Idi Ufa 98
98
Anutufa maa maqa maaqakinaa fasiqa anaasee rakisirafa.
1Yaaweefa moo kamaakira amiqira ainaina auqoonara innee fuka idi rama amaqaaqa.
Mifa narí afeekannai faqa kaaqa naaquqara afeekannai faqa narí namuqaauqa naruseenoo urinnaaqarama finau.
2Miqimmaseenoo Yaaweefa rakiranaki narí uriqararana koorooinau.
Aiqama maqannaasa nifusaa Yaaweefa mandainainakinaana mara kaqinni quqeemari afeekana kooroo inau.
3Yaaweefa Isaraee maqannaasara sia taikaaninna amuqusirana faqa mapukusee marira oosanara faqa nimianauree qimasee qimaqoona sia qauninau kaqi afu mundusee fimarinau.
Aiqama maqa maaqa ati ati marusa rakiranaki maasa Anutuna afeeka doo qafaqau.
4Maa maqa maaqanaki mariasa innee aiqama Yaaweena asasira idi ramamaqaaqa.
Innee firaaqoo asasira idi faqa amooqira idi faqa ramamaqaaqa.
5Innee amooqira idi Yaaweena ramamaqaaqa.
Piripunna aridaqa mina amooqiaqa.
6Ufireena faqa sipsipa aanainnai auqira ukeenannoo faqa fuaqaidaqa,
Yaaweenara maasa karaambaiqa fee qidaqa mina oorinni mi namunannai asasamma amaqaaqa.
7Ooruku nammari faqa minakinaa aiqama ainaina faqa Yaaweenara irisee faaqaruaqa.
Maqa maaqa faqa minakina maria fasiqa aanaaseesa faqa aiqama ainainauqa faqa faaqa fuisee iqa asasiaqa.
8Nammari uqanna faqa Yaaweena oorisaa nisauku aridaqa asasiaqa.
Amuaqu namuqa faqa moodaanaki kammafi Yaaweena oorisaa susummamaqaaqa.
9Yaaweefa maa maqa maaqanaki mariasa ufa andeeqa nimaqarara quminara asasamma amaqaaqa.
Narí andeeqaranannai faqa amana amana kai andeeqaranannai faqa maqasaa qaraasa andeeqannisaannoo.
Currently Selected:
Idi Ufa 98: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
