Idi Ufa 66
66
Anutuna amooqira idi faqa dufi dufi qira idi faqa maridanoo.
1Aiqama maqa maaqaki mariasa asasidaqa firaaqoo Anutunara faaqarumasee amooqiaqa.
2Idi raidaqa mina auqu qareenaranara kooroo iaqa.
Qareenara amooqirana mina amiaqa.
3Innee Anutuna maaqi qimasee qimamiaqa.
Anee auqu quqoonna ainainafa kaaqa naaquqarafa maridanoo.
Ani namuqaauqa ani uriqarara afeeka qafamasee
aniara firaaqoo rufieeqa ani oorinni niqoori saunu araidaqa.
4Aiqama maa maqa maaqanasaa qaraasa ani amooqidaqa.
Misa ani amooqira idi raidaqa ani auqu uqeeraidaqa.
5Innee aiqamausa aniree Anutufa auqeeu ainaina qafaaqa.
Mifa naaquqara ainaina faiqí anaasee qambaanai auqanau.
6Mifa ooruku nammariara qufanoo aadanusufufaqa
maasa qikeeku qikaaku maqamau aandanasaa funara Anutunara asasiqau.
7Anutufa naaru naaru narí afeekannai aiqama maqannaasa rakisinnimaqaidanoo.
Mina afu fannoo aiqama maqannaasa auqee maria ainainna niuqidanoo.
Ufa rukiee mariasa sia Anutuna aana itita amaqaaqa.
8Innee aiqama maqannaasa maasa Anutuna amooqiaqa.
Innee mina amooqirana firaaqoo uqeeraifaqa nianaindari faiqí anaasee iriaqa.
9Mifa maasa marirana afeedammaqisaifaqa kaqi maridaqa.
Mifa maasa mandainainaki aqufuanoora itita qimaqaifaqa sia aqufidaqa.
10Oo Anutu, anee maasa qimanammasee qafaananoo.
Siruaa tasirisiri masee apaapu maraquandee iananoo.
11Oo Anutu, anee maasa mareeqee ufaanaki aruqisasee
firaa ummaara tia maasa qitaufakaaqa daaku qimaqaananoo.
12Anee namuqaara qianaqa misa nikunnai maasa qikiiqa radamia.
Maasa ida qambaanaira foora faqa nammari aufi marinakiara foora faqa oosana oosana ummaaraki
fimariafanana anee maasa mareeqee amiqiraqoo quqaqisanau.
13-14Qinee ummaaraki maridaqa ani Anutuna oosana
oosana qima afeekaikira ufa qimamiqiafana.
Doo maqee mi qima afeekaikira ufana qimamiafannandee ianaura.
Doo maqee qinee qima afeekaikiafanna ufanara qianaura.
Qinee aandau tatufirana mara maree ani amaana maqaki minisee suqa amianaura.
15Qinee sipsipa tatufirana suqamianaura.
Qinee burimmakau akoona faqa mimmi faqa tatufirana suqa amianaura.
Miqiananoo muna fannoo innaarunai ani aikiambu iannoo.
16Innee Anutunara qeerairi mariasa mai aniraifaqa qini dadaaqinara qimannimia.
17Qeeqa dookiqari dadaaqianifeera aareeqa, idinnai mina amooqiqa.
18Qinee mandainainara fifau ainainee qimasee kaqi
auqaunanoo Anutufa sia qini innaaru qirana iriqini.
19Kuqaa Anutufa qini ufa irinoo, qini innaaru qirana faqa irinoo.
20Anutufa sia qini innaaru qirana minniseenoo.
Sia narí aiqama kari amuqusiranara qao qinoo.
Minara mina auqu uqeerasee mina amooqiaqa.
Currently Selected:
Idi Ufa 66: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
