Salmos 94
94
Salmo 94
Su'si ma kuu iya ndákan kuenda nuu ñayii ñuu ñayivi a
1Su'si Iya Tátnuni, maa ni kúu iya sa'a
ja jin ndachunaa ñayii ka sa'a ja u'vi ma.
¡Kaxtnu'u ni nuu i na in kúu ni!
2Kaxtnu'u ni ja iya ndákan kuenda nuu ñayii ñuu ñayivi a kúu ni
te jín ndachunaa maa ñayii ja ka ka'an i
ja maa i ka kuu‑ka ma.
3Iya Tátnuni, ¿na saa‑ka kivi jin koo sii ini ñayii ka sa'a ja u'vi ma?
4¿Na saa‑ka kivi jin sa'a vixi ñayii yukan maa i
ja maa i ka kuu‑ka ma,
ja ndimaa ja u'vi ma ka sa'a i ma
te ka ka'an ndeva'a i ma?
5Te ka xnaa i ñayii ñuu ni ma kuan koo i,
te ka xndo'o ka xneni i ñayii ni nduu kuenda maa ni ma,
vi Iya Tátnuni.
6Te ka ja'ni i ña'a ñatuu‑ka na yii ka iyo ma,
ji'in ñayii in‑ka ñuu ma,
te suni ka ja'ni tna i suchi kuechi
ñatuu‑ka na yuva na si'i i ka iyo ma.
7Te ka ndatnu'u i:
“Másu kuni Iya Tátnuni ma,
ja kúu ya Su'si tee ni yo kuu Jacob ma,
te ni masu ndasa'a ya kuenda ja ka sa'a o a”,
ka kuu i ka ka'an i.
8Ndijin ja ka kuu ni ñayii inundee xeen ini a
te ka kuneé ka ku‑uun ni a,
jin jaku'ni ini ni te jin ndasa'a ni kuenda.
¿Te onde na saa‑ka kivi, sana jin jaku'ni ini ni?
9¿Xi ka jani ini ni ja iya ni sa'a so'o o ya,
te ñatuu nde jiniso'o ya nawa ka ka'an o a?
¿Xi ka jani ini ni ja iya ni sa'a nduchinuu o ya,
te ñatuu nde nde'ya ya nawa ka sa'a o a?
10Iya kuu xndo'o xneni ni‑ka'nu ñuu ñayivi a,
¿ka jani ini ni ja masu ka'an ni'i ya nuu ni?
¿Xi ka sa'a ni kuenda ja iya káxtnu'u tnu'u ndichi nuu ñayii a,
te ñatuu jini ya nawa ka jani ini ni?
11Vaa Iya Tátnuni ma chi jini ya nawa ka jani ini ndaka ñayii ma,
te ja ka jani ini i ma, ndimaa ja masu kuatniñu o kúu.
12¡Kovaa naka vii naka va'a kúu ñayii
ja maa ni ndáka'an‑so'o nuu i ma, vi Iya Tátnuni!
Te káxtnu'u ni tnu'u tátnuni ni a nuu i ma.
13Te kuu ndatatu i kivi kenda tnundo'o tnuneni ma,
nani ndó'o néni maa ñayii sa'a ja u'vi ma.
14Vaa Iya Tátnuni ma chi masu ndunaa ya ñayii ñuu ya ma,
te ni masu skendoo ya ñayii ni nduu kuenda maa ya ma.
15Te ñayii ka ja'nde tniñu in‑ka ñayii ma
chi ndandaa‑ni jin ka'nde i.
Vaa ñayii ni ka yo sa'a ja va'a ja ndaa ma
chi nanimaa‑nka ja va'a ja ndaa jin ko sa'a i.
16¿Na in kenda te chindee ña'a i,
sukan‑va'a ma jin sa'a ndeva'a‑ka ña'a
ñayii ka sa'a ja u'vi ma?
17Nute ñatuu ni kenda Iya Tátnuni ma ja chindee ña'a ya
chi nunuu‑ni, te kûu sa nkuu.
18Te nuu ve kendeka ja'a sa ma nkuu,
te ja kúnda'vi ini ña'a ni a,
te ni kii ni, ni ki chindee ña'a ni, vi Iya Tátnuni.
19Te nuu kua'a xeen ja yikuu sa jani ka'vi ini sa ma,
te xndo'o xneni ña'a i ma,
te maa ni ni ndaka'an mani ña'a,
sani te ni ndusii ini xeen sa.
20Vaa masu kuu ketna'a ini ni ji'in ñayii ka tatnuni ñuu ñayivi ya
ja ndimaa ja u'vi ka sa'a i ma.
Te ka sa'a i tnu'u ja ka sa'a i sukan tátnuni ni ma,
te su'va ka sa'a ndeva'a i ñayii ma.
21Te su'va ka ndututu i,
te ka ndatnu'u tna'a i ja jin ka'ni i ñayii sa'a ja va'a ja ndaa ma.
Te ñayii ñatuu na kuechi ma, ka sa'a i ja jin kûu ñayii yukan.
22Kovaa saña chi maa Su'si Iya Tátnuni ma,
kuenda tnu'u ja in toto nuu kuu chu'u sa kúu ya,
te suu ya kúkanu ini sa.
23Te sa'a ya ja jin ndani'i jin ndatna'a maa ñayii ma
ndaka ja u'vi ka sa'a i ma,
te maa ja u'vi ka sa'a ka kuu i ma, te xnaa ña'a i,
vaa Su'si o Iya Tátnuni ma chi xnaa ya ñayii ka sa'a ja u'vi ma.
Currently Selected:
Salmos 94: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
