Zan 19
19
1Na, Pilatɩ ya gba ma ya Zozii famʋ 'nyɩ ma yɔɔ ‑ngblieen bhutili. 2'Sojanyaa ya 'ŋuglipie ca, ma yɔɔ 'wlu zʋ 'nyɩ ma yɔɔ lokwi ‑zalɛ nɩkplaan ‑pla. 3Ma yɔɔ cɩ mɛ 'nyɩ ma yɔɔ 'claa lebhe: «‑Ayoka, Zifʋnya* 'la nyɩbhɛlʋ!» 'Nyɩ ma yɔɔ 'ciinsɛpɛlɩɛ bhɔ.
4Pilatɩ ya ‑awlɛ ‑zɔnwlʋ 'nyɩ ɔ ya Zifʋnyaa* 'cla lebhe: «A poon 'nyukwliin! N cɩ 'ka gba ma 'kɔɔ anyɩ ‑da ‑jlukuun ‑la ɩya a 'ka sɛɛ cibhlili lebhe n 'lɩ 'ta wɔlɩa 'la gbʋa n cɩ 'lɛ nclɔɔ ‑naa 'bhla na.» 5Na, Zozii ya ‑zɔnwlʋ. Ɔ ‑zʋa 'ŋuglipiea 'wlu 'nyɩ ɔ ‑plaa lokwi ‑zalɛa nɩkplaan. Pilatɩ ya maa 'cla lebhe: «'Lɩka nclɔɔa!»
6‑Ma daa ‑teyiyinyaa tocɩa ɩya mala ‑bɛnyaa 'lɩɔ 'lɛ na, ma ya 'kasɛ 'palɩɛ bhɔ 'nyɩ ma claa lebhe: «Bhoo dabhlalɩsu 'ciin! Bhoo dabhlalɩsu 'ciin!» ‑Ma Pilatɩ ya maa 'cla lebhe: «Anyɩ 'titi a 'mɔɔ ɩya a bhoo dabhlalɩsua 'ciin, ‑masa ‑amʋ, 'n 'lɩ 'ta wɔlɩa 'la gbʋa n cɩ 'kɔɔ 'lɛ 'bhla na.» 7Zifʋnyaa* yɔɔ 'cla lebhe: «‑Anyɩ, ‑a ‑ka ‑ala ‑jlɩmaa bhlo. ‑Jlɩmaa ‑naa cla lebhe ɩ ‑fata lebhe ɔ 'ku, ‑ofi lebhe ɔ ya 'cla lebhe ɔ ‑glɩ Laagɔ 'la 'Cʋ na.»
8Daa Pilatɩ 'nu 'lɛ wɔlɩ ‑naa na, ɔla ŋanɔa ya 'kʋzʋlʋ. 9Ɔ ya ɔla ‑palʋa ‑zɔn ble 'nyɩ ɔ ya Zozii neencla lebhe: «'Ndagbazɩ ‑n 'wlʋlʋa 'lɛ bha?» ‑Ma Zozii 'tɔɔ nesalɩ. 10Na, Pilatɩ yɔɔ 'cla lebhe: «‑N 'ta ‑wa lebhe ‑n kaan neenŋonu bha? ‑N 'ta sɛɛ ‑ci lebhe n cɩ ‑jioli 'nyɩ le ma 'talɩɔ 'cin ‑aana ma bhoo dabhlalɩsu 'ciin bha?» 11‑Ma Zozii yɔɔ neenŋonu lebhe: «‑N 'taan ‑jioli bhlogbɩɩ 'kʋ -kalɩ, ‑n 'ta le ɩmɩa ‑ɩ 'wlʋlʋ 'lɛ ‑laagɔɔn 'nyɩ ma 'nyɩɔ 'lɛ naa. Ɩla gbʋ, nclɔɔa ‑ɔ ‑zʋlʋʋn 'lɛ ‑mɔ wlɩɩn 'pɛlʋ na, ɔla nyinyia 'ghli ɩ zi ‑nanɩa 'kʋ.»
12Na, ‑ɩ bhɔlʋ 'lɛ dɩpɩa na, Pilatɩ 'matɩa saa ɔ cɩ 'kaa 'lɛ nʋnʋnʋ ɩya ɔ 'ka Zozii 'cintalɩ na, ‑ma Zifʋnyaa ya nɩkplaan ‑gaalɩɛ bhɔ 'nyɩ ma claa lebhe: «Gbazɩ ‑n ‑ka nclɔɔ ‑naa 'cintalɩ na, 'dɛndlana ‑n 'ta nyɩbhɛlʋ Sezalɩ 'nagɔ ‑glɩ! ‑Masa ncaatʋtʋʋntʋa ‑ɔ la 'lɛ ɔcɩ nyɩbhɛlʋ na, ‑glɩ Sezalɩ 'la ‑zɔbhɛlɩgbanyɔ!» 13Daa Pilatɩ 'nu 'lɛ wɔlɩ ‑naa na, ɔ ya gba ma ya Zozii ‑zɔnwlaa 'nyɩ ɔ ya ɔla 'tɩtɩplakpoa 'kʋ 'plɩ, ɔ ya sakʋ, daa ma la 'lɛ cɔkʋkplua 'nyɩ ma la 'lɛ Ebleewɔlɩɩn Gabataa na. 14Ɩ ‑glɩa geyliinwlʋfɛtlɩa* 'la bhɔsʋaclɩɩ. Dɩdɩ yaanɩa slo. Pilatɩ ya Zifʋnyaa 'cla lebhe: «'Lɩka ala nyɩbhɛlʋa!» 15‑Ma ma ya nɩkpaan ‑gaalɩɛ bhɔ 'nyɩ ma claa lebhe: «'Maa 'bhlɔɔ! 'Maa 'bhlɔɔ! Bhoo dabhlalɩsu 'ciin!» Pilatɩ ya ‑awlɛ maa neencla lebhe: «N bho ala nyɩbhɛlʋa dabhlalɩsu 'ciin bha?» Zifʋnyaa tocɩa yɔɔ neenŋonu lebhe: «‑Anyɩ, ‑a 'ta ‑buun nyɩbhɛlʋ ‑ka, ɩ ‑ka ‑kʋ lebhe ‑n 'ta Sezalɩ na.» 16Na, Pilatɩ ya maa Zozii 'nyɩnɩ le ma 'kɔɔ dabhlalɩsua 'ciin bho.
Ma ya Zozii dabhlalɩsua 'ciin bho
(Mat 27.32-44; Mak 15.21-32; Luk 23.26-43)
17Ma ya Zozii 'ma 'nyɩ ma yɔɔ ɔmɔ 'titi ɔla dabhlalɩsua bhɛda 'nyɩ. 'Nyɩ ma ‑yɔɔsɔ ya daa ma 'lɛ 'wlukoklo 'la da 'nyɩ ma la 'lɛ Ebleewɔlɩɩn Gɔlʋgotaa na, mʋ. 18Dɩpɩa ma bholuo 'lɛ dabhlalɩsua 'ciin ɔya ‑buun ncɛlɩ ‑mɔsɔ. Bhlo 'lipasɔ 'kʋ ɩya bhlo 'daba 'kʋ 'nyɩ Zozii ‑kʋ 'lɛ sidiian. 19Pilatɩ ya gba 'nyɩ ma ya kpluukpaakpʋ 'kʋ zie 'nyɩ ma yʋʋ dabhlalɩsua 'kʋ bho. Ʋ ‑zieoa kʋ lebhe: «Nazalɛtɩnyɔ Zozii, Zifʋnya* 'la nyɩbhɛlʋ». 20Daa ma bholu 'lɛ Zozii dabhlalɩsua 'ciin ɩya 'dua 'taa 'lɛ cɩ da tlʋtlʋlʋ, 'nyɩ kpluukpakpʋa 'kʋ 'la wɔlɩa ‑zielioa 'lɛ Ebleewɔlɩɩn, Wlɔmʋwɔlɩɩn ɩya Glɛkɩwɔlɩɩn na, Zifʋnya ‑bhutukpa yɩɩ zɛlɩ. 21Na, Zifʋnyaa 'la ‑teyiyinya kpasɩaa ya Pilatɩ 'cla lebhe: «‑Naa ziea Zifʋnya 'la nyɩbhɛlʋ, ‑ma 'maa zie lebhe: Ɔmɔ ‑naa nabhe ɔ ‑glɩ Zifʋnya 'la nyɩbhɛlʋ.» 22‑Ma Pilatɩ ya maa 'cla lebhe: «Ɩmɩa n ya 'lɛ zie na, ɩ ya ‑zieo.»
23Daa 'sojaa bhɩalɩ 'lɛ Zozii dabhlalɩsua 'ciin bholɩɛ na, ma ya ɔla lokua 'ma 'nyɩ ma yɩɩ 'ci ‑nmɔɔnaan poli, nclɔɔ nclɔɔ 'la 'ce. ‑Ɔ ‑tonɩa 'bubua: Lokukli ‑totobhuo ma mɛmɛnɩ 'lɛ cɩ, ma ya 'lɛ 'wlu 'kʋ bhɔlʋ, ma ya 'lɛ kpla ‑aan 'nyɩ ma ya 'lɛ gozɔn ŋeni. 24Na, 'sojaa ya macɩ 'cla lebhe: «‑A 'la 'ŋatɩɛ, ‑ma ‑a kɛɛ ‑nigbe cɩ 'pa ɩya a ka nclɔɔa ‑ɔ ‑kɛɛ 'lɛ 'ma na, cibhlili.» Na, 'lɩka saa Zieziewɔlɩa* ‑glalɩ 'lɛ 'kʋ, ‑ɩ cla 'lɛ lebhe:
«Ma ya 'na lokua macɩ poli.
'Nyɩ ma ya 'na 'kʋtaan ‑lokwia ‑nigbe cɩ 'pa.»
'Lɩka ɩmɩa 'sojaa nʋ 'lɛ na.
25Zozii 'nɔ, ɔ 'nɔ mɛnɔ Malii, Klopasɩ nʋŋlɔ ɩya Malii Madalaŋlɔa 'nylugoa Zozii 'la dabhlalɩsua cɩ. 26Na, daa Zozii 'lɩ 'lɛ ɔ 'nɔ 'nyɩ ɔ 'lɩ 'lɛ gɩlɩnyɔa* ɔ ‑waa 'lɛ na, ɔ 'nɔ cɩ na, ɔ ya ɔ 'nɔ 'cla lebhe: «'N 'nɔ, 'lɩka ‑naa 'cʋ.» 27'Nyɩ ɔ ya 'lɛ gɩlɩnyɔa 'cla lebhe: «'Lɩka ‑n 'nɔ.» Na, 'dɛ 'la clɩɩa bhlogbɩɩ 'kʋ, gɩlɩnyɔa yɔɔ 'sleen famʋ.
Zozii ya 'ku
(Mat 27.45-56; Mak 15.33-41; Luk 23.44-49)
28Daa wɔlɩ ‑naa 'plɩ 'lɛ na, Zozii ya sɛɛ cibhlili lebhe wɔlɩa ‑tɛtɛa yaa 'wluko, ‑ma Zieziewɔlɩa* 'ka 'lɛ 'kʋglalɩ na, ɔ ya 'cla lebhe: «'Nyutʋ bhlaan.» 29'Nyukonde ‑kʋa dɩpɩa 'nyɩ a yea ‑diinvɛɛn ‑nyinye 'kʋ. Na, 'sojaa ya ‑vada 'ma, ma yaa sua ma la 'lɛ ‑izɔpʋ na 'la 'labhʋ 'ciingʋalɩ, ma yaa ‑diinvɛɛn ‑nyinyea nɩkplaan 'ŋwa 'nyɩ ma yɔɔ ma ne 'kʋ 'takalɩ. 30Na, daa ‑diinvɛɛn ‑nyinyea mʋɔ 'lɛ neen 'nyɩ ɔ 'mla 'lɛ na, ɔ ya 'cla lebhe: «Wɔlɩa ‑tɛtɛa ya 'wluko!» Ɔ ya 'wlu ‑dʋdʋ 'kʋ ‑la 'nyɩ ɔ ya 'klʋsa.
'Sojanyɔ bhlo ya Zozii 'la gbakɩa 'fiti
31'Dɛ 'la clɩɩa ‑glɩa 'lɛ clɩɩa nyɔkwɛclɩɩa* gɩa 'lɛ 'kʋ, 'nyɩ 'dɛ la nyɔkwɛclɩɩa bhlilia 'lɛ 'fɛtlɩclɩɩ 'kadie 'kʋ na, Zifʋnyaa* 'ta ‑wabha lebhe ‑blaanyɛkɛa ‑toa dabhlalɩsua 'ciin. Na, ma ya Pilatɩ 'cla lebhe ɔ gba ɩya ma 'kɔtɔ ncɛlɩa ma bho 'lɛ dabhlalɩsia 'ciin na 'la bhɩa ɩya ma ‑sa maa sia 'ciin. 32Na, 'sojanyaa ya mʋ. Ma ya ‑bɛka nclɔɔa 'la bhɩa 'kɔtɔ ɩya ‑mɔsɔ ‑naanɔa ma bhoa 'lɛ ma ‑yɔɔsɔ nebhlo dabhlalɩsia 'ciin na. 33‑Ma daa ma ŋeni 'lɛ Zozii 'kʋ na, ma ya 'lɩ lebhe ɔ yaa tooto 'ku. Ɩ ya gba na, ma 'ta ɔ 'nɩa 'kɔtɔmʋ. 34‑Ma 'sojanyaa nɩkplaan bhlo ya li 'ma 'nyɩ ɔ ya ɔla gbakie 'fiti 'nyɩ ‑dolu ɩya 'nyu ya 'yɛpɩ 'wlʋ.
35Ɔmɔa ‑ɔ 'lɩ 'lɛ wɔlɩ ‑naa 'ciin na, ɔmɔ ‑ɔ li 'lɛ ɩla ‑danʋfʋɛ, 'nyɩ ɔla ‑danʋfʋɛliliea ‑glɩ ‑nʋawlɛ. 'Nyɩ ɔ ‑ci sɛɛ lebhe ɩmɩa ɔ bhli 'lɛ 'kʋ na, ‑glɩ ‑nʋawlɛ ɩya anyɩ ‑ma sɛɛ, a 'ka pɔɔtɛtɛ 'lɩ. 36Ka ɩmɩ ‑naa 'fɩan 'plɩ 'lɛ ‑sa ɩya Zieziewɔlɩa* 'la wɔɔklea ‑naa 'ka 'kʋglalɩ, ‑ama ‑a cla 'lɛ lebhe: «'Ma cɩ 'ta ɔla 'kwie bhlogbɩɩ 'kɔtɔ na.» 37Wɔɔkle bhlo cla ‑awlɛ lebhe: «Ɔmɔa ma bho 'lɛ 'lia na, ɔmɔ ma cɩ 'ka 'lɛ 'ciinkope.»
Ma ya Zozii lesuun zʋ
(Mat 27.57-61; Mak 15.42-47; Luk 23.50-56)
38Ma laa nclɔɔ bhlo Zozɛfʋ, ɔ ‑glɩa 'dua ma 'lɛ Alimatee na 'kʋ 'la nclɔɔ. Ɔ ‑glɩa Zozii 'la gɩlɩnyɔ* ‑ma ‑ɔ ziziea 'mɩɩ ‑ofi lebhe ɔ 'gulua Zifʋnyaa* tocɩa. Na, daa wɔlɩ ‑naa 'fɩan 'plɩ 'lɛ na, ɔ ya Pilatɩ ‑jioli 'clalɩ lebhe ɔ 'ka Zozii 'la ‑blaanyɛkɛa dɩpɩa ‑sa. Pilatɩ ya ŋonu 'nyɩ ɔ ya 'dɛ 'nyɛkɛa ‑sa. 39Nikodɛmʋ, nclɔɔ ‑naa ‑ɔ mʋwaa 'lɛ Zozii dobhesa 'ciinlɩkan na, ɔmɔ ‑masɛɛ ɔ ya ci. Ɔ ya ‑pitia ma 'lɛ 'mili ɩya ɩmɩa ma la 'lɛ ‑alowɛsɩ na 'cakalɩ 'nyɩ ɔ ya ‑lamʋ. Ɩ cɩa ‑sa ‑kiloo ‑glʋʋ ɩya 'kʋgba 'wlʋ. 40Ncɛlɩ 'naa ‑mɔsɔa ya Zozii 'la ‑blaanyɛkɛa 'ma. Ma ya 'ŋɔnɔpalɩɩ lokupɛlɩ cɩ 'moni 'nyɩ ma yɩɩ 'ma, ma yɔɔ cɩ gʋa, saa Zifʋnyaa zizie ‑azla 'lɛ mala 'kuo na. 41Daa ma bholua 'lɛ Zozii dabhlalɩsua 'ciin na, 'kɔkuo mɛa 'dɛ cɩ. Lesua ‑kʋa 'kɔkuoa nɩkplaan, ma 'ta ka ‑azlʋʋ nclɔɔ nɩkplaan zizie. 42Na, sa Zifʋnyaa 'la nyɔkwɛclɩɩa* mʋanɩa 'lɛ ŋenikan na, 'nyɩ lesua mɛa 'lɛ 'dɛ cɩ na, ma yʋʋ nɩkplaan Zozii zʋ.
Currently Selected:
Zan 19: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.