Aaquqira Ufa 3
3
Kumaaraa maanaaqa naakapara ufa.
1Qini qimaaku qinee qimamianna ufana sia qaunua. Qinee qimamianna ufana aiqama kari iridana qinee qimamunnandee ia.
2Qinee qimami marunna ufafa ani kuqirana kisaaqasaa sainana maridana amiqiranaki reemindeemi riranaki marinnaranoo.
3Mapukusee marirana faqa fisoo fisoo irana faqa mi ainainna qanda mareeqee saufauruara foora rumbasaina anukaki mariani, aneena amuqusaki akara rumaqaina mariani.
4Anee miqinnanannai faiqí faqa Anutufa faqa aniara nidifaranoo.
5Aneenna amuqusa aiqamannai karaambaiqa saqarikia. Sia anee aneenna iriranara amanammifoo qimasee minasaa mundua.
6Anee aiqama ainaina auqeenanana Yaaeenara ani aaqooki marinana kai auqaa. Miqimmasee finanoo mifa andeeqara aana ani uqafiqaannoo.
7Sia anee aneennara irirana faqaasee qimasee mana mania. Karaambaiqa ufa mau fidana manda oosana auqarara qeerairia.
8Anee miqinnanannai amiqira marasinnara foora ani afaaqai nammuana qunuseenoo aidafirana taika sainana amiqirafa mariannandee ina marinnaranoo.
9Anee aneenna nara ainaina amiqirana kai aneenna maqakinaana unakuseenana Anutuna tatufirana suqa amia.
10Anee miqinanoo Yaaweefa ani ainaina moomoo afuqaki rairaamma amiannoo. Anee miqinanoo Yaaweefa quandaki ani narana nammari moomoo rairaamma aminana afeedira maqaki quqararee qimasee sia amanai kinnaranoo.
11Oo qini qimaaku Yaaweefa ani andeeqainana sia anee minara akooqaani, Yaaweefa aaquqira ufa qimidanoo fee qimasee amiqimmasee iria.
12Yaaweefa narí aidi marisa aaqee foora andeeqa nimaqaidanoo. Faiqi anoofa akoofa narí faiqi andeeqaindee inoo miqidanoo.
13Amiqira irirana faqaasa faqa andeeqara irirana faqaasa faqa asasidaqa.
14Irirafa siruaa faqa koora faqa uriaaqararafa maridanoo.
15Mi irirafa firaa feefauru qusee maree maria oonina faqa ani kaaqa aidi mari amiqira ainaina faqa uraaqararafa maridanoo.
16Irirafa kisaaqasaa marirana ani amidanoo. Mi irirafa ainaina faqaasaikirana faqa uriqarara auqu aniamiannoo.
17Amiqira irirafa ani marirana amiqimma amaqaseenoo ani amiqimmasee afiqee fuannoo.
18Amiqira irirana faqaasa asasidaqa, amiqira irirafa misa marirana nimiannoo.
19Yaaweefa narí amiqira iriranannai innaruna faqa maqa faqa auqinau. Oonumafi iriranannai innaaruna murufi atukaranau.
20Yaaweena amiqira irirafa qufanoo nammari quminau, kafa oonamuara qufanoo aaku suqufufanoo maqasaa aqufinau.
21Oo qini qimaaku anoona ufa faqa amiqira irirana faqa sandee foora atukaramma qumarasee sia uqaa.
22Anee miqinanoo mi ainaina qanda ani marirana amisee ani amiqira doodapaaniara foora marifaranoo. 23Anee miqinana aneenna aatata amiqimmasee finnaranoo sia aiku rupauraki saamurinnaranoo.
24Anee faiqeenana sia rufieennaranoo amiqimmasee afu rirainana faiqeennaranoo.
25Manda oosana maree mariasasaa tautummasee kambiqara ummaara firaafa firaa aaku oonnamuara foora kambiqoondee iranara sia rufieennaranoo.
26Yaaweefa ani ummaarasaa itita amaqaannoo. Mifa anisaa rakisinana sia ufaanaki arinnaranoo.
27Oo qini qimaaku faiqí moo fannoo moo ainainara dadaaqiannee qinana sia qaoo qia. Mi ainaina marinana kaqi dadaaqia.
28Sia aneenna aqoonnanara finana duna ani maraannee qia. Aniki marinana aaqee kai amia.
29Aneenna aqoonnanara sia oonumafi manda irirana iria mifa ani aaqa marifa narí afaaqa aniki quqee marifa marinara sia manda irirana minara iria.
30Ani sia mandaikamma amaqainnana sia fifau aanoo qima amaqaa.
31Anee sia faiqí narimarasa naanna raa. Misa oosana qafammasee sia qinee faqa miqiunoo qia.
32Manda oosana maree mariasara Yaaweefa fidiaqaa midanoo. Andeeqara oosna faqaasa Yaweena afaaqasaa aqondi mariafanoo misara aididanoo.
33Yaaweefa narí manda niqurara ufa manda oosana maree maria fasiqausa maaqasa uqaidanoo. Andeeqara oosana maree maria fasiqausa maaqasaa narí amiqi amiqirana uqaidanoo.
34Faiqí nári nifaaqa nári nuqu uqeeqee fasiqausa Yaaweefa misara akooqaidanoo. Fisoofisoo idaqa nári mara maree qumi mariasara Yaaweefa aididanoo.
35Irirana faqaasa nuqu uqeerarana mareefaranoo. Furufari mariasa nári mi furufarirafa nári nisaurirana nimiannoo.
Currently Selected:
Aaquqira Ufa 3: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
