Ziz 9

‑Ngbi ‑lɛglɛa ya gba

1‑Ngbi ‑bhlaandleea* ya ɔla lɛglɛa bholi, 'nyɩ n ya ‑zolie 'lɩ, ɛ ya ‑laagɔɔn 'wlʋ, ɛ ya ‑dʋdʋa 'kʋ bhli 'nyɩ ma yɛɛ 'bhukua ‑ʋ 'ta 'lɛ 'wlukoda -ka na 'la 'safɛa 'nyɩnɩ. 2‑Zoliea ya 'bhukua ‑ʋ 'ta 'lɛ 'wlukoda ‑ka na nesa 'nyɩ gbacʋ yʋʋ nɩkplaan 'wlʋ 'nyɩ ʋ ya ‑gblaa, le gbacʋa ‑ʋ wlʋ 'lɛ ‑gbaatʋ 'kadie nɩkplaan na 'bhisa. Ʋ ya 'ylʋbhuoa ɩya daa 'tutu ‑pla. 3'Nyɩ 'kuolɛglɩbholinya ya gbacʋa nɩkplaan 'wlʋlʋ 'nyɩ ɩ ya ‑dʋdʋa 'kʋ dlolu. Ma yɩɩ 'tɛtɩ bhlo 'nyɩ le ‑dʋdʋa 'kʋ 'la ‑laagangbitia 'nɩa 'bhisa. 4Ma yɩɩ tie le ɩ 'la nʋa ‑dʋdʋa 'kʋ 'la ‑pitia lʋʋ bhlogbɩɩ naa, ɩ 'la nʋa gologololʋʋ ‑ylɛylɛ lʋʋ naa, ɩ 'la nʋa su bhlogbɩɩ lʋʋ, ‑ma ɩ ŋeni ncɛlɩa ‑ma 'ta Laagɔ 'la 'kukuunkpoa 'kʋtaan ‑ka na ‑tɛɛ.

5‑Jioli yɩɩ ‑nyɩɔ, ‑n 'ta le ɩ 'bhla maa, ‑ma ɩ ‑saa maa gbaylɩ ‑aan 'cɩ ‑ngbi. Ɩla gbaylɩsalɩɛa ‑kʋ le gbaylɩa ‑ɩ sa 'lɛ nclɔɔa ‑laagangbite ya 'lɛ mli na 'bhisa. 6'Dɛ 'la clɩɩa nɩkplaan ncɛlɩ cɩ 'ka 'kwɩ 'matɩ, ‑ma maa cɩ 'tɛɛ 'lɩ. Ma cɩ 'ka wabha le ma 'ka 'ku, ‑ma 'kwɩ cɩ 'ka maa 'gulu.

7Ka 'kuolɛglɩbholinyaa ‑kʋ 'lɛ le ‑kpangwɩa ma ya 'lɛ tʋ 'la gbʋ bhɔsʋa na, 'bhisa. Ɩla 'wlia ‑ka 'lɛ lɩɩ le ‑asɩkɛkpoonkpu 'bhisa 'nyɩ ɩla 'kwlɩa ‑kʋ 'lɛ le ncaakwlɩ. 8Ɩ ‑kaa 'nyɩ le 'ŋwlɛ 'la 'nyɩ 'bhisa 'nyɩ ɩla ‑glaa ‑kʋa 'lɛ le ‑bhedi 'la ‑glaa 'bhisa. 9Ɩla dinea ‑kʋa le saa ɩ ‑pla 'lɛ letiejanpa nɩkplaan na 'nyɩ ɩla ‑papua 'la gbɛtɛlɩɛa ‑kʋ 'lɛ le tavʋgɔlɩa ‑kpangwɩ jli 'lɛ 'nyɩ ɩ mʋ 'lɛ tʋ 'kʋ na 'bhisa. 10Ɩ ‑kaa ‑gwi ɩya 'mɛnɛ 'kʋ 'la pʋɛ le ‑laagangbiti 'la ‑gwi 'bhisa. 'Nyɩ ɩla ‑gwia nɩkplaan, 'yɛpɩ ɩla 'cɩa ‑ngbia nɩkplaan 'la ncɛlɩ gbaylɩsatɛtɩa ‑kʋ 'lɛ. 11Ɩ ‑ka nyɩbhɛlʋ bhlo, ‑ɔ ‑klwii 'lɛ na, ɔmɔ ‑ɔ ‑glɩ 'lɛ gbaylɩsabhukua nɩkplaan 'la 'bhlaandleea ma la 'lɛ Ebleewɔlɩɩn Abadɔɔn 'nyɩ Glɛkɩwɔlɩɩn, ma la 'lɛ Apolion na.

12‑Bɛkakwlɩbhɩa ya 'plɩ. ‑Ma 'kwlɩbhɩɛ 'la 'ci ‑mɔsɔ ci ‑awlɛ 'yɛpɩ leen.

‑Ngbʋflʋ ‑lɛglɛa ya gba

13‑Ngbʋflʋ ‑bhlaandleea* ya ɔla lɛglɛa bholi, 'nyɩ n ya ‑blɩɩzɔn bhlo 'nu, ʋ 'wlʋlʋ ‑asɩkɛgbatɩa ‑ɛ ‑kʋ 'lɛ Laagɔ ‑deliin na, 'la ‑kotia ‑nmɔɔnaa nɩkplaan. 14Ʋ ya ‑ngbʋflʋ ‑bhlaandleea ‑ɔ ‑kaa 'lɛ lɛglɛa wlɩɩn na, 'claa lebhe: «‑Blulu 'bhlaandleecɩa ‑nmɔɔnaa ‑ɔ ‑gʋalɩɔ 'lɛ Eflatɩnyidɔlʋ 'kadiea 'kʋ na.» 15Ma ya 'bhlaandleecɩa ‑nmɔɔnaa ‑blulu. 'Dɛ 'la 'ŋwacɩa, clɩɩa, 'cʋa, ɩya lio 'la gbʋa ma ‑bhɔsʋɔa 'lɛ le ma 'kaa ‑laagɔzɔnkʋnyaa 'la ‑mɔta cea 'bhla na, nɩkplaan. 16Mala tavʋkandea 'la 'sojaa ‑ɔ ‑kʋa 'lɛ ‑kpangwɩa 'kʋ na, ‑glɩa ncaatabhliwli ‑mɔsɔ mala ‑tabhlu ‑gwlɩɩ ‑ngbi (200 000 000). 17'Lɩka saa ‑kpangwɩa ɩya ɩla 'kʋgbɛnyaa n 'lɩa 'lɛ na ‑kʋkʋlʋa 'lɛ na: Ma ‑plaa mlakujanpʋ nɩkplaan, ɩ ‑zaa le ‑kosu, ‑anɩ ‑kʋa ‑galɩgalɩ 'nyɩ ‑anɩ ‑glɩa 'lɛ pumu. ‑Kpangwɩa 'la 'wlia ‑kʋa le ‑bhediwli 'nyɩ ‑kosu, gbacʋ ɩya pipi slo wlʋa 'mɩɩ 'lɛ neen. 18'Bhlabhlalɩɩ ‑naa ‑mɔtaa ‑ɩ ‑glɩ 'lɛ ‑kosua, gbacʋa ɩya pipi sloa ‑ɩ wlʋa 'lɛ ‑kpangwɩa neen na, ɩ ya ‑laagɔzɔan 'la ncɛlɩa 'la ‑mɔta cea 'bhla. 19‑Kpangwɩa 'la nia ɩya ɩla ‑gwia nɩkplaan ɩla 'tɛtɩa ‑kʋa 'lɛ. Sa, ka ɩla ‑gwia ‑kʋa 'lɛ le tla, ɩ ‑ka 'wli 'nyɩ ɩla 'wlia ɩ ma 'lɛ 'nyɩ ɩ bhla 'lɛ.

20‑Ɔ ‑glɩ 'lɛ ncɛlɩa ‑ɔ ‑to 'lɛ na, maa 'bhlabhlalɩɩa 'ta 'lɛ 'bhlamʋ na, ma 'ta kwlacala ɩya ma 'ka mala wlɩɩn 'la nʋnlɩɩa bɩ 'kʋ 'wlʋ. ‑Ma ya 'devlowugwia ɩya ‑zliia ma 'ma 'lɛ ‑asɩkɛ ‑aana 'dala 'pɔpʋa, 'dlɛ, cɔkʋ ‑aana si 'nyɩ ma ya 'lɛ nʋ, ‑ɩ 'ta 'lɛ ‑jlɛ, ‑ɩ 'nu 'ta 'lɛ 'nyɩ ‑ɩ namʋ 'ta 'lɛ na, ɩla gʋgwlɛa 'cingɩ. 21Ma 'ta mala ncaabhlalɩɛa, mala gɔzɛa, mala ‑badaaglua ɩya mala 'wia bɩ 'kʋ 'wlʋ.

Currently Selected:

Ziz 9: NTLD13

Highlight

Copy

Compare