Idi Ufa 80
80
Isaraee maqannaasa kaifaa sooqbaandumma moodaaqoo uqara innaaru.
1Oo Yaawee, anee Isaraee maqannaa sipsipasaa rakisirafara foora mariannanara maasa ufa iria.
Anee maasa sipsipara foora rakisi marianafa mariannanara maasa ufa iria.
Anee angiroouqa niqoosa faqaasa mariaqoo seerubimma mariaqoo miqoo anee Yaaweefa ooqu marifi marianafa mariannanara anee maasa ufa iria.
2Eefaraimmana akeeku akaaku faqa Beensaminnana akeeku akaaku faqa Mannaseena akeeku akaaku faqa nifusaa koorooia.
Aneenna afeekannai findi finana mai aniree maasa ummaaraki marunnana uqeeraqisaa.
3Oo Anutu, anee kafaa maasa uqeera quqaqisaa.
Anee maasara qimudaoo qinaqa maasa kaqi asumu marianaura.
4Oo Yaawee, aiqama afeeka faqaa Anutufa, anee kisaaqasaa fee aneenna faiqí anaasee innaaru qiranara aanoo qinnaree.
5Anee maasa naukunu kai naranara foora nimianaqa neeqa.
Anee naukunu qumbiqanoo mari difaanina qimianaqa nammariara maqi neeqa.
6Anee qianaqa maasa daaqa mariasa faqa maasa maqasaara tinoo taanoo ridaqa.
Maasa namuqaa maasa qiqafeeqa ataasataasa qima qimaqaidanoo.
7Oo Anutu anee kafaa maasa uqeera quqaqisaa.
Anee maasara qimudaoo qinaqa maasa kaqi asumu marianaura.
8Oo Anutu, anee maasa Isaraee maqannaasa wainna sandara foora Isipa maqa maaqakinaana maasa asumuanara mamaree anireenana maaqoo aiqama maqannaasa futeeqa aqusee misa maqasaa ummaquqoonausa maridaqa.
9Anee saikammasee miqoo ummaqusoona mariifanoo kambiqafinoo maa maqa maaqana amanaikinoo.
Mina atuka fannoo maqaki meemai uqanna keeqeenoo.
10Mi sandafa firaanaikufanoo amuaqu namuqa faqa mina auqaanai mariqau.
Firaa sidaa saqariuqa faqa mi sandana auqaanai kai mariqau.
11Mi sandana dinni asaana fannoo firaa ooruku nammari mediteereenia afainni ooqu finau.
Dinni asaana fannoo firaa nammari Eufarateesa nammari afainni amana kai finau.
12Oo Anutu, anee nanaree mina ququsa rakeemmasaanaqee aatata fiqaree aiqaree inausa mina qaqama tiqinfaree.
13Kaasau kuara fannoo nandakiqari aniree mi sandana nikunnai radamuseea.
Kaasau aandau faqa aniree mina naidaqa.
14Oo aiqama afeeka faqaa Anutufa, anee maasa iannannai quandaa.
Innaarunaindari maasa qiqafaa. Ani wainna sanda marunausa qiqafamasee dadaaqia.
15Anee qummaquqoonna afuqana qumuree qafaa.
Ani wainna sanda anooka aneennara ummaquqoonafa afeekaikinoo maridanoo, qumu qafamasee dadaaqia.
16Maasa namuqaa maasa Isaraee maqannaasa ani wainna sanda asaanara foora mariafaqa ateekasee idara saafanoo doo qamafinoo.
Anutu anee aanoo qimasee misa kuridi nimaqaa.
17Anee rusandeesamummasee maraqoonausa aneenna asaukunnai misa ititannimaqaa.
Isaraee maqannaasa anee afeeka nimisoonaqa namuqaa mandaikamma nimaqasoona anee kaifaa uqeerasee afeekaikamma nimaqaa.
18Miqimmandaina sia maasa anikiqari quandaki kaqinni sandaanauranoo.
Anee marirana qiminaqa maasa kafaa findifi ani auqu ramasee ani amooqianaura.
19Oo Yaawee aiqama afeeka faqaa Anutufa, anee kafaa maasa qifiqee aneenna iannannai ania.
Anee maasara qimudaoo qinaqa maasa sia kuqua kaqi asumu maria.
Currently Selected:
Idi Ufa 80: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
