Salmos 132
132
Salmo 132
Ni kaji Su'si ma yuku Sion ma nuu koo ya
1Iya Tátnuni, ndaka'án ni sukan ni ndo'o ni neni David ma.
2Ndaka'án ni sukan ni skuiso David ma nuu maa ni ma,
vi Su'si Iya Tátnuni.
Ndaka'án ni sukan ni ka'an, ni kachi de
ja ko sa'a ko kuu de nuu maa ni ma,
ja kúu ni Su'si iya kúu sa'a ndaka,
iya ni yo kukanu ini Jacob ma,
vaa sa'a ni ka'an de ma:
3“Masu ndivi sa ini ve'e sa ma ja ndatatu sii ini sa,
te ni masu ndaa sa nuu jito sa ma ja ndatatu sa.
4Te ni masu kua'a sa tnu'u ja kusu sa ni a vala,
te ni masu kua'a sa tnu'u ja jin ndandesi nduchinuu sa ya
ja kusu sa,
5nú masu ja onde ni'i sa ndenu ko kuu ve'e
nuu koo Su'si Iya Tátnuni a, iya kúu sa'a ndaka ma,
iya ni yo kukanu ini Jacob ma”,
kúu de ká'an de nuu ni ma.
6Ñuu Efrata ma ka iyo sa, te ni ka jiniso'o sa
ja kuu arca nuu ni yo ka'an Su'si ma,
saa ni ka ndanduku sa te ni ka ndani'i sa onde yuku Yagar ma.
7Jín kivi koo o ini ve'e nuu iyo ya a,
te jín kuiñi jiti o nuu ja'a ya ma.
8Te jín kuña'a o ya:
“Ndokuiñi ni, Su'si Iya Tátnuni, te ne'e ni
te jín nu koo o ji'in arca nuu ká'an ni nuu ñayii a,
ja káxtnu'u ni tnu'u ndee tnu'u ndatnu ni ma,
sukan‑va'a koo ni nuu iyo ja koo ni ma.
9Te ndaka sutu ka jinukuechi nuu ni ma,
na jin ndasa'a de ja va'a ja ndaa,
te na jin ndusii ini ndaka ñayii ñatuu‑ka na ja u'vi ka sa'a i ma
te ka kandija i ja ká'an ni ma.
10Te ja sukan kútoo ni David tee jinukuechi nuu ni a,
te máko saxiko ni tee ni kaji maa ni ja kunukuechi de nuu ni ma,
kivi nuu ni chiso ni aceite ma xini de ma.”
11Vaa ja ndaa kúu ja Su'si Iya Tátnuni ma
chi sa'a ni skuiso ya nuu David ma:
“Sa'ya tata ni ma, sa'a sa ja jin nukoo i nuu núkoo ni a.
12Te nú sa'ya ni ma, te jin kandija i ja jin ko sa'a i
sukan tátnuni sa a,
te kaxtnu'u sa nuu i sukan sa'a sukan kúu sa a,
te suu i jin nukoo ni‑kani ni‑jika nuu núkoo ni ja tátnuni ni ma”,
kúu ya jiña'a ya David ma.
13Vaa Su'si Iya Tátnuni ma ni kaji ñuu Sion ma,
te ni kuu ini ya ja nuu yuku ma koo maa ya.
14Te yukan kúu nuu koo ya ni‑kani ni‑jika,
te sa'a ni ka'an ya:
“Ya'a koo sa, vaa sukan ni kuu ini sa.
15Te sa'a sa ja vii ja va'a ja jin kuu ñayii ñuu ya'a.
Jin ni'i jin tna'a i ndaka nawa ka jiniñu'u i ma.
Te ñayii nda'vi ma, koo ja jin kaa i.
16Te sa'a sa ja jin kaku ndaka sutu ma,
te sa'a sa ja jin koo sii ini xeen ñayii
ñatuu‑ka na ja u'vi ka sa'a i ma.
17Te ya'a sa'a sa ja ndani'i David ma
tnu'u ndee tnu'u ndatnu ma,
te jâ ni xndu'va sa ñu'u xtnuu nuu tee ni kaji maa sa
ja kunukuechi de nuu sa ma,
kivi nuu ni chiso sa aceite ma xini de ma.
18Te sa'a sa ja ñayii ñatuu ka kunimani nuu de ma,
jin ndandesi nuu i ma te masu jin ni'i ini‑ka i naxe jin sa'a i,
kovaa maa de chi ûni vii xeen koo nuu koo de ma.”
Sa'a ni ka'an ya nuu David ma.
Currently Selected:
Salmos 132: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
