Salmos 56
56
Salmo 56
Sukan jikan‑ta'vi o nuu Su'si ma ja kúkanu ini o ya ma
1Kunda'vi ini ña'a ni saña, vi Su'si,
vaa ka sondikin ña'a ñayii ñatuu ka kunimani nuu sa a,
ja jin sa'a ndeva'a ña'a i.
Te ndi‑kivi ndi‑kivi ka kuni i ja jin kanaa i ji'in sa.
2Te nii nduu ma ka sa'a ndeva'a ña'a i,
vaa kua'a xeen i ka kuni ja jin kanaa i ji'in sa,
te ka savixi i maa i ja maa i ka kuu‑ka.
3Te kivi yu'u sa ma chi nuu maa ni kúkanu ini sa.
4Saña chi kúkanu ini xeen sa Su'si Iya Tátnuni ma,
vaa ja vii ja va'a kúu tnu'u tátnuni ya a jini sa,
te ni masu koyu'u sa, vaa masu nawa kuu sa'a ña'a ñayii ma.
5Ndaka kivi ka ka'an ndeva'a i nuu sa,
te ndaka i chi ndimaa ja u'vi ka jani ini i ja jin sa'a ña'a i.
6Te ka ndututu i in nuu ka chu'u i,
te ka nde'ya vava'a ña'a i ndenu kua'an ndenu vee sa ma,
vaa ka jito yu'u ña'a i, vaa jin ka'ni ña'a i ka kuni i.
7Su'si, kivi kenda ja ndakiti ini ni
nuu ndaka ñayii ka sa'a ja u'vi ma,
te ndakan maa ni kuenda nuu ñayii ka kuni u'vi nuu sa ma,
te jín ndatna'a maa i ja kan‑nuu, ja ka iyo i ñuu yukan.
8Te maa ni chi jini ni sukan ndó'o néni sa a
te kúxii xeen ini sa a
te nda'yu nda'yu sa ya,
te kuiti ndaka jâ ni sotnuni ni nuu libru neva'a ni a.
9Te nuna kakan‑ta'vi sa nuu ni a ja chindee ña'a ni a
chi ndaka ñayii ñatuu ka kunimani nuu sa ma,
jin ndakakayata i jin koo i.
Vaa jini sa ja iyo ni ji'in sa, vi Su'si.
10Saña chi kúkanu ini xeen sa Su'si Iya Tátnuni ma,
vaa jini sa ja ja vii ja va'a kúu tnu'u tátnuni ya a.
11Te nuu maa in‑ni Su'si ma kúkanu ini sa,
te ni masu koyu'u sa, vaa masu nawa kuu sa'a ña'a ñayii ma.
12Su'si maa sa, ko sa'a sa ndaka ja ni skuiso sa nuu ni a.
Kata sii ini sa nuu ni, te ndachiñu'u ña'a sa.
13Vaa ni sa'a ni ja ni kaku anua sa ya,
te ñatuu ni skenaa sa maa sa.
Te ni ndakani va'a ña'a ni nuu koo va'a sa a,
sukan‑va'a koo sa nuu iyo ni a te koteku sa
sukan ka teku ñayii ka iyo nuu xtnuu maa ni ñu'u ni ma.
Currently Selected:
Salmos 56: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
