha damad’a, natchogoi d’a amuleina a i durâ abageid’a, Jowap mi i ki azigarâ ablaud’a á b’lak ambasa hi suma Amon-nid’a, mba mi ngui azì ma Raba-na. Wani David mi ar kaka avo Jerusalem. Jowap mi dur azì ma Raba-na, mi b’lagam mbeyo.
2David mi hleï avaval la yam amul ma hur azì mámid’a. Aneget kal kilona dok hindi, a d’udjot ni kahina d’a guzut kal teglesa mi. A kulubut yam David. David mi hurumï ahle suma kur azinina ngola. 3David mi yo suma kur azinina, mi tinizi ata sun nda ngat aguna ki sïna, á wak ahinad’a ki djiga ma kaweina, á ka aguna kandjet ma kaweina mi. Mi le suma kur azì ma Amon-na pet ni na mi. Bugola, mi hulong Jerusalem ki azigar mama pet.
David mi dur ki Filistê-na
(Gol 2 Sam 21.18-22)
4Bugol ahle ndazina, ayîna mi tchol tchol la dinga aduk Israel-lâ ki Filistê-na avo Gezer. Ata yi máma Sibekai ma Husa-na mi tchi Sipai ma ad’u andjafâ hi Rafa-na. Suma Filistê-na a ge yazi kä. 5Ayîna mi tchol tchol la dinga ki Filistê-na. Elanan Jayir goroma mi tchi Lami ma Gat-na Goliyat wiyema. Asap mamba aguwat ni d’igi gor zuzuna na. 6Ayî ma dingâ mi tchol kua avo Gat. Sama fiya’â mi nga kua, tchitchit ta abomba ki d’a asemba ni karagaya karagaya. Tchitchid’am pet ni dok mbà yam fid’i; ni ma ad’u andjafâ hi Rafa-nina mi. 7Mi ngul Israel-lâ. Jonatan Samma ma David wiyemina goroma mi tchumu.
8Sum ndazina ni suma ad’u andjafâ hi Rafa ma Gat-nina. David azi ki azigar mama a tchaziya.
Currently Selected:
1 Sunda Hamuleinid’a 20: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
