Ziz 18
18
Babilɔnʋdua ya bhli
1Anɩ ‑naa 'la leen, n ya ‑awlɛ ‑buun ‑bhlaandlee* bhlo 'lɩ, ɔ 'wlʋlʋa ‑laagɔɔn. Ɔ ‑kaa 'tɛtɩ 'kadie 'nyɩ ɔla 'klʋagbaa 'la 'jɩa 'kɔsɔa ‑dʋdʋa ‑tɛtɛa 'kʋ. 2Ɔ nyɩtɛlɩa nikadieen 'nyɩ ɔ claa lebhe: «Ʋ ya bhli, Babilɔnʋdu 'kadiea ya ʋla ‑zɔbhɛlɩgbanya wlɩɩn bhlili. Ʋ ya 'devlowugwi 'la 'du 'plɩ, 'wugwi ‑nyinyia ‑tɛtɛa 'la zizieda, libhli -nyinyia ‑tɛtɛa 'la zizieda. 3Sa, ʋ ya 'bhlɩ 'bhlɩ 'kʋ 'la ncɛlɩa ‑tɛtɛa ʋla ‑badaaglu 'kadie 'la ‑diinvɛɛan tɩa nyɩ ‑dʋdʋa 'kʋ 'la nyɩbhɛlɩa ‑yʋʋsʋ ya ‑badaaglu li 'nyɩ ʋla ‑ŋlaŋlaa ya ‑dʋdʋa 'kʋ 'la 'kɔsɛylanyaa ‑tɛtɛa 'bhɛlɩ zʋ na.» 4'Nyɩ n ya ‑awlɛ ‑buun ‑blɩɩzɔn bhlo 'nu, ʋ 'wlʋlʋa ‑laagɔɔn 'nyɩ ʋ claa lebhe: «'Na ncɛlɩnyɩ, a 'wlʋ duu ‑naa nɩkplaan, a 'la ka sɛ ʋla nyinyia nɩkplaan kʋmʋ ɩya a ‑yʋʋsʋ 'la ka sɛ ʋla 'kwlɩbhɩa ‑ɛ ‑cɩ kʋʋ 'lɛ ŋeni na 'kʋwlalɩ. 5Sa, ʋla nyinyia ya 'kʋgbɛgbɛlɩ ‑aan ɩ ya ‑laagɔɔn ŋeni 'nyɩ Laagɔ ya ʋla nʋnʋgbanyinyia luoli. 6A 'ma 'bhlua ʋ 'ma 'lɛ 'nyɩ ʋ ya 'lɛ anyɩ ‑bɩɔ na, ɩya a ‑bɩʋʋ. A calʋʋ ɩmɩa ʋ nʋ na anyɩ cɩ na ɩla dɩpici ‑mɔsɔ. ‑Kɔbhɛa nɩkplaan ʋ 'kɔsɔ 'lɛ ʋla ‑diinvɛɛan 'nyɩ ʋ nyɩ 'lɛ anyɩ na, anyɩ ‑ma, a 'kɔsɔmʋɛ ‑diinvɛɛan ‑ɛ 'tɛ 'lɛ dɩpici ‑mɔsɔ 'nyɩ ‑ɛ zi 'lɛ ʋ 'nɛa 'kʋ na ɩya a 'nyɩʋ. 7Saa ʋ kpolia 'lɛ gbɩɩn ʋla 'klʋagbaa ɩya 'bhɛlɩ 'kadɩa sidiin na, a 'nyɩʋ 'sɛ 'la gbaylɩsalɩɛ ɩya cɩɩnkalɔ. ‑Masa, ʋ cla ʋcɩ lebhe: N ‑kʋ ŋlʋbhɛlɩkpo 'kʋ sa, n 'ta 'kuzluŋlɔ ‑glɩ 'nyɩ 'n cɩ 'ta cɩɩnkalɔ cibhlili 'pʋpʋkʋ. 8‑Anɩ ‑naa 'la gbʋ na, 'kwlɩbhɩɛa ‑ɛ ‑bhɔsʋɔa 'lɛ ʋla gbʋ na, cɩ 'kʋʋ clɩɩ bhlogbɩɩ 'wlugblolu: 'Kwɩ, cɩɩnkalɔ, ŋɔmʋ cɩ 'ka ʋla da 'plɩ ɩya ‑kosu 'kʋʋ ‑sie. Sa, ɔ ‑ka 'tɛtɩ, ‑Kwlenyɔ, Laagɔ, ‑ɔ ‑plʋʋ 'lɛ 'tɩtɩa na.»
9Daa ma cɩ 'ka 'lɛ ʋla ‑kosugbacʋa 'lɩ na, ‑dʋdʋa ‑kʋ 'la nyɩbhɛlɩa ‑ɔ ‑yʋʋsʋ lia 'lɛ ʋla ‑badaaglua 'nyɩ ‑ɔ ‑kʋa 'lɛ ʋla 'bhɛlɩ 'kadɩa sidiin na, ma cɩ 'kʋʋ 'tu ɩya ma 'kʋʋ bhʋtʋ. 10Ma cɩ 'ka 'koonko 'nylugo, ʋla gbaylɩsalɩɛa 'la ka sɛ maa ŋenimʋ ɩya ma 'ka 'cla lebhe: «'Wuu! ‑Munzue yɔɔ bho! ‑Munzue yɔɔ bho! ‑Mɔ Babilɔnʋdu 'kadiea, ‑mɔ 'tɛtɩkalɩdua! 'Ŋwacɩwlu bhlogbɩɩ nɩkplaan, ma yɔɔ 'tɩtɩpla.»
11‑Dʋdʋa 'kʋ 'la 'kɔsɛylanyaa ‑ma, ma tu 'nyɩ ʋla wɔlɩa kalɩ maa cɩɩn, sa nclɔɔ bhlogbɩɩ ‑pɩa 'tanɩ mala 'pɛlʋzʋzʋlɩɩa ‑ɩ ‑glɩ 'lɛ 12‑asɩkɛ, 'dala 'pɔpʋa, 'pɛlʋtɛtʋcɔkʋ ɩya ‑lie na. Maa ‑pɩa 'tanɩ mala bhlabhlalokua ɩya lokuzalɩ 'nanɩa. Maa ‑pɩa 'tanɩ mala 'ŋɔnɔpasia, lɩɩa ‑tɛtɛa ‑ɩ ‑tɛlɩlɩɔ 'lɛ lɔgla, 'pɛlʋtɛtʋsi, ‑jawie, letie ‑aana cɔkʋ 'nanɩa ‑tɛtɛa nɩkplaan na. 13Maa ‑pɩa 'tanɩ mala 'ŋɔnɔpalɩɩa, ‑asʋnbanyɩ ɩya donyi. Maa ‑pɩa 'tanɩ ‑diinvɛɛn ɩya 'kpʋ, ‑falii ɩya 'blee, bhlii ɩya 'bhlabhlɩ, ‑kpangwɩ ɩya tavʋgɔlɩ, ɩya geye ɩya -palʋʋnpapanya.
14'Kɔsɛylanyaa cla 'dua lebhe:
«Lɩɩa ‑ɩ ‑kaa ‑mɔɔ 'lɛ 'tʋ na, yɔɔ cɩ da tlʋbhalɩ.
'Nanɩkʋlɩɛ ɩya lelelɩɩa ‑tɛtɛa ya ‑na gbazɔ mlɔ
'nyɩ ‑n cɩ 'tanɩɩ 'lɩ 'pʋpʋ 'kʋ.»
15'Kɔsɛylanyaa ʋ zʋ 'lɛ 'bhɛlɩ 'dɛ 'la 'kɔsɛa nɩkplaan na, cɩ 'ka
'koonko 'nylugo ʋla gbaylɩsalɩɛa 'la ka sɛ maa ŋenimʋ. Ma cɩ
'ka 'nʋgbʋ 'tu, ma ka 'kuzluun kʋ ɩya 16ma 'ka 'cla lebhe:
«‑Munzue yɔɔ bho! ‑Munzue yɔɔ bho! ‑Mɔ dukadiea ‑ʋ
‑bibiea 'lɛ ‑slɛkɛlokwi ‑zalɛ 'nanɛ 'nyɩ ‑ʋ zʋ 'lɛ ‑asɩkɛ,
'pɛlʋtɛtʋblaazɩ ɩya ‑lie cɩ na,
17'ŋwacɩwlu bhlogbɩɩ nɩkplaan, 'nanɩ ‑bhutukpa ‑naa ya nyumo!»
'Nyikʋtaan 'la 'gɔkadɩa 'la klʋlɩnyaa ‑tɛtɛa, maa ‑tɛtɛa ‑ɔ 'plɩlɩa 'lɛ 'dɛ 'la ‑dɩklea na, 'nyi 'kʋtaan 'la 'gɔkadɩa nɩkplaan 'la lobholinʋnyaa ɩya maa 'fɩan ‑ɔ lilia 'lɛ ge 'kʋtaan 'la lobholia nɩkplaan na, 'nylugoa 'koonko,
18ma kopea ʋla siliea 'la gbacʋa 'ciin 'nyɩ ma claa lebhe:
«'Du saa ‑ʋya dukadiea 'wlʋlʋanɩa 'lɛ bha?»
19Ma gblolua macɩ pipi 'wlu, ma paa bhubhu,
ma tua, ma bhʋtʋa 'nyɩ ma claa lebhe:
«'Wuu! ‑Munzue yʋʋ bho! ‑Munzue yʋʋ bho!
Dukadiea ‑ʋla 'bhɛlɩ 'kadɩa ya 'lɛ ncɛlɩa 'fɩan ‑ɔ ‑ka 'lɛ
'nyi 'kʋtaan 'la 'gɔkadɩa, 'bhɛlɩ zʋ na,
'ŋwacɩ wlu bhlogbɩɩ nɩkplaan, ʋ ya ‑gbɔlʋɔ!»
20‑Laagɔɔn, nʋ ‑pɔpʋɛ ʋla gbɔlʋlɩɛ 'la gbʋ!
Ɩya anyɩ ‑ma, Laagɔ 'la ncɛlɩnyɩ, lobhulobhunyanyɩ*
ɩya Laagɔnekʋnyɩtɛnyanyɩ* nʋ ‑pɔpʋɛ,
sa 'tɩtɩa Laagɔ ‑plʋ 'lɛ na, ala kpaa ɔ ‑sa 'lɛ.
21Na, 'tɛtɩkalɩbhlaandlee bhlo ya cokwie 'kadiea ‑ɛ 'wɔlʋ 'lɛ 'kʋ le 'tibhli 'kadie na 'ma,
ɔ yɛɛ gea nɩkplaan 'pa 'nyɩ ɔ ya 'cla lebhe: «'Lɩka ‑sa 'la
'tɛtɩ nɩkplaan ma cɩ ka 'lɛ Babilɔnʋdu 'kadiea gbɔlʋlʋ
ɩya ma 'la kanɩʋ 'ciinlɩ 'pʋpʋ 'kʋ.
22'Nyɩ dʋpɩbholinya ɩya gbagbalɩɩa 'la bholinya,
‑ketebholinya ɩya lɛglɩbholinya,
maa cɩ 'tanɩɔ 'bhlɩ mala ne 'nunu.
‑Nɛnɛkalɩnyɔ bhlogbɩɩ, maa cɩ 'tanɩɔ ‑mɔ 'bhlɩ 'lɩlɩ.
'Tibhli 'la ne, maa cɩ 'tanɩa ‑mɔ 'bhlɩ 'nunu.
23‑Kanie 'la 'jɩ cɩ 'tanɩɔ 'bhlɩ leli.
'Cɩcɩɛnʋnyɔ ɩya ɔ nʋŋlɔ 'la ne,
maa cɩ 'tanɩa ‑mɔ 'bhlɩ 'nunu,
‑naa 'kɔsɛylanyaa ‑glɩa 'lɛ ‑dʋdʋa 'kʋ 'la ‑zaatocɩ,
‑naa 'sekea ya 'bhlɩ 'bhlɩ 'kʋ 'la ncɛlɩa 'fɩan 'nyiglili
24'nyɩ ma yɔɔ 'lɛ Laagɔnekʋnyɩtɛnya, ‑kplɔkplɔnyaa
ɩya maa ‑tɛtɛa ma 'dɩ 'lɛ ‑blɩɩn ‑dʋdʋa 'kʋ na,
'la ‑dolua 'bhlɩ 'lɩlɩ.»
Currently Selected:
Ziz 18: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
