Ziz 4
4
‑Laagɔɔn 'la gʋgwlɛ
1Ɩmɩ ‑naa 'la leen, n ya ‑awlɛ ‑buun -wɔlɩ bhlo 'lɩ: Gbine bhlo ‑kalɩɔa ‑laagɔa nɩkplaan. 'Nyɩ ‑bɛka ‑blɩɩzɔan, n 'nua 'lɛ, ‑ʋ nyɩtɛa 'lɛ le saa lɛglɛ gba 'lɛ, 'nyɩ ‑ʋ solua ‑amʋa 'lɛ na, yaan 'cla lebhe: «'Tɔ ‑da ɩya n 'kɔɔ ɩmɩa ‑ɩ ‑cɩ ka 'lɛ ‑anɩ ‑naa 'la leen ci na, pala.» 2'Kplookʋ 'Wugoa yaan 'ma. 'Nyɩ 'lɩka, nyɩbhɛlɩkpo bhlo ‑kʋa ‑laagɔa nɩkplaan 'nyɩ nclɔɔ bhlo ‑kʋa 'maa 'kʋ sa. 3Ɔmɔa ‑ɔ ‑kʋa 'maa 'lɛ 'kʋ sa na, ɔla ‑lɩɩbhuoa lea le saa cɔkʋa ma la 'lɛ zasɩpʋ ɩya ‑salɩdʋanɩ na ‑kʋ 'lɛ na. 'Klʋagbaa ‑a ‑didioa 'lɛ ‑kwlekpoa, ‑laagɔzadlɛ 'bhisa na, 'la 'jɩa ‑kʋa le cokwiea ma la 'lɛ ‑emelodʋ na.
4‑Kwlekpu ‑glʋʋ ɩya ‑nmɔɔna ‑didioa ‑kwlekpoa. 'Nyɩ ‑kwlekpu ‑naa, ncaakpasɩ ‑glʋʋ ɩya ‑nmɔɔna ‑kʋa 'mɩɩ 'lɛ 'kʋ sa. Ma plaa loku 'pɔpʋ nɩkplaan 'nyɩ ma ‑zʋa 'lɛ ‑asɩkɛkpoonkpu 'wlu. 5‑Kosuzadlɛ, 'kasɛ ɩya ‑laagɔzladlɛ 'wlʋlʋa nyɩbhɛlɩkpoa 'kʋ. Ylɩ ‑ngbɔɔsɔ bhua ‑kwlekpoa 'kʋklʋʋn. Laagɔ 'la 'wugwia ‑ngbɔɔsɔa ɩ ‑glɩ 'lɛ. 6‑Kwlekpoa 'la 'kʋklʋan ‑kʋa le saa gea ‑ɛ ‑kplɔ 'lɛ wɩaan na ‑kʋ 'lɛ na. Mla ‑nmɔɔna, 'ci 'cɩlɩɔ 'lɛ 'kʋ na, ‑didioa ‑kwlekpoa 'nyɩ a ‑kʋɩ 'lɛ sidiin. 7‑Bɛka mlɛa ‑kʋa le ‑bhedi, ‑mɔsɔ ‑naanɛa ‑kʋa le bhliiŋodico, ‑mɔta ‑naanɛa ‑kaa ncaaklʋ 'nyɩ ‑nmɔɔna ‑naanɛa ‑kʋa 'lɛ le kɩkɛa ‑ɛ 'plɩlɩ 'lɛ ‑taateen na. 8Mlaa ‑nmɔɔnaa, mlɛ mlɛ ‑kaa ‑papu ‑ngbʋflʋ 'nyɩ 'ci 'cɩlɩa 'lɛ ɩla ‑papua 'kʋ, ‑anɩ ‑kʋ ‑zɔn 'nyɩ ‑anɩ ‑kʋ 'lɛ 'kʋtaan. Zezezeliin ɩya bhlibhliylʋʋn ka ‑tɛɛ ɩ nyɩtɛ 'lɛ 'nyɩ ɩ cla 'lɛ lebhe:
«Ɔ ‑kplɔ, ɔ ‑kplɔ, ɔ ‑kplɔ,
‑Kwlenyɔ, 'tɛtɩa 'fɩan 'la Laagɔa,
ɔ ‑glɩ ɔmɔa ‑ɔ ‑kʋa 'lɛ,
‑ɔ ‑kʋ 'lɛ 'nyɩ
‑ɔ cɩ ka 'lɛ ci na!»
9Na, mlaa ‑ka ‑azla ɔmɔa ‑ɔ ‑kʋ 'lɛ ‑kwlekpoa 'kʋ 'nyɩ ‑ɔ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, 'klʋgbada, ‑evliwoda ɩya bhɔlʋda ‑kʋ na, 10ka ncaakpasɩa ‑glʋʋ ɩya ‑nmɔɔnaa slaa 'lɛ ɔmɔa ‑ɔ ‑kʋ 'lɛ ‑kwlekpoa 'kʋ na ‑kukoonkplii ‑deliin sa, ma gʋgwlaa 'lɛ ɔmɔa ‑ɔ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ma paa 'lɛ mala ‑asɩkɛkpoonkpua ‑kwlekpoa ‑deliin 'nyɩ ma cla 'lɛ lebhe:
11«‑Kwlenyɔ, ‑ala Laagɔ,
‑n ‑ya 'klʋagba, 'ŋwleenfalɩlɩɛ ɩya 'tɛtɩ ‑fata,
sa ‑mɔ nʋ 'lɛ lɩɩa ‑tɛtɛa.
‑N ya wabha le ɩ kʋ 'nyɩ ɩ ya 'lɛ ‑nʋɔ.»
Currently Selected:
Ziz 4: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
