Rafudoo Akarafa 2
2
Misa sia Mosena faiqi aanaaqi kuqa ariqau.
1Mi kamuqoo mi aukuanna Reefina atikiqari kumaaraa moo fannoo findi finoo maanaaqa Reefina oosanaki maranau. 2Maraseenoo faiqi moo akoonaiqi maqaseenoo mina anoofa qafoofanoo kaaqa amiqira faiqi uqanna marufanoo Isipa maqannaasa arifoo qimaseenoo qaaramoo quqoonaki kukeeqa amaqaqoofanoo marinau. 3Qaaramoo quqoona aiqaroofanoo faiqi aanaaqi kaqikaaqoo aaqoo irufanoo mina anoofa akoofa rafaaqafirara oonumafi irusia mina anoofa furaa amanee uqa kisaaqa difaaniara foora auqinau. Auquseenoo mifa koorootaqa qumareenoo furaa uqamau sia nammari ruqiqaki keeqaanifeera akinau. Uqa auquseenoo mina anoofa faiqi aanaaqi uqaki rumaseenoo furaa moomoo nammari ammausai marunaki kukeeqaqoofanoo minaki marinau. 4Marufanoo mi faiqina anasaafa nianai kikiqinoo maridanoo rakisi marinau Minaki nana ainainee kabiqainaqa qafaanauree qimasaidanoo qafee marinau.
5Faraoona araamuna fannoo nammari auqararee qimasee Naira nammarinni ooqufufaqa minasaa rakisi maru manaaqausa mina faqa nammarinni ooqufiqau. Mifa nammari auqaidanoo furaaki qafoofanoo uqa marinau. Marufanoo qafamaseenoo narí ainainira manaaqa qimamufanoo mi uqana nammarikinaana maranau. 6Marasoofanoo Faraoona araamuna fannoo mina asaukukinaana maraseenoo uqa oo raqasee faiqi aanaaqi qafanau. Qafoofanoo, faiqi aanaaqi fannoo iki raqoofanoo mina irufanoo amuqusufanoo qinau. Maafa Heeburu maqannaasa faiqi akoonaiqi maridanoo. 7Mifa miqi qimarufanoo mi faiqi anaaqina anasaafa anireenoo Faraoona araamuna maaqi qimasee qimaminau. Amanee Heeburu anaasee moo ooru afiqee muqusaananoo fee naamma amiannoo fee. 8Qufanoo, faraoona araamuna eedoo qufanoo mi faiqi anaaqina anasaafa ooru nári ninoona uqanna afiqee quminau. 9Qumuroofanoo Faraoona araamuna fannoo maaqi qimaseenoo mi anaaseena qimaminau. Anee maa faiqi anaaqina naamma amidana rakisi marinaqa qinee maqee maqee feefauru ani ami marianauranoo. Mi anaaseefa eedoo qimaseenoo narí faiqi aanaaqi uqanna narí maaqai munu qaqee idanoo rakisi marinau. 10Mi faiqi anaaqifa kaqi kaaqoo aaqoo irufanoo,mina anoofa afiqa mareenoo Faraoona araamuna maruqoo minisoofanoo mina faiqika mambinau. Fuka anoofa mina auqu rarara maaqi qinau. Qinee nammarikinaana maraunnanara Mosenee qianaura.
Mosefa Midiannaa maqusai sandanau.
11Mariiufanoo Mosefa innooqafufanoo moo kari narí maqannaa Isaraee maqannaasa oonu nindafoofaqa firaa kadaapi rimariqau. Isipa maqannaa moo fannoo Heeburu maqannaa fasiqa Mosena aqoonnana arimarufanoo qafanau. 12Qafee marufanoo Mosena kaaqa uqanna aranaqoofanoo mifa faiqiara dinni dinni munu afu maqee mini afu maqee ufanoo faiqí sia marufanoo Isipa maqannaa fasiqa Mosefa kuqa aruseenoo mina iri nukuda afaqaseenoo minaki kukeeqasee akundanau.
13Iaqoofanoo kananaana Mooseefa kaifaa narí maqannaasa oonu nindafararee qimaseenoo finau. Oonuree nindafoofaqa Heeburu fasiqa qaaraqanda rakiqau. Raki marufanoo Mosefa nari aqoonnana arimaruna qimaminoo qinau. Anee naqaafee ifanee aneenna aqoonnana oosana siainaki fifau aridanee. 14Miqi qufanoo aru fasiqafa qinau. Yafee aniara Kinna maridana maasa ufa irisee andeeqaannee qifanee andeeqaidanee. Eenda anee Isipa maqannaa aruanafa kafaa maqee qini faqa darinnaree qufanoo Mosefa tautinau. Tautumandee qinau. Doo eenda arunnanara aiqama kooroomminoo maridanoo fee qimaseenoo rufianau.
15Faraoofa minara iriseenoo Mosena kuqa aruaneera ufanoo Mosefa minara rufiamareenoo Isipa maqa maaqa quqasee Midianna maqa maaqai nianai sandanau. 16Sandee oonureenoo nammari madika afaisaa ooqu marinau. Midianna maqannaa amaana maqaki aanaiqikirana mina auqu Yeetaroona araamuqmaaka dinni qisauku taikasee dinni oonu qaara marasee 7 mariqau. Mosefa nammari madika afaisaa marufaqa mi manaaqausa nári nikoona sipsipauqa faqa mimmiuqa faqa nammari saka nimianee qimasee aniraqau. 17Faiqí akaqausa nári sipsipasaa rakisi marusa mi manaaqausa niqiqoofaqa anirandee fufaqa misa nári sipsipa naaree nammari nimianeera qufanoo Mosefa findifinoo misara qaoo qimaseenoo maanaaqauqa naaroofaqa aniroofanoo Mosefa narí kai misa sipsipauqa faqa mimmiuqa faqa nammari saka niminau.
18Mi manaaqausa sipsipauqa nammari neeneesoofaqa nifiqee maaqai fiqau. Oonu roofanoo misa nikoofa iramirinoo qinau. Innee naqifee ifaqee maqee faasaanasaa anidee. 19Miqi qufaqa misa qiqau. Isipa maqannaa fasiqa moo fannoo faiqí sipsipasaa rakisi mariasa oonu raafanoo misara qaoo qimaseenoo maasa sipsipauqa narí kai nammari saka qumaree nimiisaifaqa dauni anidaqa. 20Misa nikoofa mina irinoo qinau. Mi fasiqafa yaifee maridanoo fee. Nanaree innee mina minni aisee anidee. Doo sandee oonu afiqaifanoo narana ani naani. Miqi qimasoofaqa oonu Mosena afiqee aniqau. 21Yeetaroofa Mosenara qini faqa mariannee qufanoo eedoo qimasee marinau. Marufanoo Yeetaroofa narí araamuna Sipooraa nammarina Mosena amufanoo anaaqara maranau. 22Maraseenoo faiqi akoonaiqi maqanau. Maqaseenoo Mosefa narí faiqi auqureenoo qinee aanaamuru maqusaki ani maridee qimaseenoo Keerasoomma nee qinau.
23Mosefa miqoo moomoo aukuanaki marufanoo Isipa maqanna karaambaiqa Faraoofa kuqinau. Kuqufufaqa Isaraee maqannaasa Isipa maqannaasa afeeka rumbarana ameemaanai kaqi kai aupuraranaki maridaqa Anutufinnai dadaaqianifeera innaaru qimariqau. Misa innaaru qirafa Anutufinnai ooru finau. 24Anutufa misa qiki raqarana iriseenoo Abarahaamana faqa Isakeena faqa Yakooboona faqa moodaanaki kira ufa qimaqoofa misa faiqinamu faqa dadaaqianifeera oonu mafi irinau. 25Anutufa misa mandainainaki marufanoo misara oonu mafi irufanoo amuqusinau.
Currently Selected:
Rafudoo Akarafa 2: bjr
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.