Salmos 105
105
Salmo 105
Su'si ma chi ndimaa ja vii ja va'a sa'a ya ja jin kuu ñayii ñuu Israel ma
1Jin ndakune'e ni Su'si Iya Tátnuni ma, te jin ndachiñu'u ni ya,
te jin kaxtnu'u ni nuu ndaka ñayii ka iyo ndaka ñuu ma
ndaka sukan sa'a Su'si o ma.
2Jin kata ni nuu ya, te jin ndachiñu'u ni ya,
te jin ndaka'an jin ndakachi ni ndaka milagru sa'a ya ma.
3Jin koo sii ini ni ja iya ii kúu Su'si o a,
te ndaka ni ja ka ndanduku ni Su'si o Iya Tátnuni ma,
na jin koo sii ini ini anua ni a.
4Te jin ndanduku‑ka ni ya,
sukan‑va'a jin ni'i ni tnu'u ndee tnu'u ndatnu ya ma,
te ndimaa jin koo ni nuu maa ya ma.
5-6Ndaka ndijin ja ka kuu ni sa'ya tata Abraham
tee ni yo jinukuechi nuu Su'si ma,
ja ka kuu ni sa'ya tata Jacob tee ni kaji maa ya ma,
jin kona'a ni ndaka milagru ni sa'a ya ma,
ji'in sukan ni ja'nde ya tniñu ñayii ma.
7Te maa ya kúu Su'si ndaka o,
te ni‑ka'nu ñuu ñayivi a iyo tnu'u tátnuni ya ma.
8Te ni masu ndunaa ya sukan ni skuiso ya
nuu ndaka jichi ñayii kenda koo‑ka ma.
9Vaa sukan ni skuiso ya nuu Abraham ma,
te suni sukan ni skuiso ya nuu tee ni yo kuu Isaac ma.
10Te ni kundaa, ni kundija sukan ni skuiso ya ma
nuu tee ni yo kuu Jacob ma.
Te nuu ñayii ñuu Israel ma ni kendoo ni‑kani ni‑jika
ja ni skuiso ya ma.
11Vaa sa'a ni ka'an ya ma:
“Nuu ndijin ndataa sa ñuu Canaán ma, te nduta'vi maa ni,
vaa chukan iyo ja ni'i ni ma”,
ni ka'an ya.
12Vaa onde kivi nuu jaku‑ni ñayii ñuu ya ma kúu ma,
te kuan koo ve koo ka kuu i nuu masu ñuu i kúu ma.
13Te ndi‑in ndi‑in ñuu ma kuan koo ve koo i,
nuu ka iyo in‑ka ñayii ka tatnuni ma.
14Te ñatuu nde ni wa'a ya tnu'u ja ni‑in ñayii,
te ko sa'a ndeva'a i ñayii ñuu ya ma.
Te ja kuechi ja kútoo ya i ma,
te ni xndo'o ni xneni ya rey ndi‑in ndi‑in ñuu ma.
15Vaa ni jiña'a ya:
“Masu ko jin kaki'i nda'a ni ñayii ni kaji maa sa a,
te ni masu ko jin sa'a ndeva'a ni
tee jin ndaka'an sukan tátnuni sa ma”,
kúu ya jiña'a ya.
16Te ni sa'a ya ja ni iyo tnama nuu ñu'ú ya,
te ni xnaa ya ndaka nuu kée ja jin kaa ñayii ma.
17Te maa ya ni sonuu José ma kua'an de ñuu Egipto ma
kivi ni ka xiko ña'a ñani de ma nuu ismaelitas ma,
ja ko kuu de tee kunukuechi ma.
18Kovaa nuu ni ka jaan ña'a ñayii ñuu Egipto ma,
te ni ndo'o, ni neni de, vaa ni ka ju'ni i ja'a de ma,
te ni ka chinee i de vekaa ma.
19Onde ni kenda kivi ja ni kuu sukan ni ka'an de ma,
te ni ka ndakuni tnuni ñayii ma ja ja ndaa kúu ja ká'an José ma
te Su'si ma iyo ji'in de.
20Saa ni tatnuni rey tee tátnuni ñuu yukan ma
ja jín kene'e i José ma ini vekaa ma.
21Sani te ni tatnuni rey ma ja na ko koto de ve'e tee ma
te ko kuu de tee tatnuni nuu ndaka nawa iyo ñuu Egipto ma,
22te ndaka'an ndakachi de nuu ndaka tee ka netniñu ma
naxe jin ko sa'a jin ko kuu de ma,
te kaxtnu'u de tnu'u ndichi nuu tee ka kuu ja'nu ma.
23Saa ni kenda kivi ja ni ka kenda koo sa'ya tata Israel ma
ñuu Egipto ma, te ni ka iyo de ñuu sa'ya tata Cam ma.
24Te Su'si ma, ni sa'a ya ja ni kukua'a xeen‑ka ñayii ñuu ya ma,
te ni ka iyo‑ka tnu'u ndee tnu'u ndatnu i
sana ñayii ñatuu ka kunimani nuu i ma.
25Te ni ndaxsama Su'si ma ini anua ñayii ñuu Egipto ma,
te ni ka kuni u'vi i nuu ñayii ka jinukuechi nuu i ma,
te ni ka saxiko i nuu ñayii yukan ma ja ka kuu i ñuu ya ma.
26Te ni tetniñu Su'si ma Moisés ma tee jinukuechi nuu ya ma,
ji'in Aarón ma tee ni kaji maa ya ma,
kuan koo de.
27Te ni tatnuni ya naxe jin ka'an de ja jin koo de ma,
te ni wa'a ya na milagru na seña sa'a ya ñuu sa'ya tata Cam ma.
28Te ni sa'a ya ja ni kunee kuiti ñuu yukan ma,
kovaa ñatuu ni ka kandija ñayii ñuu yukan ma ja ká'an ya ma.
29Te ni sa'a ya ja ndute ma, ni nduu de niñi,
te ni ka ji'i ndaka tiaka ka ñu'u ma.
30Te ni sa'a ya ja ni kana kua'a xeen sa'va,
te onde nuu kixi tee kúu rey ma ni ka kenda koo ti.
31Te ni tatnuni ya, te ni ka kenda koo kua'a xen‑xeen tiukun
ni‑ka'nu ñuu ma.
32Te ni sa'a ya ja jándute te kána savi ma,
te nanimaa ñiñi ni kuun, te másu na savi ni kuun,
te ni tetniñu ya ñu'u te ni kayu ndi'i kuiti ja iyo ñuu Egipto ma.
33Te ni ka naa ndaka tnu uva ma ji'in tnu higo ma,
te ni ka tna'nu ndaka yutnu ka nukoo ni‑ka'nu ñuu yukan ma.
34Te ni tatnuni ya, te ni ka kenda koo kua'a xen‑xeen tika langosta.
35Te ni ka jaa ti ndaka ja kuii ni kendoo ñuu yukan ma,
te ni ka xnaa ti ndaka nde'ya kúun ñuu yukan.
36Te ni sa'a ya ja ni ka ji'i ndaka sayii xinañu'u
ñayii ñuu yukan ma,
te sukan, te ni ka skenaa i ndaka tnu'u ndee tnu'u ndatnu
ñuu i ma.
37Te ni ndene'e ya ñayii ñuu maa ya ma,
te ni ka ni'i i plata ji'in oro.
Te ndaka jichi ñayii ñuu ya ma, masu na in ni yo ku'u.
38Te ndaka ñayii ka iyo ñuu Egipto ma,
ni ka kutachi xeen i ja ni ka nde koo ñayii ñuu Israel ma,
vaa ni ka yu'u i ndaka ja kúu ja kuechi ñayii ñuu ya ma.
39Te ni sa'a ya ja in viko ni yo sa'a kati ñayii ñuu ya ma nduu ma,
te in ñu'u ndu'va ni yoxtnuu nuu ñayii ñuu ya ma jakuaa ma.
40Te ni ka jikan ñayii ma kuñu ja jin kaa i,
te ni tetniñu ya kiti ka kuu kañu'u ma ni ka jaa i,
te ni wa'a ya xtatila vee onde andivi ma ni ka jaa i.
41Te ni ndakune ya toto ma, te ni ka ni'i i ndute ni ka ji'i i ma,
ûni ka jika ka jika‑nka ndute ma nuu ñu'ú yichi ma.
42Vaa ni ndaka'án ya sukan ni skuiso ya nuu Abraham ma
tee ni yo jinukuechi nuu ya ma.
43Te ni ndene'e sii ini ya ñayii ñuu ya ma, te sii ini xeen iyo ya,
vaa ñayii ni kaji maa ya ka kuu i ma.
44Te ni ndaskuta'vi ya i ñu'ú
nuu jâ ka iyo ñayii in‑ka ñuu ma nkuu,
te ni ka ndunda'a maa i ja jâ ni ka satniñu siin‑ka ñayii ma,
45sukan‑va'a jín ndasa'a i kuenda na in kúu ya ma,
te jín ko sa'a ndi'i jín ko sa'a tu'u i ja tátnuni ya ma.
¡Aleluya! ¡Jayiñu'u kóo nuu maa ya!
Currently Selected:
Salmos 105: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
