Ziz 7

Laagɔ cɩ 'ka ɔla 'lɔlʋa 'klʋlɩ

1Ɩmɩ ‑naa 'la leen, n ya 'bhlaandleecɩ* ‑nmɔɔna 'lɩ, ma 'nylugoa ‑dʋdʋa 'la ‑kotia ‑nmɔɔnaa nɩkplaan. Ma yaa ‑pupolua ‑ʋ 'wlʋlʋ 'lɛ ‑dʋdʋa 'kʋ 'la ‑kotia ‑nmɔɔnaa nɩkplaan na 'nylugolu ɩya ‑pupolu ‑ylɛylɛ 'la 'ka ‑dʋdʋa 'kʋ, gea 'kʋ ɩya su bhlogbɩɩ 'wlu pu. 2'Nyɩ n ya ‑awlɛ 'lɛ ‑daa 'bhlaandlee bhlo 'lɩ, ɔ 'wlʋlʋa gbazɩa 'ylʋbhuoa bholu 'lɛ 'kʋ na. Ɔ ‑kaa kʋkʋ Laagɔa 'la 'kukuunkpoa wlɩɩn. Ɔ ya nɩkplaan ‑gaa 'nyɩ ɔ ya 'bhlaandleecɩa ‑nmɔɔnaa ma 'nyɩa 'lɛ 'tɛtɩ le ‑ɔ nyumo ‑dʋdʋa ɩya gea na, 'cla lebhe: 3«A 'la nyumoa ka ka ‑dʋdʋa, gea ɩya sia ‑aan ɩya ‑a ka ‑ala Laagɔ 'la lobhocuoa ɔla 'kukuunkpoa 'kʋtaan mɛ 'fɩɔn.» 4Ma yaan maa ma mɛa 'lɛ 'kukuunkpoa 'kʋtaan na 'la nea pala. Ma ‑glɩ ncaatabhliwli ‑gwlɩɩ ‑ngbɔɔsɔ ɩya ‑tabhli ‑nmɔɔna (144 000), Izlayɛlɩbhlɩa* 'la 'lɔkpʋa ‑tɛtɛa 'kʋ.

5Zuda 'la 'lɔkpaa 'kʋ, ncaatabhliwli 'kʋgba ‑mɔsɔ (12 000).

Lubɛnɩ 'la 'lɔkpaa 'kʋ, ncaatabhliwli 'kʋgba ‑mɔsɔ,

Gadɩ 'la 'lɔkpaa 'kʋ, ncaatabhliwli 'kʋgba ‑mɔsɔ,

6Azɛɛ 'la 'lɔkpaa 'kʋ, ncaatabhliwli 'kʋgba ‑mɔsɔ,

Nɛftalii 'la 'lɔkpaa 'kʋ, ncaatabhliwli 'kʋgba ‑mɔsɔ,

Manasee 'la 'lɔkpaa 'kʋ, ncaatabhliwli 'kʋgba ‑mɔsɔ,

7Simeyɔɔn 'la 'lɔkpaa 'kʋ ncaatabhliwli 'kʋgba ‑mɔsɔ,

Levii 'la 'lɔkpaa 'kʋ, ncaatabhliwli 'kʋgba ‑mɔsɔ,

Isakalɩ 'la 'lɔkpaa 'kʋ, ncaatabhliwli 'kʋgba ‑mɔsɔ,

8Zabilɔɔn 'la 'lɔkpaa 'kʋ, ncaatabhliwli 'kʋgba ‑mɔsɔ,

Zozɛfʋ 'la 'lɔkpaa 'kʋ ncaatabhliwli 'kʋgba ‑mɔsɔ,

ɩya Bɛnzamɛɛn 'la 'lɔkpaa 'kʋ, ncaatabhliwli 'kʋgba ‑mɔsɔ.

‑Alawlee 'kadie ‑kʋ ‑kwlekpoa -deliin

9Ɩmɩ ‑naa 'la leen, n ya ncaabhutukpaa nclɔɔ ‑ylɛylɛ cɩ 'ta 'lɛ zelɩlɩɛ mino na 'lɩ. Ma ‑glɩa 'bhlɩ 'bhlɩ, 'lɔkpʋ 'lɔkpʋ ɩya 'lɔlɩ 'lɔlɩ 'la ncɛlɩ ɩya ‑goje ‑goje 'la nyɩtɛnya. Ma 'nylugoa ‑kwlekpoa ‑deliin, 'bhlabhlɩcoa 'ci 'kʋ, ma ‑plaa janbʋ 'pɔpɩ nɩkplaan 'nyɩ ma ‑kaa 'lɛ ‑gbedi wlɩɩn. 10Ma ‑gaa nɩkplaan 'nyɩ ma claa lebhe: «‑Ala Laagɔ ‑ɔ ‑kʋ 'lɛ ‑kwlekpoa 'kʋ sa na ɩya 'bhlabhlɩcoa, maa ‑ɔ nɩnɩ 'lɛ gbʋʋnsalɩɛ.» 11'Nyɩ 'bhlaandleecɩa* ‑tɛtɛa ‑ɔ ‑didioa 'lɛ ‑kwlekpoa na, ncaakpasɩa ɩya mlaa ‑nmɔɔnaa, slaa 'lɛ ‑kukoonkplii sa 'nyɩ ma gʋgwlaa 'lɛ Laagɔ. 12Ma claa lebhe: «Ɩ kʋ sɛɛ! ‑Evliwolɩɛ, 'klʋagba, dɩgalɩ, bhɔlʋɛ, 'ŋwleenfalɩlɩɛ, ‑kwlelie ɩya 'tɛtɩ ‑glɩ ‑ala Laagɔ 'la da 'lʋkʋlʋkʋ ɩya 'lʋkʋlʋkʋ! Ɩ kʋ sɛɛ!»

13Ncaakpasɩa, bhlo ya wɔɔnyɩtʋ 'ma, 'nyɩ ɔ yaan neencla lebhe: «Ncɛlɩa ‑ɔ -pla 'lɛ 'janpʋ 'pɔpɩa nɩkplaan na, ncaasaacɩ ma ‑glɩa 'lɛ, 'nyɩ 'ndagbazɩ ma 'wlʋlʋa 'lɛ bha?» 14N yɔɔ neenŋonu lebhe: «'Na ‑Kwlenyɔ, ‑mɔɔ ‑cii 'lɛ.» Ɔ yaan 'cla lebhe: «Gbaylɩsalɩɛ 'kadiea nɩkplaan ma 'wlʋ 'lɛ. Ma ya mala 'janpʋa wɔlʋ 'nyɩ ma yɩɩ 'lɛ 'bhlabhlɩcoa 'la ‑dolua nɩkplaan pubhalɩ. 15Ɩla gbʋ dɛ ma ‑kʋ 'lɛ Laagɔ 'la ‑kwlekpoa ‑deliin 'nyɩ ma gʋgwlɔ 'lɛ zezezeliin ɩya bhlibhliylʋʋn ɔla Laagɔpaakadiea ‑zɔn. Ɔmɔa ‑ɔ ‑kʋ 'lɛ ‑kwlekpoa 'kʋ sa na, cɩ 'ka maa 'klʋlɩ. 16Ŋɔmʋ cɩ 'tanɩ maa 'bhla, 'nyutʋ cɩ 'tanɩ maa 'bhla, 'ylʋ cɩ 'tanɩ maa 'bhla, ʋla woowoa cɩ 'tanɩ maa kla, 17sa 'bhlabhlɩcoa, ‑ɔ ‑kʋ 'lɛ ‑kwlekpoa sidiin na, cɩ 'ka mala kpanyɔ 'plɩ, ɔ cɩ 'ka maa jabhʋa 'la 'nyukobhia cɩ fa ɩya Laagɔ 'ka mala 'ciin 'la 'mɩɔa ‑tɛtɛa sɩsɩɛ.»

Currently Selected:

Ziz 7: NTLD13

Highlight

Copy

Compare