Rafudoo Akarafa 3
3
Anutufa Mosena aaranau.
1Moo kari Mosefa narí airaamaku Yeetoroona Midiannaa maqannaa amaana maqaki aanaiqi kirana sipsipasaa faqa mimisaa faqa rakisi marinau. Moo kari Mosefa narí airaamaku sipsipauqa faqa mimiuqa faqa nifiqa mareenoo aadana maqa maaqa fiqareenoo Horeeba Anutuna aaqanasaa muruqoo faqa andanda neemarufanoo rakisi marinau. 2Rakisi marufanoo miqoo Anutuna angiroo fannoo idaurukiqari mina afusaa koorooinau. Kooro mafufanoo, Mosefa mina qafoofanoo idauru firaafa qaidanoo sia mi sasamimina qanau. 3Mosefa mina qafamaseenoo moo ainaina kambiqaidanoo, saina aaqa oonuree qafaa, nanaree sasamimi sia ida qaidanoo fee qimasee aaqa finau.
4Mosefa mina qafararee qimaseenoo mina aaqa oonu roofanoo Anutufa mi idauruna kiqari Mosena aaraidanoo qinau. Mose Mose qufanoo Mosefa qinau. Qinee maa maridaqa. 5Qufanoo,Anutufa qinau, sia kaaqa adeedi ania. Aneenna aiku anaamu raipaqua, anee kikiqina marianna maqusafa mifa naaquqara maqa maridanoo. 6Miqi qimaseenoo Anutufa kaifaa qimaminoo qinau. Qinee ani akoona Anutusa maridaqa. Abarahaammana faqa Isakeena faqa Yakooboona faqa Anutusa maridaqa. Mosefa mi ufana iriseenoo Anutuna qafaanoo qimaseenoo rufiaseenoo oorisaa ititanau.
7Anutufa kaifaa Mosena qimaminoo qinau. Qini faiqí anaasee Isaraee maqannaasa Isipa maqannasaa firaa aupurarana nimi mariafaqa nindafaidaqa. Misa qiniara maasa afeeka rakisira rakisi mariasa nisaukukinaana rafia quqaannee qimasee qini daaree mariafaqa iridaqa. Qinee misa aiqama aupurarana maree marianara iridaqa. 8Qinee innaarunaindari qumuree Isipa maqannaasa nisaukukinaana mareeqee firaa maqa maaqa ainoo faqaa maqa aiqama ainaina rairaa imariqoo quqaanauranoo. Mi maqanasaa Kannaana maqannaasa faqa Heeta maqannaasa faqa Amoora maqannaasa faqa Peerisita maqannaasa faqa Hifita maqannaasa faqa Yeebusa maqannaasa faqa misauqa mariaqoo quqannisaanaura. 9Isipa maqannaasa Heeburu maqannaasa radami mariafaqa misa qiki raqee mariafa doo qini daaqoosaa rifaqa iridaqa. 10Mose, qinee maqee ani aiqaanana Isipa maqannaasa Kinna innai oonuree qinanoo Kinna fannoo qini faiqi anaasee Isaraee maqannaasa ani aminana nifiqamaree Isipa maqusa uqasee ania. 11Qufanoo, Mosefa Anutuna qimaminoo qinau. Akasaa qinee maaqirausa naqimasee fee Faraoo finnai oonuree Isaraee maqannaasa Isipa maqa maaqaki mariana nifiqa maree anianauree. 12Qufanoo, Anutufa qinau, qinee moo ainaina ani uqafiqaananoo mi ainainafa ani uqafiqainana qoo kuqaa Anutufa diqiqaifaqa Isaraee maqannaasaki anifee qimasee irinnaanoo.Anee faiqi anaasee Isipa maqusa kinaana nifiqa maree anireenana maa aaqannasaa Anutuna amooqinnaranoo. 13Mosefa iriseenoo kaifaa Anutuna qimaminoo qinau. Anee qini diqiqainaqa qinee Isaraee maqannaasa iannai oonu reeqa maaqi qianaura. Inni ninaakusa mara Anutufa qini diqiqaifaqa inni qimannimirara anidaqa. Miqi qianaqa misa maaqi qimasee qini ireefaranoo. Mina auqu yafee maridanoo fee qifaqa qinee naqifee qimasee qimannimianauree. 14Qufanoo,Anutufa iriseenoo Mosena qimaminoo qinau. Qinee qeeqa kai marunna Anutusa qidaqa. Anee maaqi qimasee misa qimannimia. Nariara mifa qinee kaqi marunna Anutusee qimarifa mifa qini diqiqaifaqa innee iannai anidaqa. 15Anutufa kaifaa maaqi qimaseenoo Mosena qimaminau. Isaraee maqannaasa qimannimia, Karaambaiqa inni ninaakusa mara Anutufa, Abarahaammana faqa Isakeena faqa Yakoboona faqa Anutufa qini diqiqaifaqa innee iannai anidaqa. Anutufa kaifaa Mosena qimaminoo qinau, qini duqu mifa naaru naaru kaqi marinaqa inni faiqi namu ninaiqiqi mara kasooqaqee naaru kambiqainausa misa miqi qimasee qini duqu reefaranoo 16Anutufa kaifaa Mosena qimaminoo qinau. Anee ooquree Isaraee maqannaasa uriqararausa suqusee maaqi qimasee qimannimia. Yaaweefa inni ninaakusa mara Abarahaammana faqa Isakeena faqa Yakooboona faqa Anutufa qini qifusaa kooroo mafinoo qimaqiminoo. Misa qimannimia, qinee misa iannai aniree niqafaunaqa Isipa maqannaasa qumaara moomoo nimimariafaqa qafaidaqa. 17Qinee, inni Isipa maqa maaqakinaana maraanauree qimasee iridaqa. Misa firaa aupurarana kinaana nifieeqee ainoo faqaa maqasaa irairaa ida reemindeemiri mariqoo Kannaa maqasaa faqa Heeta maqasaa faqa Amoora maqasaa faqa Peerisita maqasaa faqa Hifita maqasaa faqa Yeebusa maqasaa faqa quqannisaanaura.
18Mosee anee Isaraee maqannaasa uriqarara fasiqauqa qimanniminaqa misa ani ufa irifana, Anee misa faqa nifiqa mareenana Isipa maqannaasa Kinna marinnai oonuree maaqi qimasee mina qimamia. Maasa Heeburu maqannaasa Karaambaiqa Anutufa maasa qifusaa kooroo mafinoo qimanniminoo.Anee maqee maasa uqasainaqa, maasa qaaramoo faasaana aadana maqa maaqaki oonuree maasa Karaambaiqa Anutuna tatufirana suqa amianauranoo. 19Qinee iridaqa, anee miqi qimasee qimaminanoo, Isipa maqannaasa Kinna fannoo sia inni niiqainaqa fifaranoo. Qinee mina aidafirana amiananoo miqoo inni niiqaannoo. 20Qinee oosana oosana ainaina Isipa maqannaasa qambaanai auqamasaanaqa qafaifaqa, qinee eeqa afeekannai misa aupurarana faqa fitiqnarana faqa nimianauranoo. Nimiananoo Faraoofa miqoo inni uqasainaqa fifaranoo.
21Qinee Isipa maqannaasa inniara naaquqarana nimianaqa innee Isipa maqasaaqari sia kaqi fifaranoo. Misa ainaina inni nimifaqa mara maree fifaranoo. 22Innee firarifaqa inni ninaaqmaaka Isipa maqannaa aanaaseeuqa nári naaqa maria aanaaseesa faqa nariqa maaqaki mariasara faqa qifaqa qamunna faqa koora faqa siruaa faqa nifaaqa auqi maria ainainausa faqa nimifaqa inneeqa faiqi namu niraamuqmaaka Isipa maqannaa amiqira qamunna ainaina kai afisunnimaqaifaqa maree fuaqa. Miqinnanannai innee Isipa maqannaasa ainaina maree fiara foora ifaranoo.
Currently Selected:
Rafudoo Akarafa 3: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.