Zan 14
14
Zozii ‑glɩ 'lɛ ‑gugwiea ‑ɛ mʋ 'lɛ Toa cɩ na
1«Pɔɔvʋ 'la 'bhlaa anyɩ. A kalɩ Laagɔ 'la pɔɔtɛtɛ ɩya a kalɩ 'na pɔɔtɛtɛ. 2N To 'la 'slea nɩkplaan, sakʋdɩ ‑bhutukpa ‑kʋ 'yɛpɩ. Ɩ 'taa sɛɛ ‑kʋ na, n cɩa anyɩa 'claa lebhe n mʋ ka ɩya n 'ka anyɩ sakʋda bhɔsʋa bha? 3Daa n cɩ 'ka 'lɛ mʋ ɩya n 'ka 'lɛ anyɩ daa a cɩ 'ka 'lɛ kʋ na bhɔsʋa na, n cɩ 'ka cɔlɔ ɩya n 'ka anyɩ 'ma ɩya daa n ‑kʋ 'lɛ na, anyɩ ‑ma, a 'ka dɛ kʋmʋ. 4Gbazɩa n mʋ 'lɛ na, a ‑ci 'yɛpɩ 'la ‑gugwiea.»
5Na, Tomaa yɔɔ 'cla lebhe: «‑Kwlenyɔ, ‑a 'ta daa 'titia ‑n mʋ 'lɛ na ‑ci. Na, 'nsasa ‑a ‑cɩ kaa 'lɛ 'yɛpɩ 'la ‑gugwiea cibhlili bha?» 6‑Ma Zozii yɔɔ 'cla lebhe: «‑Amʋ ‑glɩ 'lɛ ‑gugwiea, ‑nʋawlɛa ɩya jabhʋa. Nclɔɔ bhlogbɩɩ cɩ 'ta Toa cɩ mʋ, ɩ ‑ka ‑kʋ lebhe ɔ 'taan 'kʋ 'plɩlɩ na.» 7Ɩ ‑ka ‑kʋ lebhe a ‑kaa ‑amʋa ‑ci na, a cɩ 'kaa Toa ‑ma cibhlili. ‑Ma ‑pɔtɔnʋ, a cɩnɩɔ 'nyɩ a yɔɔ 'lɩ.
8Na, Filipʋ yɔɔ 'cla lebhe: «‑Kwlenyɔ, pala anyɩ Toa, ɩmɩ ‑tɛɛ ‑a 'matɩ 'lɛ.» 9‑Ma Zozii yɔɔ 'cla lebhe: «Filipʋ, n ya anyɩ sidiin ‑gwlɛlɩ. Na, ‑n 'ta ka ‑azlaan cibhlili bha? Ɔmɔa ‑ɔ yaan 'lɛ 'lɩ na, ɔ ya Toa 'lɩ. 'Nyɩ 'lɩsaa 'la gbʋ ‑n claa 'lɛ lebhe: Pala anyɩ Toa bha? 10‑N la 'ta ‑nʋawlɛ lebhe n ‑kʋ Toa nɩkplaan 'nyɩ Toa ‑kʋʋn 'lɛ nɩkplaan bha? Wɔlɩa n solu 'lɛ anyɩ na, ‑n 'ta 'na 'wluun 'n nyɩtɛlɩ 'tɩɩ 'lɛ. ‑Ma Toa ‑ɔ ‑kʋʋn 'lɛ nɩkplaan na, ɔmɔ 'titi ‑ɔ nʋ 'lɛ ɔla lobholia. 11Na, n cla 'lɛ anyɩ lebhe, n ‑kʋ Toa nɩkplaan 'nyɩ Toa ‑kʋʋn 'lɛ nɩkplaan na, a lɩɩ ‑nʋawlɛ. 'Nyɩ ka a 'tɩɩ ‑nʋawlɛ la 'titio na, a lɩɩ ‑nʋawlɛ, lobholia n nʋ na 'la gbʋ. 12N solu anyɩ, ɩ ‑glɩ ‑nʋawlɛ, ɔmɔa ‑ɔ ‑ka 'lɛ 'na pɔɔtɛtɛ na, ɔmɔ ‑ma, ɔ cɩ lobholia n nʋ 'lɛ na nʋ, 'nyɩ ɩ cɩ 'dɛ 'kʋ zi, sa ka n mʋ 'lɛ Toa cɩ na. 13Ɩmɩa ‑tɛtɛa a cɩ 'ka 'lɛ 'na 'ŋlɩa nɩkplaan 'clalɩ na, n cɩ 'kɩɩ nʋ ɩya 'Cʋa ka gba ɩya Toa 'la 'klʋagba 'ka ‑zɔnwlʋ. 14Gbazɩ a ‑kaan lʋʋ 'na 'ŋlɩa nɩkplaan 'clalɩ na, n cɩ kʋʋ nʋ.
A cɩ 'ka ‑Kplɔkplɔ ‑Wugoa 'lɩ
15A ‑kaan ‑wa na, a cɩ 'ka 'na ‑jlɩmaa 'kʋ 'plɩlɩ. 16Ɩya ‑amʋ, n 'ka Toa bhibhie ɩya ɔ 'ka anyɩ 'kʋcinyɔ 'nyɩ ɩya ɔ 'ka anyɩ cɩ kʋ 'lʋkʋlʋkʋ ɩya 'lʋkʋlʋkʋ. 17Ɔmɔ ‑ɔ ‑glɩ 'lɛ ‑nʋawlɛ ‑Wugoa. ‑Laagɔzɔan cɩ 'tʋʋ 'lɩlɩɛ mɩno ‑ofi lebhe ‑laagɔzɔan 'tʋʋ ‑jlɛ 'nyɩ ɩ 'tʋʋ ‑ci. ‑Ma anyɩ, a ‑ciu ‑ofi lebhe ʋ ‑kʋ anyɩ cɩ 'nyɩ ʋ cɩ 'ka anyɩ nɩkplaan kʋ clɩɩa 'fɩan.
18N cɩ 'ta anyɩ kuyliin te, n cɩ 'ka anyɩ sidiin cɔlɔ. 19Na, ‑ɔ ‑to 'pɛpɛ ɩya ‑laagɔzɔan 'la kanɩɩn 'lɩ. ‑Ma anyɩ, a cɩ 'ka 'kaan 'lɩ, ‑ofi lebhe n ‑ja ɩya anyɩ ‑masɛɛ a 'ka jabha. 20'Dɛ 'la clɩɩa 'kʋ, a cɩ cibhlili lebhe n 'kʋ Toa nɩkplaan 'nyɩ a ‑kʋʋn 'lɛ nɩkplaan 'nyɩ ‑amʋ n ‑kʋ 'lɛ anyɩ nɩkplaan. 21Ɔmɔa ‑ɔ 'plɩlɩ 'lɛ 'na ‑jlɩmaa 'kʋ 'nyɩ ‑ɔ zʋa 'lɛ sa na, ɔmɔ ‑glɩ 'lɛ ɔmɔa ‑ɔ ‑waan 'lɛ na. Ɔmɔa ‑ɔ ‑waan 'lɛ na, n To cɩɔ wabha. ‑Amʋ ‑ma n cɩɔ wabha 'nyɩ n cɩɔ ncɩ pala.»
22Na, Zuda, ‑n 'ta Iskalɩɔtʋ ‑yowlia, yɔɔ 'cla lebhe: «‑Kwlenyɔ, ‑ɔ ‑kaa 'lɛ 'ŋlɩ 'nyɩ ‑n cɩ 'ka 'lɛ anyɩ ‑ncɩ pala 'nyɩ ‑n pala 'ta 'lɛ ‑ncɩ ‑laagɔzɔan bha?» 23‑Ma Zozii yɔɔ 'cla lebhe: «Ɔmɔa ‑ɔ ‑waan 'lɛ na, ɔ cɩ 'na niwɔlɩa 'kʋ 'plɩlɩ 'nyɩ n To cɩɔ wabha. ‑A cɩɔ 'bhlɩ ci 'nyɩ ‑a cɩɔ 'kʋpla. 24‑Ma ɔmɔa ‑ɔ 'taan 'lɛ ‑wa na, ɔ 'plɩlɩ 'ta 'na niwɔlɩa 'kʋ. Wɔlɩ ‑naa 'ta 'na 'wluun ‑naanɩ ‑glɩ, ‑ma ɩ ‑glɩ Toa ‑ɔ lobhuun 'lɛ na, 'la niwɔlɩ.
25Daa n ‑kʋ kaa 'lɛ anyɩ cɩ na, n ya anyɩ wɔlɩ ‑naa solu. 26‑Ma 'kʋcinyɔa ‑ɔ ‑glɩ 'lɛ ‑Kplɔkplɔ ‑Wugoa* Toa cɩ 'ka 'lɛ anyɩ 'na 'ŋlɩa nɩkplaan tlɛlɩ na, ʋmʋ ‑ʋ ‑cɩ 'ka 'lɛ anyɩ wɔlɩa ‑tɛtɛa ca ɩya ʋ 'ka anyɩ wɔlɩa ‑tɛtɛa n solua 'lɛ anyɩ na luoli.
27Pupue n te 'lɛ anyɩ, 'na pupuea n nyɩ 'lɛ anyɩ. N nyɩ 'tɛɛ anyɩ ‑laagɔzɔan 'bhisa. Pɔɔvʋ 'la bhlaa anyɩ, pɔlɛɛn 'la 'wlʋa anyɩ. 28A yaan neen 'nu 'nyɩ n ya 'lɛ 'cla lebhe: N mʋka ‑ma n cɩ 'ka anyɩ sidiin cɔlɔ. A ‑ka ‑amʋa ‑wa na, 'na Toa 'bhlɩ mʋlɩɛa cɩ 'kaa anyɩa ‑pɔpʋɛ nʋ, ‑ofi lebhe Toa ziin 'kʋ na. 29Ka n solu 'lɛ anyɩ wɔlɩ ‑naa 'fɩɔn ɩya ɩ 'ka ŋeni, ɩya daa ɩ cɩ 'ka 'lɛ ŋeni na, a 'kɩɩ ‑nʋawlɛ la. 30N ‑ya anyɩsɔ cɩ 'tanɩ ‑gbɔɔn nyɩtɛ, sa 'wugo ‑nyunyua ‑ʋ ‑kwle 'lɛ ‑laagɔzɔan na, ci 'yɛpɩ. Ʋ 'taan ‑jioli ‑ylɛylɛ 'kʋ ‑kalɩ 'bhlɩmɔɔn, 31‑ma ɩ ‑fata lebhe ‑laagɔzɔan cibhlili sɛɛ lebhe n ‑wa Toa 'nyɩ saa Toa soluun 'lɛ na, sɛɛ n nʋ 'lɛ. A ‑bho 'kʋ, ‑a 'wlʋ ‑da!»
Currently Selected:
Zan 14: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.