Salmos 62
62
Salmo 62
Nuu maa in‑ni Su'si ma kúu nuu kuu kaku o
1Nuu Su'si ma kúu nuu kuu ndatatu ini anua sa ya,
te maa ya sa'a ja kaku sa nuu ja u'vi ma.
2Vaa maa in‑ni ya kúu toto nuu kuu kaku sa ma.
Maa ya kúu nuu kuu chu'u sa ma, te ma kotuu sa.
3Ndijin ja ka kuni u'vi ni nuu sa ma,
ja ka kuni ni ja jin xtuu ña'a ni te jin xnaa ña'a ni,
te jin sa'a ña'a ni sukan kúu in yika ve'e ja núkuiñi xiñi i
te sani te kotuu i te ndi'i i ndatnana ma.
4Vaa ûni ka jani ini ni ja jin xtuu ña'a ni,
te ka jatna ini xeen ni ja jin xnda'vi ni ñayii ma.
Ñií yu'u ni a‑ni iyo ja ka ka'an vii ka ka'an va'a ni
ja jin kuu ñayii ma,
kovaa ini anua ni a chi ka kuni u'vi ni nuu ñayii ma.
5Kovaa saña chi nuu Su'si ma‑ni kúu
nuu kuu ndatatu ini anua sa ya,
vaa nuu maa ya kúkanu ini sa.
6Vaa maa ya kúu toto nuu kuu kaku sa ma.
Te maa ya kúu nuu kuu chu'u sa ma, te ma kotuu kuiti sa.
7Vaa nuu maa Su'si ma kúu nuu kuu kaku sa
te koo jayiñu'u sa.
Vaa maa Su'si ma kúu toto nuu kuu koxtnee va'a sa te kaku sa.
8Ndaka ni ja ka kuu ni ñuu Su'si ma,
nuu maa in‑ni ya jin kukanu ini ni ni‑kani ni‑jika,
te ni‑yu'u ni‑ini ni jin kukanu ini ni ya,
vaa maa ya kúu nuu kuu jin kaku o.
9Ja ndaa kúu ja ndaka sa'ya tata ñayii ma,
ñatuu ka kandija i Su'si ma,
te masu nawa ka kuu i‑ni
chi sukan ka kuu in ja jani ini o ma te ni ya'a ma,
sukan‑ni ka kuu i, ka kuu i ñayii xiku, ka kuu i ñayii nda'vi.
Nuna chikua'a ña'a Su'si ma in in i ma
chi kuenda tnu'u in mi'i‑ni ka kuu nduu jichi i ma nuu ya ma.
10Máko kukanu ini ni ja onde sa'a ndeva'a ni ñayii ma
sana ni'i ni nawa kúni ni ma,
ni a sakui'na ni sana kuxiku ni.
Te nú ve kuxiku ni ma, máko kukanu ini ni xu'un ni ma.
11Vaa in jichi ni ka'an Su'si ma,
te uu jichi ni jiniso'o sa cha'a,
ja nuu maa Su'si ma iyo ndaka tnu'u ndee tnu'u ndatnu ma.
12Saa vi, Su'si, nuu maa ni iyo tnu'u nda'vi ini ma,
te maa ni ndakan kuenda nuu ndi‑in ndi‑in ñayii ma
nawa ni ka yo sa'a, ni ka yo kuu i ma,
te ndakua'a ni i nawa iyo ja jin ndani'i ndi‑in ndi‑in i ma.
Currently Selected:
Salmos 62: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
