Idi Ufa 16
16
Afaaqa uqasee mariranara innaaru qirufa.
1Qinee ani saqariki marunnanara ititaqimaqa.
Oo Anutu, anee qini ititaqimaqaa.
2Qinee Yaaweena maaqi qimasee qimamiqa. Anee qini Yaaweefa mariananoo.
Aiqama ainaina anee iannannaindari kai qiniki anidanoo.
3Faiqí anaasee Yaaweenaki mapukusee mariasa kaaqa andeeqarausa maridaqa.
Qini firaa irirafa misa faqa marirara dididanoo.
4Unna anutusa iannai sandee mariasa oosana oosana ummaara nári nifaaqai mara quqaidaqa.
Qinee sia misa faqa aandau tatufirana suqaanaura.
Qinee sia misa faqa misa unnaqira anutuna amooqianaura.
5Oo Yaawee, anee kai qini aiqama ainainara foora mariananoo.
Qini didimari aiqama ainainna anee qimimariananoo.
Qini marirafa ani asaukuki maridanoo.
6Anee qimimarianna ainainausa amiqirafa kai maridanoo.
Mi ainainausa aiqama kaaqa amiqirafa kai maridanoo.
7Yaweefa qini aana muquni marinara mina amooqidaqa.
Eendaki qini daakirafa daakapaidanoo.
8Qinee aiqama kari Yaaweena afusaa marunnanara iridaqa.
Mifa qini faqa marinara sia moo ainaina fannoo qini kasi kasimma qimaqaannoo.
9Minara qinee dufi dufi qidaqa asasidaqa.
Qinee kaaqa amiqiranaki marunnanara miqidaqa.
10Anee kuqira afeeka ameemaanaindaraana ititaqimaqaannanara miqidaqa.
Anee aneenna aidimarina sia minnisainanoo mifa kuqufinoo putaaiannoo.
11Anee kisaaqasaa maa maqanasaa marira aana qini uqafiqeennaranoo.
Ani afusaa marunafa asasirana qumbiqa qimaqaidanoo.
Mifa naaru naaru marira asasirana qimidanoo.
Currently Selected:
Idi Ufa 16: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
