Salmos 83
83
Salmo 83
Sukan kakan‑ta'vi o nuu Su'si ma ja ma kua'a ya tnu'u ja jin kundee ñayii ñatuu ka kunimani nuu ñayii ñuu ya ma
1Su'si maa sa, máko koo nañii kuiti ni te ko kasiyu'u ni.
2Vaa jini ni sukan kini ka kuu yu'u ñayii
ñatuu ka kunimani nuu ni ma,
ja ka jani ini i ja maa i ka kuu‑ka ma,
vaa lili lili‑ni kuan koo i, te ka saxiko ña'a i maa ni.
3Te yuyu'u‑ni ka ndatnu'u tna'a i naxe jin sa'a ndeva'a i
ñayii ka kuu ñuu maa ni a,
vaa sukan ka jani ini i ja jin sa'a i ñayii jito va'a maa ni ma
ja ka kuu i ñuu ni ma.
4Te ñayii ñatuu ka kunimani nuu ni ma chi sa'a ka ka'an i:
“Va'a‑ka jín koo o, te jín xnaa o ñayii kúu ñuu Su'si ma,
sukan‑va'a masu jin ko kuu i ñuu ka'nu,
te ñatuu na in ko ndakune'e‑ka sa'ya tata Israel ma”,
ka kuu i ka ka'an i.
5Te ndaka i in‑ni ja ka ndatnu'u tna'a i
naxe jin sa'a ndeva'a ña'a i
te jin kundee i nuu ni a, vi Su'si.
6Te ndaka ñayii ka kuu edomitas ma,
ji'in ñayii ka kuu ismaelitas ma,
ja ka kuu i sa'ya tata Agar ma,
ji'in ñayii ñuu Moab ma,
7ji'in ñayii ñuu Gebal ma, ji'in ñayii ñuu Amón ma,
ji'in ñayii ñuu Amalec ma, ji'in ñayii ñuu filisteo ma,
ji'in ñayii ka iyo ñuu Tiro ma,
te ndaka ñayii ya'a, inuu kuiti ni ka ketna'a ini i.
8Te onde ñayii ñuu Asiria ma, ni ka jan nu tna'a i ñayii ya'a,
te ka chindee i sa'ya tata Lot ma
ja jin sa'a ndeva'a i ñayii ñuu ni a.
9Su'si, sa'a ni sukan ni sa'a ni ñayii ñuu Madián ma,
ji'in sukan ni sa'a ni tee kúu Sísara ma,
ji'in sukan ni sa'a ni tee kúu Jabín ma yute nani Cisón ma,
10ja ni ka skenaa de maa de ñuu Endor ma,
te ni ka nduu yikikuñu de ma ja'an‑nka‑ni ini itu ma.
11Sa'a ni ja tee ka tatnuni‑ka ma, ji'in sa'ya de ma,
na jin ndo'o de sukan ni ka ndo'o tee kúu Oreb ma,
ji'in tee kúu Zeeb ma, ji'in tee kúu Zeba ma,
ji'in tee kúu Zalmuna ma.
12Vaa sa'a ni ka yo ka'an de ma:
“Ndaka ve'e nuu iyo Su'si ma jin nduu kuenda maa o”,
ni ka yo kuu de ni ka yo ka'an de.
13Su'si maa sa, sa'a ni ja ndaka ñayii ka ka'an sukan ma,
te jín ndechi maa i jín koo i sukan ka kuu nda'a yutnu ma
ja xndechi ña'a tikachiyaa ma,
14xi sukan sa'a ñu'u ma ja ndákonduu i yuku ma
te káyu ndaka nawa iyo ma.
15Sa'a ni ja jáki'i xen‑xeen tachi, te sondikin ni i,
te sa'a ni ja jín koyu'u xen‑xeen i
ji'in tikachiyaa tetniñu ni ma.
16Te sa'a ni ja jín ndatna'a xeen maa i ja kan‑nuu,
vaa masu ja va'a kúu ja ka sa'a i ma,
sukan‑va'a na jin ndanduku ña'a i maa ni
ja kúu ni Iya Tátnuni ma.
17Sa'a ni ja másu jin ni'i ini i naxe jin sa'a i,
te jín ndatna'a maa i ja kan‑nuu ni‑kani ni‑jika,
te ñatuu na in kó ka'an vii kó ka'an va'a‑ka ja jin kuu i,
te na jin skenaa i maa i.
18Te sukan, te jín kuni i ja maa ni kúu Iya Tátnuni
te iyo ni onde sukun ma te tátnuni ni ni‑ka'nu ñuu ñayivi a.
Currently Selected:
Salmos 83: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
