Wlɔ 6

A namʋnɩ 'namʋ ‑lelu

1Na, wɔɔsaa ‑a nabhe ‑a kaa 'lɛ nyɩtɛ bha? Ka ‑a cɩ ka 'lɛ nyinyia nɩkplaan kʋ, ɩya Laagɔ 'la ‑danaanɔa 'ka 'kʋzʋlʋzʋlʋ bha? 2Ɩ 'ta sɛɛ ‑kʋ! ‑Masa, ‑a ya 'ku nyinyi 'la gbazɔ. Na, 'nsasa ‑a ‑cɩ ka ‑awlɩɩ 'lɛ nɩkplaan namʋnʋ bha? 3‑Aana ka a 'ta 'lɛ sɛɛ ‑ci lebhe ‑anyɩa 'fɩan ‑ɔ ‑zʋlʋɔ Zozi Klisi nɩkplaan 'nyu 'wlu na, ɔla 'kwɩa nɩkplaan ‑a ‑zʋlʋɔ 'lɛ 'nyu 'wlu bha? 4Na, ‑a ya 'lɛ ɔla 'kwɩa nɩkplaan 'nyuwluzʋlʋɔ na, ‑a -yɔɔsɔ ya ‑zizieo, ɩya saa Toa 'la 'klʋagbaa -bho 'lɛ Klisi 'kwɩɩn 'kʋ na, ‑anyɩ ‑ma ‑a ka 'namʋ ‑lelu namʋ. 5‑Masa, ɩ ‑ka ‑kʋ lebhe ‑a ‑yɔɔsɔ ya nebhlo 'kulu na, 'dɛndlana ‑a ‑yɔɔsɔ cɩ 'ka nebhlo 'kwɩɩnkʋbholu.

6Na, ‑a 'nu ɩmɩ ‑naa 'nanɩ. ‑Godogodonclɔɔa ‑a ‑glɩa 'lɛ na, ɔya Klisi ma bholʋ 'lɛ nebhlo dabhlalɩsua 'ciin le nyinyinyɛkɛ ‑naa 'ka nyumo, ɩya ‑a 'la kanɩ nyinyi 'la geye 'plɩ. 7Sa ɔmɔa ‑ɔ ya 'lɛ 'ku na, ɔ ya nyinyi 'la geylia nɩkplaan 'wlʋ. 8'Nyɩ ‑aya Klisi ya 'lɛ 'ku na, ‑a ‑ka pɔɔtɛtɛ lebhe ‑a ‑yɔɔsɔ cɩ 'ka kʋ. 9‑Masa ‑a ‑ci sɛɛ lebhe Klisi ya 'lɛ 'kwɩɩnkʋbho na, 'ɔ cɩ 'tanɩ 'ku, ‑ofi lebhe 'kwɩ 'tanɩɔ ‑jioli 'kʋ ‑kalɩ. 10Ɔ ‑glɩ 'lɛ nyinyi 'la gbazɔ na, ɔ ya 'ku -bluu bhlogbɩɩ 'kplookʋ. ‑Ma Laagɔ 'la gbazɔ, ɔla gbʋ ɔ ‑kʋnɩ 'lɛ. 11'Sɛtɛɛ bhlogbɩɩ anyɩ ‑ma, a 'cla acɩ lebhe a ya 'ku, 'nyɩ aya nyinyi ya cɩsasalɩ, 'nyɩ aya Zozi Klisi ‑kʋnɩ 'lɛ Laagɔ 'la gbʋ.

12Na, nyinyi 'la kalɩlɩanɩ ala 'nyɛkɛa ‑ɛ ‑cɩ ka 'lɛ 'ku na ‑jioli 'kʋ le ɩ 'ka gba ɩya a 'ka ɩmɩa ‑ɩ ‑kɛɛ 'lɛ 'tʋ na nʋ. 13A 'la 'ma ala 'nyɛkɛa 'la 'blɩa ɩya a 'la plii wɔlɩa ‑ɩ 'ta 'lɛ 'kʋnylugolu na 'la tavʋlɩɩ, ɩya a 'la lobhoanɩ nyinyi. ‑Ma ‑jajanyaa ‑ɔ ya 'lɛ 'kwɩɩnkʋbho na 'bhisa, a 'ma ala 'nyɛkɛa 'la 'blɩa ɩya a plii 'kʋnylugolulɩɛ 'la tavʋlɩɩ, ɩya a lobho Laagɔ. 14‑Masa, nyinyii cɩ 'tanɩ anyɩ ‑jioli 'kʋ kalɩlɩ, ‑ofi lebhe a 'tanɩ ‑jlɩmaa ‑zɔn ‑kʋ, ‑ma a ‑kʋnɩ Laagɔ 'la dananɔa ‑zɔn.

'Kʋnylugolulɩɛ 'la lobhocuo a ‑glɩnɩ 'lɛ

15Na, wɔɔsaa ‑a nabhe a kaa 'lɛ nyɩtɛ bha? ‑A 'tanɩ 'lɛ ‑jlɩmaa ‑zɔn ‑kʋ, 'nyɩ ‑a ‑kʋnɩ 'lɛ Laagɔ 'la dananɔa ‑zɔn na, ‑a nʋ nyinyi bha? Ɩ 'ta sɛɛ ‑kʋ! 16A 'ta sɛɛ ‑ci lebhe, gbazɩ a ‑ka acɩ nclɔɔ ‑zɔn fa geye 'bhisa, le a 'kɔɔ lobho, ɩya a 'kɔɔ zʋ na, ɔmɔa a zʋ 'lɛ na, ɔla geye a ‑glɩ 'lɛ bha? A cɩ nyinyi, ‑ɩ lamʋ 'lɛ 'kwɩ na 'la geye 'plɩ, ‑aana a cɩ Laagɔ 'la zʋlɩɛa ‑ɩ lamʋ 'lɛ 'kʋnylugolulɩɛ na 'la geye 'plɩ. 17‑Ma ‑a bhɔlʋ Laagɔ! Sa a ‑glɩa nyinyi 'la geye, ‑ma a yanɩ ŋonu, ala pɔlɩa 'ciin, lebhe a cɩ cacawɔlɩa ‑a 'wlalɩ 'lɛ 'kʋ, 'nyɩ a 'nu 'lɛ na 'kʋ 'plɩlɩ. 18Na, Laagɔ ya 'lɛ anyɩ nyinyia 'la geylia nɩkplaan ‑sa na, a yanɩ 'kʋnylugolulɩɛ 'la geye 'plɩ. 19Ncɛlɩ 'bhisa 'kʋ n nyɩtɛ 'lɛ, ‑cɩcɩa a 'ta 'lɛ ‑ka ɩya a 'ka 'lɛ 'faanfan 'nu na ɩla gbʋ. Saa ‑tɛɛa a 'ma 'lɛ acɩ, 'nyɩ geye 'bhisa, a lobhoa 'lɛ nʋnʋgbɩa ‑ɩ 'ta ‑kplɔ ɩya ɩmɩa ‑ɩ 'ta 'lɛ 'kʋnylugolu, 'nyɩ ‑ɩ gba 'lɛ nclɔɔ mʋnʋ 'lɛ Laagɔ gbatlɩ na, a 'manɩ acɩ ‑pɔtɔnʋ, ɩya geye 'bhisa, a lobhonɩ 'kʋnylugolulɩɛ, ‑ɩ lamʋ 'lɛ pɔlɛ 'la ‑kplɔlɩɛ na. 20Sa daa a ‑glɩ kaa 'lɛ nyinyi 'la geye na, aya 'kʋnylugolulɩɛ 'taa wɔlɩ ‑kalɩ. 21Na, 'caa ‑anasaa a tluanɩa 'lɛ bha? Nʋnʋgbɩa ‑ɩ ‑kanɩ 'lɛ anyɩ ‑pɔtɔnʋ ‑zo na, ɩla caa a tlʋa 'lɛ, 'nyɩ ɩla 'wlukodaa ‑ɩ ‑glɩ 'lɛ 'kwɩ. 22‑Ma ‑pɔtɔnʋ, a ya 'lɛ nyinyia 'la geylia nɩkplaan 'wlʋ, 'nyɩ a yanɩ 'lɛ Laagɔ 'la geye 'plɩ na, ‑kplɔlɩɛ 'la caa a tlʋnɩ 'lɛ, 'nyɩ ala 'wlukodaa ‑glɩ 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 23Sa, nyinyi 'la dluuplʋlɩɛ ‑ɩ ‑glɩ 'lɛ 'kwɩ, ‑ma lʋʋa Laagɔ 'la 'nyɩ 'lɛ ‑anyɩ 'kpɔkpɔ na, ʋmʋ ‑ʋ ‑glɩ 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, 'nyɩ ‑ala ‑Kwlenyɔ Zozi Klisi nɩkplaan ‑a 'lɩlɩʋ 'lɛ.

Currently Selected:

Wlɔ 6: NTLD13

Highlight

Copy