1 Sunda Hamuleinid’a 17
17
Alona mi hle vunam yam David kandjavamu
(Gol 2 Sam 7.1-17)
1Kid’a David mi kak kur aziyam da d’a, mi de mi Natan ma djok vun Alona ala: Gola! An nga ni kaka kur azì ma a minim kagu sedrenina, wani zanduk ma vun ma djinda hi Ma didinina mi nga kuana, mi nga ni tinda kur zlub’ud’a.
2Natan mi hulong de mi David ala: Ang lahle suma ang nga hurung kazina pet, kayam Alona mi nga ki sed’engû.
3Wani kur andjege ndata, Alona mi de mi Natan ala: 4Ang i de mazong mana David ala: An Ma didina ni dala: Ni ang ba, mba minin gong nga an mba ni kak kuad’a d’i. 5Kid’a an buzugï Israel-lâ woi avo Ezipte dei gak ini d’a, an nga bei kak kur gonga. Wani an ni ka’î kur zlub’ud’a zlub’ud’a, an nga ni djok kaka kur yina teteng mi. 6Ata yima lara ma an nga ni tit ki Israel-lîna, an he vuna mi suma a kak avorozina á pol sum mana. Wani an de nga mi sa adigazi yan tu ala: Ni kayam me ba, ang minin gonga kagu sedrena d’uo ge d’i?
7Ki tchetchemba, ang i de mazong mana David ala: An Ma didin ma ad’engên kal petna, ni dala: Ni an ba ni vangî ata yima pol tumiyôna á tining amula yam man suma Israel-lâ. 8An nga ki sed’eng ata yima lara ma ang i kuana, an tchi mang suma djangûna woi avorong pet, an mbud’ung simiyêng ngola d’igi simiyê suma nglo suma a nga yam andagad’a ka hina na. 9An b’rau yina mi man suma Israel-lâ, an hazi yima kaka, kayam azi giget ti. An ar nga suma tchona a hulong a djobozi nga vunazi d’igi a djobozi vunazi adjeu deid’a na d’uo d’a. 10Kur atchogoi d’a an tin suma nglo suma avok man suma Israel-lîd’a, an hulong mang suma djangûna yazi kä ad’ungû.
Ki tchetchemba, an Ma didina nga ni dangû: An mba ni mbud’ung andjavang andjaf ma amula#17.10 mbud’ung andjavang andjaf ma amula: Nala, Ki vun Hebre-na ala: mining gonga.. 11Fata burung ndak ang mba mit i azulei ad’u abuyonga, an mba ni tchol gorong ma kurungâ blogongû, an mba ni hum ad’enga á tamula. 12Ni mam ba, mba mi minin gonga, an mba ni hum ad’enga á tamula gak didin mi. 13An tanda mba ni arî abumu, mam tamba mba mi arî gorona mi. An mba ni ar bei lum djivid’a d’igi an ar ma tamula avorongâ na d’i. 14Wani an mba ni tinim á tamula yam sum mana gak didin, leu mamba mba d’i giget ti.
15Natan mi mba mi väd’u zla d’a Alona mi ndumzi woid’a mi David pet.
Tchenda hi David-ta
(Gol 2 Sam 7.18-29)
16Ata yi máma amulâ David mi i avok Ma didina, mi dum ala: Ma didina Alo mana, an ki sum mana ni me ko ba, ang i gak dan yam ahle ndazina ge? 17Alo mana, ni zla d’a akid’eid’a irang á de zlad’a yam andjafâ hi an azong mangâ yam vama sä avo’â d’igi an ni sama kal suma dingîna na zu? Ma didina Alo mana, 18an dok ni dangî zla me d’ei ge? Ang wan an azong mangâ. 19Ma didina, ni kayamba ang hurung van an azong mangâ heîd’a ba, ang le sun nda ngol la atchapa á tagat tei mi an kur min manga wana. 20Ma didina, ma hle tam d’igi ang na na nga d’i. Alo ma ding ma d’igi ang na na nga d’uo d’igi ami humumi ini ki humami na. 21Andjaf ma ding ma yam andagad’a ma d’igi Israel-lâ na na nga d’i. Ni mam ba, ang i pad’am mbei abo Ezipte suma a nga djobom vunama, ang mbud’um andjaf mangâ á suburung simiyêngû, ang lahle suma atchapma kahle suma mandarâ kam kur ambas manga á dik andjaf suma dingâ woi avorom mi. 22Ang mbud’um andjaf mangâ, kayam mi ka’î mangâ gak didin. Ma didina, ang arî Alo mama.
23Ki tchetchemba, Ma didina Alo mana, ang ndak vun zla d’a ang dat mi an azong mangâ kandjavanda gak didin, ang le d’igi ang de na mi. 24Ar ang ndak vun zla ndata, kayam suma a suburung simiyêng teteu, a dala: Ma didin ma ad’engêm kal petna Alona hi Israel-lîna, mam mi Alona hi Israel-lîna. Ar andjavan an azong mangâ David mi ka’î sirad’a avorong hina didin. 25Ni kayam ndata ba, ni ang tang Alo mana ba, ang nde zla ndata woi mi an azong mangâ ala: An mba ni mbud’ung andjavang andjaf ma amula, ni hina ba, an azong mangâ ni fad’enga á tcheneng wana. 26Ki tchetchemba, Ma didina, angî Alona, zla manga ni zla d’a gagazid’a mi; ang tak djivi manga woi mi an azong mangâ! 27Ki tchetchemba, ar ang b’e vunang yam andjavan an azong mangâ, kayam mi kak avorong teteu, kayam sama ang Ma didina b’e vuna kama, mi arî ma b’e vuna kama hina gak didin!
Currently Selected:
1 Sunda Hamuleinid’a 17: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
