Zan 13
13
Zozii ya ɔla gɩlɩnyaa kpli cɩ wɔlʋ
1‑Zeli 'kaa ze ɩya ma 'kaa Zifʋnyaa* 'la geyliinwlʋfɛtlɩa* li, Zozii ya sɛɛ cibhlili lebhe clɩɩa 'kʋa ɔ cɩ 'ka 'lɛ ‑laagɔzɔn ‑naa 'wlʋ ɩya ɔ 'ka Toa cɩ mʋ na, ka ɩ yaa 'lɛ ŋeni. Saa ɔ wabha 'lɛ maa ‑ɔ ‑glɩ 'lɛ ɔ 'nʋa ‑laagɔzɔn ‑naa na, ɔ ya maa wabha ‑aan ɔ ya 'wluko.
2'Ylʋva bhlo, Zozii ‑ya ɔla gɩlɩnyaa* ‑kʋa 'tlɔnblɩ 'kʋ. Gɔzɛ yaa tooto Simɔɔn ‑yowli Zuda Iskalɩɔtʋ, Zozii 'la 'pɛlʋzʋ wɔɔgugwie 'wluun zʋ. 3‑Ma Zozii ‑cia sɛɛ lebhe Laagɔ cɩ ɔ 'wlʋlʋ 'lɛ 'nyɩ Laagɔ cɩ ɔ cɔlɔa 'lɛ. 'Nyɩ ɔ ‑cia ‑awlɛ sɛɛ lebhe Toa yɔɔ lɩɩa ‑tɛtɛa 'la ‑jioli 'nyɩ. 4Ɔ ya nyalitlɔnblɩa cɩ 'kʋbho, ɔ ya ɔla 'wlukʋlokwia nɩkplaan ‑sa, ɔ ya 'tawo 'ma 'nyɩ ɔ ya guoongʋalɩ. 5Ɔ ya 'nyu 'cɛnzɩɩn 'kɔsɔ, ɔ ya ɔla gɩlɩnyaa kpli cɩ wɔlʋlɩɛ bhɔ 'nyɩ ɔ maa 'tawoa ɔ ‑gʋalɩa 'lɛ guoon na 'nyɩ ɔ sɩsɩa 'mɩɩ cɩ.
6Na, ɔ ya Simɔɔn Pɩɛlɩ 'kʋ ŋeni. 'Nyɩ Simɔɔn Pɩɛlɩ yɔɔ neencla lebhe: «‑Kwlenyɔ, ‑n kaan kpli cɩ wɔlʋ bha?» 7‑Ma Zozii yɔɔ neeŋonu lebhe: «Ɩmɩa n nʋ 'lɛ na, ‑n cɩ 'ta ‑pɔtɔnʋ ɩla ‑zɔn 'nu, ‑ma ɩ ‑ka ‑kʋ ‑aan na, ‑n ‑cɩ ka 'nu.» 8Simɔɔn Pɩɛlɩ yɔɔ 'cla lebhe: «‑Wɔɔ, ‑n cɩ 'taan 'pʋpʋkʋ kpli cɩ wɔlʋ!» ‑Ma Zozii yɔɔ 'cla lebhe: «Ɩ ‑ka ‑kʋ lebhe n 'tɔɔ kpli cɩ wɔlʋ na, ‑n 'tanɩ 'naanɔ ‑glɩ.» 9Simɔɔn Pɩɛlɩ yɔɔ 'cla lebhe: «'Dɛndlana, ‑Kwlenyɔ, ‑naa wɔlʋa kplia bhlo ‑tɛɛ cɩ, ‑ma 'maa wɔlʋmʋ 'na ‑kɔgbʋa ɩya 'na 'wlua.» 10‑Ma Zozii yɔɔ 'cla lebhe: «Ɔmɔa ‑ɔ ya 'lɛ budo na, 'ɔ 'matɩ 'tanɩ ‑awlɛ budolɩɛ, ‑ma kpli cɩ ‑tɛɛ ɔ wɔlʋnɩ 'lɛ, sa ɔla ‑lɩɩbhuoa ‑kplɔ na. Na anyɩ ‑ma, a ‑kplɔ, ‑ma 'bhlɩmɔɔn ‑n 'ta anyɩa 'fɩan.» 11Zozii ‑cia ɔmɔa ‑ɔ ‑cɩ kaa 'mɔɔ 'lɛ 'pɛlʋ zʋ na, dɛ ɔ 'cla 'lɛ lebhe: «‑N 'ta anyɩa 'fɩan ‑ɔ 'ta 'lɛ ‑kplɔ.»
12Daa ɔ bhɩalɩ 'lɛ maa kpli cɩ wɔlʋlɩɛ na, ɔ ya ɔla lokwia nɩkplaan ‑pla, ɔ ya 'tlɔnblɩa 'kʋ cɔlɔ 'nyɩ ɔ ya maa 'cla lebhe: «A nu ɩmɩa n wlʋ 'lɛ anyɩ cɩ nʋda na, 'la ‑zɔn bha? 13A laan Canyɔ ɩya ‑Kwlenyɔ 'nyɩ a ‑ka 'ge, sa n ‑glɩɔ. 14‑Ma gbazɩ ‑amʋa ‑ɔ ‑glɩ 'lɛ Canyɔa ɩya ‑Kwlenyɔa, n ‑ka anyɩ kpli cɩ wɔlʋ na, 'dɛndlana anyɩ ‑ma sɛɛ, ɩ ‑fata lebhe a wɔlʋwɔlʋmʋ kpli cɩ. 15Sa nʋnʋgbɩ n pala 'lɛ anyɩ: Ɩmɩa n ya 'lɛ anyɩ cɩ nʋ na, anyɩ ‑ma a nʋmʋɩ. 16N solu anyɩ, ɩ ‑glɩ ‑nʋawlɛ, lobhoco 'ta ɔ to 'kʋzi 'nyɩ lobhulobhunyɔ* 'ta ɔmɔa ‑ɔ lobhuo 'lɛ na 'kʋzi. 17Na, a ‑cinɩ 'lɛ ɩmɩ ‑naa na, a kʋ 'nanɩ, ɩ ‑ka ‑kʋ lebhe a ‑kɩɩ 'kʋ 'plɩlɩ na.
18‑N 'ta anyɩa 'fɩan 'n sa 'ta 'lɛ. N ‑ci maa ‑anʋa n sla 'lɛ de na. ‑Ma ɩ ‑fata lebhe Zieziewɔlɩa* nɩkplaan 'la wɔɔkle ‑naa ‑glalɩ 'kʋ: Ɔmɔa n ‑yɔɔsɔ lili 'lɛ ‑dakɔa bhlo nɩkplaan na, ɔ yaan 'kɔkʋʋn ‑tla. 19Ka n solu 'lɛ anyɩ wɔlɩ ‑naa 'kplookʋ, ɩya ɩ ‑ka ŋeni na, a 'ka ‑danʋfʋɛ li lebhe n ‑kʋ. 20N solu anyɩ, ɩ ‑glɩ ‑nʋawlɛ, ncaatʋtʋʋntʋa ‑ɔ ‑cɩ ka 'lɛ ɔmɔa n lobhu 'lɛ na, 'nanɩ kla na, ‑amʋ ɔ kla 'lɛ 'nanɩ 'nyɩ ncaatʋtʋʋntʋa ‑ɔ klaan 'lɛ 'nanɩ na, ɔmɔa ‑ɔ lobhuun 'lɛ na, ɔmɔ ɔ kla 'lɛ 'nanɩ.»
Zozii nyɩtɛ ɔla 'pɛlʋzʋwɔlɩ
(Mat 26.21-25; Mak 14.18-21; Luk 22.21-23)
21Daa Zozii nyɩtɛ 'lɛ wɔlɩ ‑naa na, ɔ ‑kaa cɩɩnkalɔ 'kadie 'nyɩ ɔ ya 'cla 'kpataa lebhe: «N solu anyɩ, ɩ ‑glɩ ‑nʋawlɛ, anyɩ sidiin bhlo cɩ 'kaan 'pɛlʋzʋ.» 22Daa ɔ nyɩtɛa 'lɛ wɔlɩ ‑naa na, gɩlɩnyaa* kopekopelia 'ciin, ma 'taa nclɔɔa 'titia ɔ saa 'lɛ na ‑ci. 23Gɩlɩnyaa nɩkplaan bhlo, ɔmɔa Zozii ‑waa 'lɛ ‑gbɔɔn na, ‑kʋa 'mɔɔ cɩ. 24Na, Simɔɔn Pɩɛlɩ yɔɔ 'ci 'kpatɩlɩ le ɔ 'claa Zozii neen, ɩya ɔ 'kaa maa nclɔɔa ɔ saa 'lɛ na pala. 25Na, gɩlɩnyɔa* ya Zozii 'wlu cɩ fa 'nyɩ ɔ yɔɔ neencla lebhe: «‑Kwlenyɔ, ncaasaa bha?» 26Zozii yɔɔ neeŋonu lebhe: «Ɔmɔa n cɩ 'ka 'lɛ 'flawuklea n cɩ 'ka 'lɛ nyɩa nɩkplaan 'ŋwa na, 'nyɩnɩ na, ɔmɔ ‑kʋ 'lɛ.» 'Nyɩ Zozii ya 'flawukle 'ma, ɔ yʋʋ 'ŋwa 'nyɩ ɔ yʋʋ Simɔɔn Iskalɩɔtʋ ‑yowli Zuda 'nyɩnɩ. 27Daa Zuda 'ma 'lɛ 'flawuklea ‑jaa na, Sataan* yɔɔ nɩkplaan ble. Na, Zozii yɔɔ 'cla lebhe: «Ɩmɩa ‑n ‑cɩ 'ka 'lɛ nʋ na, 'maa nʋɩ 'faanfan.» 28Maa 'fɩan ‑ɔ ‑kʋa 'lɛ 'tlɔnblɩa 'kʋ na, bhlogbɩɩ 'ta wɔlɩa 'la gbʋa Zozii solua 'mɔɔ 'lɛ ɩmɩ ‑naa na, 'nu. 29Sa Zuda ‑glɩa 'lɛ mala 'dalaa 'la saazʋnyɔ na, ‑anʋa ya gugu lebhe ka Zozii 'claa 'mɔɔ 'lɛ lebhe ɔ mʋa ɩya ɔ 'kaa 'fɛtlɩa 'la lilɩɩ ‑pɩa, ‑aana ɔ 'maa 'dala ɩya ɔ nyɩ ŋaazɩnya. 30Na, daa Zuda 'ma 'lɛ 'flawuklea ‑jaa na, ka ɔ 'wlʋ 'kplookʋ ‑zɔn. 'Tutu yaanɩa pla.
‑Jlɩmaa ‑lele
31Na, daa Zuda 'wlʋ 'lɛ ‑zɔn na, Zozii ya 'cla lebhe: «‑Pɔtɔnʋ Nclɔɔa 'Cʋa* ya 'klʋagba 'lɩ ɩya ncɛlɩ 'kɔɔ nɩkplaan Laagɔ 'la 'klʋagbaa 'lɩlɩ. 32['Nyɩ ma ‑kɔɔ nɩkplaan Laagɔ 'la 'klʋagbaa 'lɩlɩ na], Laagɔ 'titi ‑ma cɩ 'Cʋa 'la 'klʋagbaa pala. 'Nyɩ ɩ cɩ 'tanɩ ‑gwlɛlɩ. 33'Na 'cuonyɩ, clɩɩ ‑klipɛ ‑tɛɛ n cɩ kanɩ 'lɛ anyɩ cɩ li. A cɩ 'kaan 'matɩ. Na, ɩmɩa n solua 'lɛ Zifʋnyaa* na, n solunɩ anyɩ ‑pɔtɔnʋ: Gbazɩa n mʋ 'lɛ na, 'a cɩ 'ta 'yɛpɩ mʋlɩɛ mino. 34‑Jlɩmaa ‑lele n nyɩ 'lɛ anyɩ: A wabhawabhalɩ. A wabhawabhalɩ saa n wabha 'lɛ anyɩ na. 35A ‑ka ‑wawalɩ na, dɛ ncɛlɩa 'fɩan cɩ 'ka 'lɛ cibhlili lebhe a ‑glɩ 'na gɩlɩnya*.»
Zozii nabhe Pɩɛlɩ cɩ 'kɔɔ ‑blɔ
(Mat 26.33-35; Mak 14.29-31; Luk 22.31-34)
36Na, daa Zozii nyɩtɛ 'lɛ wɔlɩ ‑naa na, Simɔɔn Pɩɛlɩ yɔɔ neencla lebhe: «‑Kwlenyɔ, 'ndagbazɩ ‑n mʋa 'lɛ bha?» Zozii yɔɔ neenŋonu lebhe: «Gbazɩa n mʋ 'lɛ na, ‑n cɩ 'ta ‑pɔtɔnʋ mino ɩya ‑n kaan gɩlɩ, ‑ma ɩ ‑ka ‑kʋ ‑aan na, ‑n ‑cɩɩn gɩlɩ.» 37‑Ma Pɩɛlɩ yɔɔ 'cla lebhe: «‑Kwlenyɔ, 'lɩsaa 'la gbʋ 'n cɩ 'tɔɔ 'lɛ ‑pɔtɔnʋ gɩlɩlɩɛ mino bha? N ‑bhɔsʋa le n cɩ ‑naa gbʋ 'ku!» 38‑Ma Zozii yɔɔ 'cla lebhe: «‑N ‑bhɔsʋa ‑zaagbʋsa le ‑n cɩ 'na gbʋ 'ku bha? N soluo, ɩ ‑glɩ ‑nʋawlɛ, 'fɩɔn ɩya ‑gʋgɔ 'ka 'lɛ 'pa na, ‑n cɩ ka dɩ ‑mɔta cɩcɛlɩlɩ lebhe ‑n 'taan ‑ci.»
Currently Selected:
Zan 13: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.