Salmos 59
59
Salmo 59
Sukan kakan‑tavi o nuu Su'si ma ja na chindee ña'a ya ja na kaku o nuu ñayii ñatuu kúnimani nuu o ma
1Su'si maa sa, sa'a ni ja kaku sa nuu ñayii
ñatuu ka kunimani nuu sa ma,
ja ka kúni i ja jin sa'a ña'a i ja u'vi ma.
2Sa'a ni ja na jin koo jika maa ñayii ka sa'a ja u'vi ma
nuu iyo sa ya,
sukan‑va'a na kaku sa nuu ñayii ka ja'ni tna'a ma.
3Vaa jini maa ni ja tee ka jani ini ja maa de ka kuu‑ka ma,
ka nduku xeen de ja jin ka'ni ña'a de,
te vitna ja masu na ja u'vi sa'a sa,
te ni masu na kuechi sa, vi Su'si Iya Tátnuni.
4Kovaa ka kuni de ja jin ka'ni ña'a de, visi masu na kuechi sa.
Ne'e ni, te kuni ni sukan ka sa'a ka kuu ña'a de a.
5Vaa maa ni kúu Su'si Iya Tátnuni,
te neva'a ni tnu'u ndee tnu'u ndatnu,
ja kanaa ni ji'in ndaka ñuu ma.
Te sa'a ni ja jin ndo'o jin neni ndaka ñayii ndaka ñuu ma
ja ñatuu ka kandija i ja ká'an ni ma,
vaa ndimaa ja u'vi ka sa'a i.
Te máko kunda'vi ini ni i,
vaa maa ni kúu Su'si ñuu Israel ma.
6Te ora ve ñini ma, te ka ndakokuiñi i,
te nde'e xeen ka kuu yu'u i.
Sukan ka kuu yu'u la‑ina xeen ma,
sukan ka kuu i ka ndakonduu i ñuu ma.
7Ûni ka ke koo ti‑iñu yu'u i ma.
Sukan kúu yuchi kúu espada ma,
sukan ka kuu tnu'u ndeva'a ka ka'an i ma,
te ka ka'an i:
“Másu kuniso'o Su'si ma ja ka ka'an o ya”,
ka kuu i ka ka'an i.
8Kovaa maa ni, vi Iya Tátnuni, jákundee ndee‑ni ni i,
te ká'an yichi ni ndaka ñuu ma.
9Te kuechi ja sukan ka iyo tnu'u ndee tnu'u ndatnu
ñayii ñatuu ka kunimani nuu sa ma,
te chukan kúu ja kuiti nuu maa in‑ni ni kúkanu ini sa,
ja chindee ña'a ni ja na kaku sa.
10Maa ni ja kúu ni Su'si iya nda'vi ini
koxtnuu nuu sa nde kua'an nde vee sa,
te sa'a ni ja kuni sa sukan jin ndo'o jin neni
ñayii ñatuu ka kunimani nuu sa ma.
11Máko xnaa ni i, su'va katenuu kateni'ni ni i,
te xndo'o xneni ni i,
sukan‑va'a máko jin ndunaa ña'a ñayii ñuu sa ma
ja maa ni kúu Su'si iya jasi ndee jasi ndoso ña'a,
te jin kaku sa.
12Jín kuiso kuechi maa i ndaka ja u'vi ka ka'an i ma,
vaa ka jani ini i ja maa i ka kuu‑ka.
Te jín nukun‑tuu maa i ndaka ja u'vi ka ka'an i ma,
ji'in ja ka xnda'vi i ñayii ma,
te jín ndani'i jín ndatna'a maa i.
13Te xndo'o xneni ni i, te xnaa ni i,
sukan‑va'a má jin koo‑ka i ñuu ñayivi ya,
te jín kuni ñayii kúu ñuu tee kúu Jacob ma
ji'in ni‑ka'nu ñuu ñayivi a
ja maa ni kúu Su'si.
14Te ora ve niñi ma, te ka ndakokuiñi i,
te nde'e xeen ka kuu yu'u i.
Sukan ka kuu yu'u la‑ina xeen ma,
sukan ka kuu i ka ndakonduu i ñuu ma.
15Te kuan koo ve koo i ka kuu i ka nduku i ja jin kaa i,
te nú ñatuu ka ni'i i ma,
te jakuaa ma ka tnana u'vi ka tnana u'vi‑nka i
ja ka ndo'o ka neni i ma.
16Kovaa saña chi xtnee ne'e ma kata sa te ndachiñu'u ña'a sa,
ja sukan iyo tnu'u ndee tnu'u ndatnu ni a,
te sukan nda'vi ini ni ma.
Vaa maa ni kúu nuu kuu chu'u sa
kivi iyo sa nuu tnundo'o tnuneni ma.
17Maa ni táa tnu'u ndee tnu'u ndatnu.
Te nuu maa ni kata sa,
vaa maa ni kúu Su'si iya sa'a ja kaku sa nuu ja u'vi ma.
Vaa maa ni kúu Su'si iya kúnda'vi ini ña'a.
Currently Selected:
Salmos 59: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
