Idi Ufa 33
33
Amooqira Idi.
1Innee andeeqarausa Yaaweefa auqoo ainainnara faaqa ridaqa asasiaqa.
Mina ufa mau fimariasa mina amooqiaqa.
2Innee piripuna aridaqa Yaaweena amooqiaqa.
Qisaukuqara taikasee sandafaqaa piripuna aridaqa Yaaweena amooqira idi raaqa.
3Innee Yaaweenara fuka idi raidaqa amooqiaqa.
Innee amiqimmasee akoofasara foora piripuna aridaqa faaqa fuisee qidaqa amooqira idi raaqa.
4Yaaweena ufa fannoo kuqaa anoona kai maridanoo.
Aiqama ainaina auqee marina mi mau kai uqee marifa maridanoo.
5Yaaweefa andeeqara marirana faqa andeeqasee amana amana kai rainee marianara faqa aididanoo.
Maa maqa maaqanaki Yaaweena sia taikara amuqusirafa qumbiqanoo maridanoo.
6Yaaweefa ufannai qufanoo innaaruna kambiqanau.
Narí ookinaa aidoonnai qufanoo suani faqa quqoona faqa fasau faqa kambiqanau.
7Yaaweefa ooruku nammari susufinnaki saka quqaandee inoo moodaannai suqu quqanau.
Ooruku nammari faruma meemai uqanna quqasee afeedinau.
8Minara maa maqa maaqanasaaqaraasa aiqama Yaaweenara innaaru qiaqa.
Maa maqa maaqanasaa mariasa minara naaquqee marina mina ameemaanai mariaqa.
9Yaaweefa qufanoo maa maqa maaqafa kambiqanau.
Mifa afeeka ufa qufanoo aiqama ainaina kambiqanau.
10Yaaweefa maa maqana saaqaraasa manda ufa tipundaariafanoo titannimaqaidanoo.
Maa maqana saa mariasa auqararee qia ainainna itita nimaqaidanoo.
11Yaaweena qimirirafa miqinoo maridanoo naaruara naaruara afeekaikamminoo maridanoo.
Mina amuqusakinaa qimirirafa naaruara naaruara mariannoo.
12Aiqama maqannaasa kiqari ya maqannaasee misa Anutufa Yaaweefa maridanoo fee asasiaqa.
Yaaweefa nariaree qimasee utaaqama qaisa asasiaqa.
13Yaaweefa innaarunaindari maqasaa mariasa aiqama niuqidanoo.
14Narí maridanoo rakisi nimaqee mariqooqari aiqama maqasaa mariasa niqafaidanoo.
15Yaaweefa aiqama maqannaasa nimuqusa auqunisaidanoo.
Misa auqee maria aiqama ainainnara iridanoo.
16Sia moo karaambiqa fannoo narí rakira fasiqa moomoonnaifau rakiranaki uriqaraidanoofau.
Afeeka sundia sia narí amudaanai qiranannai fau rakiranaki namuqaa urinnaaqaraidanoo fau.
17Rakiranaki maraqa nua qoosausa sia sundiauqa dadaaqifaqa rakirana urinnaaqareefaranoo.
Mi qoosausa firaa nimudanai qiranannai sia amana moona kuqirana titaqamaqaannoo.
18Yaaweena afu fannoo nariara rufiee mariasa dadaaqirara misasaa maridanoo.
Yaaweena naaru marira amuqusiranasaa
mundimariasa misasaa Yaaweena afu fannoo rusinoo maridanoo.
19Mifa kuqiranasaa itita nimaqaidanoo.
Mifa aandaroo aukuana faqa rakisi nimaqaidanoo.
20Maasa qimana Yaaweenaki kai quqaidanoo.
Mifa kai maasa dadaaqirafa maasa saqari maridanoo.
21Maasa mina naaquqara andeeqara auqu saqarikunnanara firaaqoo asasidaqa.
22Oo Yaawee ani naaru marira amuqusirafa maasa faqa mariani.
Maasa anisaa mundiqa maridaqa.
Currently Selected:
Idi Ufa 33: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
