Mak 3
3
Nclɔɔa ‑ɔ ‑ka 'lɛ 'kukusɔa na
(Mat 12.9-14; Luk 6.6-11)
1Zozii ya ‑awlɛ Zifʋnyaa* 'la bhibhiepalʋa* ‑zɔn ble. Nclɔɔ bhlo ‑kʋa 'yɛpɩ, ɔ ‑kaa 'kukusɔ. 2Ma kopea Zozii 'ciin, ka ɩ ‑ka ‑kʋ le nyɔkwɛclɩɩa* 'kʋ, ɔ cɩ 'kaa 'mɔɔ jabha na, ɩya ma 'kaa 'mɔɔ wɔlɩkʋgɩ. 3Zozii ya nclɔɔa ‑ɔ ‑ka 'lɛ 'kukusɔa na 'cla lebhe: «‑Bho 'kʋ, ci ‑da ncɛlɩa 'fɩan 'ci 'kʋ.» 4Ɔ ya maa neencla lebhe: «Nyɔkwɛclɩɩa 'kʋ, ‑anɩsaa ‑ɩ ‑fataa 'lɛ le ma nʋ bha? 'Nanɩ ‑aana ‑abhɔlɛ bha? Ma jabha nclɔɔ ‑aana ma kopeo 'ciin ɩya ɔ 'ku bha?» ‑Ma maa, 'ma ‑sa 'taa ne. 5Ɔ ya maa 'fɩan dɔgbɛciin kopeli ‑aan ɔ ya 'kʋcɩlɩ, sa mala pɔlɩa ‑titlilioa 'lɛ na, ɩ kalɩa 'mɔɔ cɩɩn. Ɔ ya nclɔɔa 'cla lebhe: «‑Glɔ ‑naa sɔa nɩkplaan.» Nclɔɔa ya ɔla sɔa nɩkplaan ‑glɔ 'nyɩ ʋ ya jabha. 6Falizɩɛnnyaa* ya ‑zɔnwlʋ 'nyɩ 'kplookʋ, maya Ewlɔdʋ 'la ‑kandinyaa ya 'wluwlalɩ le ma 'kaa saa ma cɩ 'kaa 'lɛ nʋnʋnʋ ɩya ma 'kɔɔ 'lɛ 'bhla na, 'matɩ.
Ncaabhutukpa ya Zozii 'bhlɩ ci
(Mat 4.23-25, 12.15-16; Luk 6.17-19)
7Zozii ɩya ɔla gɩlɩnyaa* ya 'dɛ 'wlʋ, ma ya Galilee 'la 'nyia cɩ mʋ. Ncaabhutukpa ya Galileebhlɩa 'kʋ 'wlʋlʋ 'nyɩ ma yɔɔ gɩlɩ. Saa ma nua 'lɛ ɔla nʋnʋgbɩa cɩa wɔlɩa na, ncaabhutukpa ya Zudeebhlɩa, 8Zolizalɛmʋ, Idumee, Zludɛɛnnyidɔlʋa leen, Tili ɩya Sidɔɔnbhlɩa 'kʋ 'wlʋlʋ 'nyɩ ma yɔɔ 'bhlɩ ci. 9Zozii ya ɔla gɩlɩnyaa 'cla lebhe ma bhɔsʋɔ gɔlʋ, ‑alawleea 'la ka sɛɔ mɛmɛnɩ. 10Sa ɔ ya 'lɛ ncaabhutukpa jabha na, maa ‑anʋa 'fɩan ‑ma 'taa 'lɛ ‑ja na, ma mɛa 'mɔɔ cɩ le ma 'kaa 'mɔɔ cɩkla. 11'Wugwi ‑nyinyia ‑kɔɔ 'lɩ na, ɩ bhlilio ‑deliin, ɩ ‑gaa nɩkplaan 'nyɩ ɩ cla lebhe: «‑Mɔ ‑ɔ ‑glɩ 'lɛ Laagɔ 'la 'Cʋa!» 12Zozii zalalɩa 'mɩɩ 'ci le ɩ 'la nyɩtɛa ɔla cɩa wɔlɩ.
Zozii ya 'Kʋgba ‑mɔsɔa desla
(Mat 10.1-4; Luk 6.12-16; Lobh 1.13)
13Zozii ya 'kikea 'wlu ‑gblaa, ɔ ya maa ‑anʋa ɔ 'matɩa 'lɛ na la 'nyɩ ma yɔɔ cɩ ci. 14Maa sidiin, ɔ ya 'kʋgba ‑mɔsɔ desla le ma 'kɔɔ cɩ kʋ ɩya ɔ 'ka maa Dɩnanɩa* ‑sakaan lobhu. 15Ɔ ya maa 'wugwi ‑nyinyia 'la 'tlitɛtɩ 'nyɩ. 16'Lɩka 'kʋgba ‑mɔsɔa ɔ sla 'lɛ de na: Simɔɔn, ɔ lɔɔ Pɩɛlɩ, 17Zebedee ‑yowli Zakɩ ɩya ɔ bholi Zaan, ɔ la maa Boanɛgɛzɩ, ɩ sa ‑zɔn le ‑laagɔzadlɛ 'la 'cuo, 18Andlee, Filipʋ, Batelemii, Matie, Tomaa, Alɩfee ‑yowli Zakɩ, Tadee, 'bhlɩkʋtɩtɔlʋnyɔ Simɔɔn 19ɩya Zuda Iskalɩɔtʋ, ɔmɔa 'titia ‑ɔ zʋɔ 'lɛ 'pɛlʋ na.
Ma nabhe Bɛzebulu ‑kʋ 'lɛ Zozii nɩkplaan
20Zozii ya 'sleen cɔlɔ 'nyɩ ‑alawleea ya ‑awlɛ 'wluwlalɩ. Ɩ gba na ɔya ɔla gɩlɩnyaa* 'lɩ 'taa ‑jioli ɩya ma 'kaa li. 21Daa ɔla 'slinyaa 'nu 'lɛ sɛɛ na, ma ya ci le ma 'kɔɔ 'kʋbhli. Sa ma claa lebhe: «'Wluun yɔɔ nyumo.» 22‑Jlɩmaazienyaa* ‑ɔ 'wlʋlʋa 'lɛ Zolizalɛmʋ na, claa lebhe: «Bɛzebulu ‑kʋɔ 'lɛ nɩkplaan, 'wugwi ‑nyinyia toa 'la 'tɛtɩa nɩkplaan ɔ 'tlili 'lɛ 'wugwi ‑nyinyia.» 23Ɔ ya maa la 'nyɩ ɔ ya maa ‑nyandlaa nɩkplaan 'cla lebhe: «'Nsasa Sataan* cɩ 'kaa 'lɛ Sataan 'tlitlili bha? 24Gbazɩ nyɩbhɛlɩdu ‑kaan ‑do na, 'ʋ cɩ 'ta kla, 25gbazɩ 'sle ‑ma a ‑kaan ‑do na, 'a cɩ 'ta kla. 26Na, gbazɩ Sataan ‑ka ɔmɔ 'titi ɔcɩ gbatlɩmʋnʋ na, ɔ yaan do, 'ɔ cɩ 'tanɩ kla, ɔla da ya bhɩa. 27Nclɔɔ cɩ 'ta ‑bhɩakpanyɔ 'bhisleen ble ɩya ɔ 'ka mino ɔ 'ka ɔla 'nanɩa 'ma, ɩ ‑ka ‑kʋ le ɔ 'ta kɔɔ gʋa ‑bɛɛ na. Na 'fɩɔn, ɔ 'ka 'lɛ ɔla 'nanɩa 'ma na, ɩ ‑fata lebhe ɔ ‑gʋɔ. 28N solui anyɩ, ɩ ‑glɩ ‑nʋawlɛ: Nyinyia ‑tɛtɛa ncɛlɩ cɩ 'ka 'lɛ nʋ ɩya wɔɔnyinyia ‑tɛtɛa ma cɩ 'ka 'lɛ Laagɔ cɩ nyɩtɛlɩ na, ɩ cɩ 'ka maa ‑vɔɔ. 29‑Ma ɔmɔa ‑ɔ ‑cɩ ka 'lɛ ‑Kplɔkplɔ ‑Wugoa* wɔɔnyinyi cɩ nyɩtɛlɩ na, 'ɩ cɩ 'tɔɔ ‑vɔɔ, sa ɩ ‑glɩ nyinyia ‑ɩ ‑gbɛɔ 'lɛ 'wlu 'lʋkʋlʋkʋ ‑aan 'lʋkʋlʋkʋ na.» 30Ka ɔ nyɩtɛ 'lɛ sɛɛ, sa ‑anʋa claa lebhe: «'Wugo ‑nyunyu ‑kʋɔ 'lɛ nɩkplaan.»
Zozii 'la 'lɔlʋnyaa 'titi
(Mat 12.46-50; Luk 8.19-21)
31Ma ‑kʋ kaa dɩpɩa bhlogbɩɩ 'nyɩ Zozii ɔ 'nɔ ɩya ɔ bholiecɩ ya 'lɛ ci. Ma ‑kʋa ‑jlukuun 'nyɩ ma ya 'lɛ nclɔɔ lobhu le ɔ 'clɔɔ le ɔ ci. 32Ncaabhutukpa ‑kʋa 'mɔɔ cɩ sa 'nyɩ ma yɔɔ 'cla lebhe: «'Lɩka ‑n 'nɔ, ‑n bholiecɩ ɩya ‑n mɛɛncɩ, ma ‑kʋ -ɔ ‑jlukuun ma 'matɩɔ.» 33Ɔ ya maa neencla lebhe: «Ncaasaacɩɩ -ɔ ‑glɩa 'lɛ n 'nɔ ɩya n bholiecɩ bha?» 34Ɔ ya 'cibie, ɔ ya maa ‑ɔ ‑kʋa 'mɔɔ 'lɛ cɩ sa na kope 'nyɩ ɔ ya 'cla lebhe: «'Lɩka n 'nɔ ɩya n bholiecɩ. 35Ncaatʋʋntʋtʋa ‑ɔ nʋ 'lɛ Laagɔ 'la pɔɔsa na, ɔmɔ ‑ɔ ‑glɩ 'lɛ n bholi, n mɛnɔ, n 'nɔ.»
Currently Selected:
Mak 3: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.