Ziz 2

Efɛzɩdua 'kʋ 'la ‑laagɔnɩkplaa 'la ‑afluwa

1Zie Efɛzɩdua 'kʋ 'la -laagɔnɩkplaa 'la 'bhlaandleea* ɩya ‑n 'clɔɔ lebhe: 'Lɩka saa ɔmɔa ‑ɔ ‑ka 'lɛ ‑zɔlʋa ‑ngbɔɔsɔa ɔla 'lipasɔsɔa nɩkplaan, 'nyɩ ɔ namʋnʋ 'lɛ ‑asɩkɛ ‑buziigɩlɩɩa ‑ngbɔɔsɔa sidiin na, nyɩtɛ 'lɛ na: 2N ‑ci ‑naa nʋnʋgbɩa, ‑naa sɛsʋa ɩya ‑naa pɔɔklalɩɛa. 'Nyɩ ‑n ‑ci lebhe ‑n mino 'ta ɩya ‑n ‑ya ‑abhɔlɛnya 'ka 'kʋkʋkʋlʋ. ‑N ‑ya maa ‑ɔ la 'lɛ macɩ lobhulobhunya* 'nyɩ ‑ɔ 'ta 'lɛ maa ‑glɩ ‑ma na 'gbuzu ‑zɔn 'pa 'nyɩ ‑n ya 'lɩ lebhe ma ‑glɩ yodizʋnya. 3‑N ‑ci pɔɔklasa: ‑N ya 'na 'ŋlɩa 'la gbʋ sɛ 'nyɩ 'nyɛkɛ 'tɔɔ 'kɔtɔ. 4‑Ma, ‑n ‑ka wɔlɩ bhlo, ɩ 'taan 'tʋ ‑ka. Ɩmɩ ‑ɩ ‑glɩ 'lɛ lebhe: ‑N 'tanɩɩn ‑wa le saa ‑n ‑wa ‑amʋa 'lɛ ‑bɛkadaa na. 5Na 'maa luoli daa ‑n 'wlʋlʋ 'lɛ 'nyɩ ‑n ya 'lɛ bhli na! Cala kwla ɩya ‑n nʋ ‑naa ‑godogodo -nʋnʋgbɩa. ‑N 'ta sɛɛ na, n cɩ 'kɔɔ 'bhlɩ ci ɩya n 'ka ‑naa ‑buziigɩlʋʋa ʋla daa ‑sa. 6‑Ma, cee ‑naa 'kʋ, n ‑yɔɔsɔ ‑plɔ. ‑Amʋ 'bhisa, Nikolaa 'la ‑kandinyaa#2.6 Nikolaa 'la ‑kandinyaa ‑glɩ ncɛlɩa ‑ɔla cacawɔlɩa mʋnʋ 'lɛ Dɩnanɩa gbatlɩ na. Ma ca ncɛlɩ lebhe ma cɩ mino ma cɩ ‑badaaglu li. 'la nʋnʋgbɩa 'tɔɔ 'tʋ ‑ka. 7Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ -laagɔnɩkplaa 'la -kandia na. Ɔmɔa ‑ɔ -cɩ ka 'lɛ ‑sɩa na, n cɩ 'kɔɔ jabhʋa 'la sua ‑ʋ ‑kʋ 'lɛ Laagɔ 'la 'kɔkuoa nɩkplaan na 'la 'caa lida 'nyɩ.»

Siminidua 'kʋ 'la ‑laagɔnɩkplaa 'la ‑afluwa

8Zie Siminidua 'kʋ 'la ‑laagɔnɩkplaa 'la 'bhlaandleea* ɩya ‑n 'clɔɔ lebhe: 'Lɩka saa ɔmɔa ‑ɔ ‑glɩ 'lɛ ‑bɛka -naanɔa ɩya bhɩalɩ -naanɔa, ‑ɔ 'ku 'lɛ 'nyɩ ‑ɔ ‑bho 'lɛ 'kwɩɩn 'kʋ na, nyɩtɛ 'lɛ na: 9N ‑ci ‑naa sɛsʋa ɩya ‑naa ŋaazɩa, 'bhlɩmɔɔn ‑n ‑lio 'bhɛlɩ! N ‑ci wɔɔnyinyia maa ‑ɔ la 'lɛ macɩ Zifʋnya* 'nyɩ ‑ɔ 'ta 'lɛ maa ‑glɩ ‑ma na, nyɩtɛlɩɔ 'lɛ cɩ na. Sataan* 'la ‑kandinya ma ‑glɩ 'lɛ! 10'Kwlɩa ‑ɩ ‑cɩ kɔɔ 'lɛ bhɩa na, 'la ŋanɔ 'la 'bhlɔɔ. 'Lɩka, gɔzɛ cɩ 'ka ala sidiin 'la ncɛlɩ ‑palʋʋn 'pa, le ɛ 'ka anyɩ gbɩɩncla ɩya 'kwlɩ 'ka anyɩ bhɩa ‑aan clɩɩ 'kʋgba. ‑Ma kalɩ 'na pɔɔtɛtɛ ‑aan ‑naa 'kuda ɩya n 'ka jabhʋa 'ma n 'kɔɔ dlu ‑plʋ. 11Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ ‑laagɔnɩkplaa 'la -kandia na. Ɔmɔa ‑ɔ ‑cɩ ka 'lɛ ‑sɩa na, ɔ cɩ 'ta ‑mɔsɔkwɩa 'ku.

Pɛlɩgamʋdua 'kʋ 'la ‑laagɔnɩkplaa 'la ‑afluwa

12Zie Pɛlɩgamʋdua 'kʋ 'la -laagɔnɩkplaa 'la 'bhlaandleea* ɩya ‑n 'clɔɔ lebhe: 'Lɩka 'saa ɔmɔa ‑ɔ ‑ka 'lɛ ‑baandua ‑ʋla nia ‑mɔsɔa nɛ 'lɛ na, nyɩtɛ 'lɛ na: 13N ‑ci ‑naa sakʋdaa da. Dɩpɩa Sataan* 'la ‑kwlekpoa ‑kʋ 'lɛ. ‑Ma ‑mɔ, ‑n ‑kʋlʋ ka ‑azla 'na 'ŋlɩa nɩkplaan, 'nyɩ Antipasɩ#2.13 Antipasɩ ‑naa, 'ta nyɩbhɛlʋ Ewlɔdʋ Antipasɩ ‑glɩ, ‑ma ɔ ‑glɩ nclɔɔa ma bhla 'lɛ, ɔla pɔɔtɛtɛa ɔ zʋ 'lɛ Zozi Klisi 'kʋ na, 'la gbʋ na. 'na ‑gɩga ‑danʋfʋɛlɩnyɔa ma 'bhlalɩwa 'lɛ a 'bhlɩdua nɩkplaan, daa Sataan 'la sakʋdaa ‑kʋ 'lɛ na, 'la 'bhlɛsʋa nɩkplaan 'titio, ‑n 'ta pɔɔtɛtɛa ‑n ‑zʋɔ 'lɛ 'kʋ na ‑blɔ. 14‑Ma ‑n ‑ka wɔɔcɩ ‑zlʋsaasa, ‑ɩ 'taan 'lɛ 'tʋ ‑ka na, ɩmɩ ‑ɩ ‑glɩ lebhe: N ‑ka 'yɛpɩ ncɛlɩ ‑ɔ gɩlɩ 'lɛ Balamʋ 'la cacawɔlɩa na. Balamʋ ‑naa ‑ɔ caa 'lɛ Balakɩ saa ɔ cɩ 'kaa 'lɛ Izlayɛlɩcuoa* 'gbuzu ‑zɔn 'papalɩ ɩya ɔ 'ka gba ma 'kaa ‑zliigʋgwlamla li ɩya ma 'kaa ‑badaaglu li na. 15‑Anʋa ‑kʋa ‑awlɛɔ 'yɛpɩ 'bhlɩ ‑ɔ gɩlɩ Nikola 'la ‑kandinyaa 'la cacawɔlɩa na. 16Na, 'maa calakwla. ‑N 'ta sɛɛ na, n cio 'yɛpɩ 'bhlɩ, clɩɩ ‑klipɛ nɩkplaan ɩya n 'ka 'na neen 'la ‑baandua 'ma ɩya n -ya maasɔ 'ka tʋ vʋ. 17Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ -laagɔnɩkplaa 'la -kandia na. Ɔmɔa ‑ɔ -cɩ ka 'lɛ ‑sɩa na, n cɩ 'kɔɔ ‑laagɔɔn 'la nyɩa ‑ɩ ‑zizieo 'lɛ na 'nyɩ ɩya n 'kɔɔ cokwie 'pɔpʋɛ, 'ŋlɩ ‑leli ‑zieo 'lɛ 'kʋ na 'nyɩ. Nclɔɔ bhlogbɩɩ 'tɩɩ ‑ci ‑n 'ta le ɔmɔa ‑tɛɛa ma nyɩɛ 'lɛ naa.

Tiatilidua 'kʋ 'la ‑laagɔnɩkplaa 'la ‑afluwa

18Zie Tiatilidua 'kʋ 'la -laagɔnɩkplaa 'la 'bhlaandleea* ɩya n 'clɔɔ lebhe: 'Lɩka saa Laagɔ 'la 'Cʋa, ɔmɔa ɔla 'cia ‑kʋ 'lɛ le ‑kosugbagbalu 'nyɩ ɔla bhɩa ‑kʋ 'lɛ le 'pɛlʋtɛtʋ ‑jawie na, nyɩtɛ 'lɛ na: 19N ‑ci ‑naa nʋnʋgbɩa, ‑naa ‑walʋa, ‑naa pɔɔtɛtɛa, ‑naa lobholia ɩya ‑naa pɔɔklalɩɛa. ‑Naa leenbhɩalɩ ‑lobholia ‑zu 'nyɩ ɩ zi ‑bɛka -naanɩa 'kʋ.

20‑Ma ɩmɩa ‑ɩ 'taan 'lɛ 'tʋ ‑ka ‑naa gbazɔ na, ɩmɩ ‑ɩ ‑glɩ lebhe: -N te Zezabɛlɩ#2.20 Zezabɛlɩ ‑glɩa Izlayɛlɩnyaa 'la nyɩbhɛlʋa ma laa 'lɛ Akabʋ na, ɔ nʋŋlɔ. Ɔ mʋnʋa Laagɔ 'la gʋgwlɛa gbatlɩ, 'nyɩ ɔ gba 'lɛ ma bhla 'lɛ Laagɔnekʋnyɩtɛnyaa, sa ɔ ‑glɩa ‑zliigʋgwlaŋlɔ 'kadie na. ne, 'ŋlɔ ‑naa ‑ɔ la 'lɛ ɔcɩ Laagɔnekʋnyɩtɛŋlɔ*, 'nyɩ ɔ 'nyiglili 'lɛ 'na lobhocuoa 'nyɩ ɔ ca 'lɛ maa ‑badaaglu ɩya ‑zliigʋgwlamla 'la lilie na. 21N yɔɔ clɩɩ 'nyɩ le ɔ 'ka kwlacala, ‑ma ɔ 'ta ‑wa le ɔ 'ka ɔla ‑badaaglua bɩ 'kʋ 'wlʋ. 22'Lɩka, ‑ɩ ‑ka ‑kʋ le ma 'ta ɔla nʋnʋgbɩa bɩ 'kʋ 'wlʋ na, n cɩ 'ka ɔya maa ‑ɔ li 'lɛ ‑badaaglua na 'kusi 'kʋ pʋa ɩya 'kwlɩkadɩ 'ka maa bhɩa. 23N cɩ 'ka ɔla 'cuoa 'bhla ɩya -laagɔnɩkplaa 'la -kandia 'fɩan 'ka sɛɛ cibhlili lebhe ‑amʋ ‑ɔ ‑glɩ 'lɛ ɔmɔa ‑ɔ ‑ci 'lɛ ncɛlɩ 'la wɔɔgugwie ɩya ɩmɩa ‑ɩ ‑kʋ 'lɛ maa pɔlɛɛn na. N cɩ 'ka nclɔɔ nclɔɔ ɔla nʋnʋgbɩa 'la dluuplʋlɩɛa 'nyɩ.

24‑Ma anyɩa ‑ɔ ‑kʋ 'lɛ Tiatilidua nɩkplaan, ‑ɔ 'ta 'lɛ cacawɔlɩ ‑naa gɩlɩmʋ 'nyɩ ‑ɔ 'ta 'lɛ ɩmɩa ma na ma la 'lɛ Sataan* 'la «zizieziziewɔlɩa» na, cibhlili na, n ‑slo 'ta anyɩ ‑buun ‑gbaakʋ. 25‑Ma ɩmɩa a ‑ka 'lɛ na, ɩmɩ ‑tɛɛ 'nyɩ a kla kpaan ‑aan ɩya n 'ka ci. 26Ɔmɔa ‑ɔ -cɩ ka 'lɛ ‑sɩa na, ɔmɔa ‑ɔ -cɩ ka 'lɛ 'na nʋnʋgbɩa kalɩ ‑aan bhɩalɩdaa na, n cɩ 'kɔɔ 'bhlɩa 'fɩan ‑kwleda 'nyɩ 27ɩya ɔ 'ka letiepɛ 'ma, ɔ 'kɩɩ ‑kwle le saa ma wla 'lɛ mamɛnyidi na. 28Saa ‑tɛɛa ‑amʋ ‑ma, n To 'nyɩ 'lɛ ‑kwleliea na, n cɩ 'kɔɔ ‑zʋkpazoliea 'nyɩ. 29Ɔmɔa ‑ɔ ‑ka 'lɛ 'nyukwli na, 'naa ɔ 'nu ɩmɩa 'Wugoa solu 'lɛ -laagɔnɩkplaa 'la -kandia na.

Currently Selected:

Ziz 2: NTLD13

Highlight

Copy

Compare