Idi Ufa 36
36
Faiqí faiqi mandoosanara qirufa.
1Numoo fannoo manda oosana maree mariasa
nimuqusaki maridanoo akaqa aaqara oosanara naakapaidanoo.
Anutuna minnisee sia minara rufiee marianara manda oosanara irirafa nimuqasaki kambiqaidanoo.
2Miqi mariasa nári kai náriara kaaqa uriqararausee qidaqa,
Anutufa maasa aaqarana sia amana qafamasee maasa ufa qimiannoo fee qidaqa.
3Misa nookinaa ufa fannoo manda ufa faqa unnufa faqa kai maridanoo.
Misa sia iriqaraasammasee auqara oosanara faqa andeeqara oosana faqa auqaidaqa.
4Misa nári qaarisaa faiaqee idaqa manda oosanara oonumafi irida maridaqa.
Misa sia moo andeeqara oosana auqaidaqa, misa manda oosanara faqa sia qaoo qidaqa.
Anutuna Andeeqara Oosana.
5Oo Yaawee, ani sia takaaninna amuqusirafa innaaruna amana kai ooru maridanoo.
Ani mapukusee marira oosana fannoo oonnamu amana kai ooru maridanoo.
6Ani Yaaweena andeeqarafa firaa aaqananamuara foora uriqaranoo maridanoo.
Anee maasa ufa irisee andeeqasee raina qimaqara
oosana fannoo ooruku nammari farumara foora meemai uqanna maridanoo.
Faiqí faqa aandau faqa ani rakisinnimaqarana ameemaanai maridaqa.
7Oo Yaawee ani maasara amuqusirafa firaa feefauru aqimaria ainainnafara foora maridanoo.
Maasa ani aqoosa ameemaanai keeqafi mandaaqaidaqa.
8Oo Yaawee anee rairaamma nimianna naranna oomaqa sakasee naidaqa.
Anee qinaqa maasa ani andeeqara oosana nammariara foora naa.
9Anee aiqama marirana oosana mariananoo.
Anee kaaqa qarafa mariannanara maasa kaaqa qarana qafaidaqa.
10Oo Yaawee anee aneenna amuqusirana aniara irimariasa kaifaa kaifaa nimida kai maria.
Anee aneenna andeeqarana andeeqara aatata fimariasa nimidana kai maria.
11Anee qinaqa nári nimoo naamoo imariasa sia nikunnai qini rafaaqafu qimaqaaqa.
Anee qinaqa manda oosana maree mariasa sia qini daru qifaqaaqa iaqa.
12Niqafaa, manda oosana maree mariasa doo saamuriqa maridaqa.
Misa maqasaa aqufiqa sia amana kafaa
findififaaranoo. Miqoo kai marifaranoo.
Currently Selected:
Idi Ufa 36: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
