Salmos 64
64
Salmo 64
Sukan kakan‑ta'vi o nuu Su'si ma ja na kasi ndee kasi ndoso ña'a ya nuu ñayii ñatuu jini o ja ka kuni u'vi i nuu o ma
1Su'si maa sa, koniniso'o ni ja ká'an yika sa nuu ni a,
te ko koto va'a ña'a ni, te chindee ña'a ni
ja má koyu'u sa ñayii ñatuu ka kunimani nuu sa ma.
2Chu'u ña'a ni, sukan‑va'a kaku sa nuu ñayii ka sa'a ja u'vi ma,
te kaku sa nuu ndaka ja ka ndatnu'u yu'u i ja jin sa'a ña'a i ma.
3Vaa sukan kúu yuchi kúu espada ma ja xen‑xeen i ma,
sukan ka kuu yaa i ma,
te sukan ka ke koo flecha ma kuan koo i ma,
sukan ka ke koo tnu'u ndeva'a ka ka'an i ma.
4Te ñayii ya'a chi másu ka yu'u i,
vaa onde nuu ka iyo i ja ka chu'u i ma,
te sanaa sanaa‑ni, te ka kani i flecha i ma
kuan koo nuu ka iyo ñayii ñatuu na ja u'vi ka sa'a i ma.
5Su'va ka ska'an tna'a i ja jin sa'a‑ka i ja u'vi ma,
te ka ndatnu'u vava'a i naxe jin sa'a ndeva'a i
ñayii ñatuu na ja u'vi ka sa'a ma.
Te ka ka'an i:
“Másu na in kuni ndaka ja ka sa'a ka kuu o ya”,
ka ka'an i.
6Te ka ndatnu'u tna'a i:
“Visi na jin ndanduku i kuenda, kovaa masu jin kuni i,
vaa jâ ni ka ndatnu'u tna'a vava'a o sukan jin sa'a o ma”,
ka kuu i ka ka'an i.
¿Te nava'a ka jani ini maa ñayii ma sukan,
te vitna ja Su'si ma chi jini ya ndaka nawa jani ini o ma?
7Visi sukan ka jani ini maa i,
kovaa maa Su'si ma chi ni masu kaxtnu'u ya,
te satu'va ya kuji ya ma, te kani ya flecha ya ma,
te ndaka i ja ka ñu'u ini i ja jin sa'a i ja u'vi ma jin tnakue'e.
8Ndaka ja ni ka ka'an, ni ka kachi maa yaa i ma
sa'a ja jin skenaa i maa i,
te ndaka ñayii jin konde'ya ma chi jin jakundee i
ñayii ka ndani'i ka ndatna'a ja u'vi ni ka sa'a maa i ma.
9Sani te ja jin kuni ñayii ma ja sukan ni kuu ma,
sani te jin ndakaxtnu'u nuu tna'a i
sukan ndákan Su'si ma kuenda nuu ñayii ma,
te jin jaku'ni ini i ndaka sukan sa'a ya ma.
10Te ndaka ñayii ka sa'a ja va'a ja ndaa ma,
jin koo sii ini xeen i nuu Iya Tátnuni ma,
te jin kukanu ini i ya,
vaa maa ya ni sa'a ja ni ka nduvii, ni ka nduva'a ini anua i ma.
Te jin ndachiñu'u i ya.
Currently Selected:
Salmos 64: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
