Idi Ufa 74
74
Anutufa Isaraee maqannaasa manda ainainakinaana dadaaqiani fee innaaru.
1Oo Anutu, anee nanaree maasa maaqi uqanna masee minniqisaidanee.
Anee kisaaqasaafee aneenna faiqí aanaaseera aanooqinnaree.
2Oo Anutu, anee ooqai Isaraee maqannaasa rusandeesamummasee maroonausara, misara amiqi mandee oonumafi iria.
Anee maasa feefaurummasee aneenna maqannaasaika maqoona marianara oonumafi iria.
Sioona aaqanasaa anee marunafa mariananoo, minara faqa oonumafi iria.
3Anee mai aniree Yeerusaree maqusa rapeepaa iranauqa qafaa.
Maasa namuqaauqa ani amaana maqa faqa rapeepaammaseea.
4Namuqaauqa aniree kaasau fainiara foora faaqa ridaqa aiqama ainaina auku usidaqa.
Misa ani biraka raipaqu quqasee nariqa biraka uqeera quqasee náriara uriqararausee qirana kooroo ianifeera miqiqau.
5Namuqaa ani Anutuna amaana maqaki anireeqa nandakinaa saqari ateekeera foora ani amaana maqa ateekaateekamma quqaseea.
6Misa saasuna qamma firaana faqa mara mareeqa ani amaana maqaki keeqafifaqa aiqama amiqira akara mari saqarisa ateekaa teekamma aquseeqa.
7Misa ani naaquqara amaana maqa ida arasaafanoo aiqama qama taikeenoo.
Misa ani Anutuna innaaru qimamaqee mariana faqa, rapeemmasaafanoo mandaika mafinoo.
8Mi manda fasiqausa nariqa maaqi qimasee qimiriqa qiqau.
Doo maasa misa amiqiuqanna masee radamusaanaura.
Aiqama maqusa maqusa Anutuna amooqi maria amaana maqausa misa idarasoofanoo qama taikanau.
9Maasa Yaaweenara daaqoo auqee mari ainainausa aiqama mandaikamma aqusaqau.
Tamummaqara fasiqauqa qima qimirausa faqa sia maridaqa aiqama taikafia.
Minara maasakiqari sia moo fannoo maa manda aukuanafa taikaaninnanara iridanoo.
10Oo Anutu, kisaaqasaa fee namuqaa aniara naanaidara qifaree.
Naaru naaru namuqaa ani auquara manda ufa kai fee qimarifaree.
11Oo Anutu, nanaree anee maasa dadaaqirara akooqaidanoo fee.
Nanaree aneenna asauku raqandaammasee maridanee.
12Oo Anutu anee maasa ooqeenna karaambaiqa mariananoo.
Anee maa maqa maaqanaki maasa moomoo kari mandainainakinaana mareeqee amiqiraqoo quqaqisee marunafa mariananoo.
13Oo Anutu, anee aneenna afeekannai ooruku nammari qambaana rakeeunafa mariananoo.
Ooruku nammariki mari firaa aandauna akiiqauqa anee rukaminau.
14Anee ooruka nammarikinaa firaa aandau mina auqu Reefiatanee qimaruna mina aiqama akiiqauqa rukamuseenana aadana maqa maaqaki maru aandausa mina amaqi nimunaqa naqau.
15Anee qunanoo maqakinaa nammari faqa nammariuqa faqa quminau.
Anee aneenna afeekannai firaa nammariuqa aadanusunafa mariananoo.
16Asukuna faqa faasaana faqa auqunafa mariananoo.
Suani faqa quqoona faqa anee kai quqoonafa mariananoo.
17Oo Anutu anee maqa maaqaki aiqama oosiranauqa quqanau.
Aiqaiqa dumudumu qira aukuna faqa suara aukuana faqa anee kai auqu quqasoonafa maridanoo.
18Oo Yaawee namuqaa aniara uteeti naakada qimarianara iria.
Kisaaqasaa furufari mariasa aniara fifau ainaina fee qimasee ani auqu aquraraidaqa.
19Oo Anutu, aneenna faiqí anaasee sia minninnisainaqa fitiqnarana nimimaria namuqaasa maasa daruaqa.
Aneenna faiqí anaasee namuqaa nimimaria ummaaranaki kisaaqasaa mariasara sia misara qaunua.
20Aneenna ooqai qima afeekaikunnanara minara maqee irisee maasa dadaaqia.
Maa maqa maaqanaki narari nararirafa aiqama amannaunai faqa asukuna arirannai faqa qumbiqanoo maridanoo.
21Oo Anutu anee ummaara ameemaanai mariasa dadaaqinaqa sia nisauriqa oofikiaqa.
Kudi fasiqa anaasee faqa sarau imariasa faqa ani auqu amooqiaqa.
22Oo Anutu, findifinana aneenna auqusaa titaa.
Furufari maria fasiqausa faasaambaasaana ani oosanara uteeti naakada qidaqa.
23Sia anee aneenna namuqaa ani auquara fidiaqaammasee faaqa fuisee qimarianara irisee qaunua, amiqimmasee iria.
Ani namuqaauqa aniara tutuqirafa kaqikai fida marinara sia qaunua, amiqimmasee iriaa.
Currently Selected:
Idi Ufa 74: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
