Aaquqira Ufa 19
19
1Kudi fasiqa fannoo andeeqara aatata fimarifa maridanoo mifa uriqararafa maridanoo. Ufa rukiee marifa furufari marifa ureeqanoo maridanoo.
2Sia oonu mafi irirana maraifa aaqamaki kaqiruna ubeekaidanoo. Kai kaqi fimarifa kaqi runna fiaikatee finoo aaqaidanoo.
3Akaqausa sia irirana maraa oosanafa kai nariqa mandaikamma nimaqaifaqa fifau quandaki Anutuna qoomma amaqaidaqa.
4Qumiasana faqaana aqoondiuqa moomoo maridaqa. Kudi fasiqa aqoondi moodaafa ani qafeenoo ainaina siai fee qimasee anirandee fuannoo.
5Kootaki unna ufa qinana rumbaranaki finnaranoo. Unnufa qinana sia ummaara fiaaqareennaranoo.
6Aiqamausa uriqarara fasiqa aqoondikiranaki keeqeefaranoo. Ainaina nimi mari fasiqanara aiqamaus minara unna qimasee qini qiqoondi fee qidaqa amooqidaqa.
7Kudi fasiqa aiku asauku mina minnisaidaqa mina aqoondiuqa faqa firaaqoo minara nikooqaidanoo. Narí nammeera qimasee naaraifaqa sia iridaqa.
8Faiqí moo fannoo irirana maraifa amiqi amiqidanoo. Amiqira iriranara aidi mari fasiqafa aiqama ainaina auqainafa anoonaikammiannoo.
9Kootaki unnufa qimari fasiqafa sia rumbaranaki sia fuannoo fuannoo. Unnufa qimarifa narí kuqirana paquriannoo.
10Furufarira fasiqa qumiasana qambaanai maridanoo manda marira maridanoo. Faiqí moo fannoo ureeqararafa faiqí firaasa uriqararafaikinoo maridanoo mandaikamminoo maridanoo.
11Amiqira irirana faqaafa sia qusufa qimasee aanoo qidanoo narí aanoo qirana rafaaqa fidanoo. Miqi mari fasiqafa moo manda ufa qimamiafanoo sia irinoora foora inara narí afaaqa qareenaranee qidanoo iridanoo.
12Karaambaiqa fasiqa aanoo fannoo kaasau fainiara foora rairai qifaqa faiqí anaasee rufiaidaqa. Mina asasirafa qifi faramuara foora asooama nimaqaidanoo.
13Furufarira fasiqauqa nári ninaukoo nisauriranaki quqannisaidaqa. Anaasee moo fannoo mina aanoo qirafa namudisaa kapatuara foora kapi kapida maridanoo.
14Qumiasana saqama nári nikausa saaqaraana maraidaqa. Yaaweefa kai irirana faqaa anaasee faiqí nimidanoo.
15Kudoosaapee maria oosanafa faiqarana kai amidanoo. Ainaina sia inafa aandaroo aruannoo.
16Anee Anutna aakapara ufa mau finana kisaaqasaa marinnaranoo. Anee aakapara ufara qikoofee qinana kuqinnaranoo.
17Anee kudi fasiqa anaasee narana aina nimidana Yaaweena amiara foora imariananoo kasooaqee Yaaweefa mina akiiqara ani faqa amiannoo.
18Aneenna faiqi namu ufa irirana amanasaa marifana miqoo naakapaa anee sia miqinana anee misa dadaaqianaqa mandaki aqufidaqa.
19Qusufa qimasee aanoo qimari fasiqafa ariranaki aqufuannoo. Anee minakinaana feefauru masainanoo mifa kafaa kai mi ummaarana auqaannoo. 20Aakapara ufa faqa iria. Anee miqinana kasooaqee irirana faqaafa marinnaranoo.
21Faiqí atikuraki irirana oosana oosana marifanoo firannaira iridanoo. Yaaweena irirafa kuqaa anoona kambiqaannoo.
22Faiqí moo kaaqa ainainara rimaria oosana faqaafa asaurirana maraidanoo. Qumiasana siaifa andeeqara fasiqa fannoo unna ufa qimari fasiqana uraaqaranoo maridanoo.
23Yaaweenara rufieenana maa maqanasaa kisaaqasaa mainnaranoo. Yaaweenara rufiainanoo sia mandainaina ani afaaqai aqufuannoo.
24Akaqausa kaaqa kudoosaapee mariasa difaaniki narana qumaraseeqa nooki quqarara nikooqaidanoo.
25Aanoo qimari fasiqana arinanoo irirana siaisa mina qafeeqa irirana mareefaranoo. Irirana faqaana aakapainanoo dauni irirana moo faqa moo faqa maraannoo.
26Manda irirana faqaa faiqi fannoo kai narí akoona mandaikamma amaqeenoo narí anoona aiqamasaifanoo fifaqa mi oosanausa nisaurirana firaana maraidaqa.
27Oo qini qimaaku naamuaqira ufa iriseenana akooqaifana finana anee irisaanna ufana minnisee furufara minnaranoo.
28Ufa qimarianaki unna quandara ufa qimarifa andeeqara koota oosanara akooqaidanoo. Manda oosana maree mariasa aaqara oosana adiafaa iranara ridaqa.
29Andeeqaranara nikooqee marisa sandufa misa nimaarusirafa maridanoo. Qunnaana samu furufari mariasa narirafa maridanoo.
Currently Selected:
Aaquqira Ufa 19: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
