Salmos 139
139
Salmo 139
Su'si ma chi ni‑ka'nu iyo ya, te jini ya ndaka nawa sa'a nawa kúu o ma
1Su'si maa sa, maa ni kúu iya jitotnuni ña'a, te jini ña'a ni.
2Maa ni jini ña'a nuu núkoo núkuiñi sa.
Visi onde jika ma iyo sa, kovaa jini ni nawa jani ini sa.
3Maa ni, vivii jito ña'a ni ndenu kua'an ndenu vee sa.
Nawa sa'a nawa kúu sa, ndaka tu'u jini ni.
4Vaa visi ñatuu ka'an‑ka sa,
kovaa maa ni, vi Su'si, chi jâ jini ni
nawa jani ini sa ja ka'an sa ma.
5Vaa ichi nuu sa ichi yata sa iyo ni, te nda'a ni a iyo siki sa a.
6Te ndaka sukan sa'a sukan kúu ni ma,
masu kuu ndaka'an sa ndaka,
vaa kua'a xeen ja sa'a ni ja kuu sa,
ni masu kuu jaku'ni ndi'i ini sa ja sukan va'a ini ni a.
7¿Ndenu ki'in sa ja ma kuni ña'a Xtumani maa ni a?
¿Nde ichi kunu sa, ja ki'in sa in nuu ñatuu ni iyo?
8Nuna kaa sa onde andivi ma, te yukan iyo maa ni,
te nuna kêe sa onde kunu kunu chii ñu'ú a, te koo sa yukan,
kovaa onde yukan, te nde'ya ña'a ni.
9Te nute kuu ndava sa te ki'in sa onde in‑ka yu'u mar ma
te koo sa yukan,
10te visi onde yukan chi skuili ni nda'a kua'a ni a,
te ndatnii ña'a ni, te ndaskaka ña'a ni ichi va'a ma,
te ni masu ndaxsiaa‑ka ña'a ni.
11Visi na ka'an sa ja masu kuni ña'a ni nuu nee xeen ma,
kovaa onde yukan chi xtnuu ni ñu'u maa ni ma nuu iyo sa ma,
te kuni ni nawa sa'a sa ma.
12Vaa visi nuu nee ma, masu nawa kuyu'u nuu maa ni.
Vaa jakuaa ma chi ndii sukan ndii nduu ma,
te nuu nee ma ji'in nuu ndu'va ñu'u ma
chi inuu‑ni ka kuu i nuu maa ni, vi Su'si.
13Vaa maa ni ni sa'a ni‑ka'nu yikikuñu sa a,
te maa ni ni sa'a ña'a onde chii si'i sa ma.
14Te maa sa chi ndachiñu'u ña'a sa, vaa vivii ni sa'a ña'a ni,
vaa vivii kúu ja ni sa'a ni a, jani ini sa, vi Su'si,
te kúu sii ini xeen sa,
te vitna chi jâ ni jaku'ni vava'a ini sa ja maa ni ni sa'a ña'a.
15Maa ni ni jini naxe ni kuva'a yikikuñu sa a,
nani yikuu ka jakona'a yiki sa a,
nani ve jin kua'nu yiki sa a nuu iyo yu'u ma
onde chii si'i sa ma, sukan yu'u iyo chii ñu'ú ma
nuu ñunee sa ma.
16Kovaa maa ni chi nde'ya nde'ya‑ni ña'a ni
sukan ve kuva'a yikikuñu sa ma,
te nuu libru ni ma jâ yoxtnee ndaka kivi koteku sa ma,
visi ñatuu kâku‑ka sa ma.
17¡Naka vivii kúu ja jani ini ni ja kuu sa, vi Su'si maa sa!
Kua'a xen‑xeen kúu, nuna ndasa'a sa kuenda.
18Vaa nuna ndaka'vi sa ja sa'a ni ja kuu sa ma
chi jini sa ja kua'a xeen‑ka kúu sana ñuti ma.
Te visi na kusu sa te ndoto sa, te iyo sa ji'in ni, vi Su'si.
19Su'si maa sa, ja ndaa kúu ja ndijin
chi sa'a ni ja jin kûu ñayii ka sa'a ja u'vi ma,
te xtandiyo ni ñayii ka ja'ni in‑ka ñayii ma nuu iyo sa a.
20Vaa ka ka'an u'vi i ja kuu ni.
Vaa ndaka ñayii ñatuu ka kunimani nuu ni ma
chi visi ka ndakune'e ña'a i,
kovaa masu nde jiniñu'u ja ka sa'a i ma.
21Iya Tátnuni, saña chi ndákiti xeen ini sa
nuu ñayii ka saxiko ña'a ndijin ma.
Te ûni ndákiti xeen ini sa
nuu ñayii ñatuu ka kunimani nuu ni ma, vi Su'si.
22Ûni ñatuu kúnimani kuiti sa nuu i, te ûni saxiko sa i.
23Te kototnuni ña'a ni, vi Su'si, te kuni ni ja ñu'u ini anua sa a,
te kototnuni ni janitnuni sa a, te kuni ni ja jani ini sa a.
24Te nú kua'an sa ichi u'vi ma, má kua'a ni tnu'u,
su'va ndaskaka ña'a ni ichi
nuu koteku sa ni‑kani ni‑jika ma, vi Su'si.
Currently Selected:
Salmos 139: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
