Idi Ufa 140
140
Isaraee maqannaasa Anutufa dadaaqiani fee quu ufafa.
1Oo Yaawee mandoosana maree mariasa nisaukukinaana qini maraquqisaa.
Faiqí nariqanuasasaa faqa ititaqisaa.
2Misa aiqama kari mandainainara tupundaaridaqa.
Misa aiqama kari aanoo qirana kai uqeeraidaqa.
3Misa nifauru nimaakiri kuqimaria sakanifara foora maridanoo.
Misa nookinaa ufa fannoo ukadiqa manda marasinnara foora maridanoo.
4Oo Yaawee manda oosana maree mariasa afeeka ameemaanaindaraana qini ititaqisaa.
Faiqí nariqanuasa qini qiku qama qimifaqa aqufuaneera misa tipundaridaqa.
Minara anee misa saa ititaqisaa.
5Nári nimoo naamoo imariasa qini qimaara ufaanara foora fufidaqa.
Misa nári ufaana aatataa qini qimaara fufidaqa.
6Oo Yaawee qinee maaqi qimasee aniara qidaqa.
Anee qini Anutufa mariananoo.
Oo Yaawee anee qini dadaaqianneera aaree marunnana iria.
7Oo qini uriqarara Yaaweefa, anee qini amudaanai qimasee itita qimaqee marianafa mariananoo.
Rakiranaki anee qini ititaqimaqaananoo.
8Oo Yaawee sia anee mandoosana maree mariasa nidi mari ainaina nimia.
Anee misa tipundaarirana ititannisainanoo sia anoonaikiani.
9Anee qinaqa qini namuqaauqa sia rakiranaki uriqaraaqa.
Anee qinanoo misa darirari maria ufafa quandaki nariqa naruani.
10Miqi mariasasaa fidika arira ida auru adia nimaqaa.
Misa dikaandaki aqusaina sia kaifaa minakiqari uruaqa.
11Niqoonausara unna qimasee misa kikiqusi mariasa aiqama ainainirafa sia anoonaikiani.
Mandainaina fannoo faiqí kuqa nariqanuasa rafaaqafuseenoo mandaikamma nimaqaani.
12Oo Yaawee anee kudi fasiqa anaasee kootaki itita nimaqaannanara qinee iridaqa.
Anee sarau imariasa amana amana kai itita nimaqaannanara faqa iridaqa.
13Andeeqarausa kuqaa uqanna ani amooqifaranoo.
Misa ani afusaa marifaranoo.
Currently Selected:
Idi Ufa 140: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
