Ebl 7

‑Ɔ ‑glɩa 'lɛ Mɛlɩkɩzedɛkɩ bha?

1Mɛlɩkɩzedɛkɩ ‑naa, ɔ ‑glɩa 'dua ma la 'lɛ Salɛmʋ na 'la nyɩbhɛlʋ ɩya 'kʋzilo Laagɔa 'la ‑teyiyinyɔ. Daa Ablaamʋ wlʋa 'lɛ ɔya nyɩbhɛlɩa 'la tʋa ɔ ‑sɩa 'lɛ na 'kʋ na, ɔmɔ ‑ɔ mʋnʋɔ 'lɛ ‑gugwie 'kʋ 'nyɩ ɔ yɔɔ 'lɛ 'nyupalɩ. 2Ɔmɔ Ablaamʋ 'nyɩnɩ 'lɛ lɩɩa ‑tɛtɛa ɔ ‑lamʋa 'lɛ tʋa 'kʋ na, ɩla 'kʋgba cea. ‑Bɛɛ, 'ŋlɩa ɔ ‑lio 'lɛ na, ɩ sa ‑zɔn lebhe 'kʋnylugolulɩɛ 'la nyɩbhɛlʋ 'nyɩ ɔ ‑glɩa ‑awlɛ 'lɛ Salɛmʋ 'la nyɩbhɛlʋ, ɩ ‑sa ‑zɔn lebhe pupue 'la nyɩbhɛlʋ. 3Ɔ 'ta to ‑ka, ɔ 'ta 'nɔ ‑ka, ɔ 'ta 'wlʋlʋda ‑ka, ɔla clɩɩa 'ta bhɔlʋda ‑ka naa, ɩ 'ta bhloluda ‑ka. Ka ɔ ‑kʋ 'lɛ le Laagɔ 'la 'Cʋa, ɔ ‑glɩ ‑teyiyinyɔ 'lʋkʋlʋkʋ ɩya 'lʋkʋlʋkʋ.

4A 'lɩmʋka saa nclɔɔ ‑naa ‑to 'lɛ 'kʋ na! Nclɔɔ ‑naa ‑a tokadɔ Ablaamʋ 'nyɩnɩ 'lɛ lɩɩa ɔ ‑lamʋ 'lɛ tʋa 'kʋ na, ɩla ‑lɩɩ 'nanɩa 'la 'kʋgba cea na. 5'Bhlɩmɔɔn, Levii 'la valɩnɩkplaa 'la ncɛlɩa ‑ɔ ‑glɩ 'lɛ ‑teyiyinyaa na, maa ‑jlɩmaa nyɩ 'lɛ ‑jioli le ma 'ma 'lɔlʋa 'la lɩɩa ‑tɛtɛa ɩla 'kʋgba cea, ɩ sa 'lɛ ‑zɔn le ma bholiecɩa, ‑ɔ ‑glɩmʋ 'lɛ Ablaamʋ 'la valɩnɩkpaanya ‑ma na. 6‑Ma Mɛlɩkɩzedɛkɩ, ‑ɔ 'wlʋlʋ 'ta 'lɛ maa nɩkplaan na, ɔ ya Ablaamʋ 'la lɩɩa 'la 'kʋgba cea 'ma 'nyɩ ɔ ya 'lɛ ɔmɔ ‑naa, ‑ɔ 'lɩ 'lɛ Laagɔ 'la ‑ndanyɩtalɩɛa na 'nyupalɩ. 7'Bhlɩmɔɔn, ‑a ‑ci lebhe ɔmɔa ‑ɔ ‑to 'lɛ 'kʋ na, ɔmɔ ‑ɔ palɩ 'lɛ ɔmɔa ɔ zi 'lɛ 'kʋ na 'nyu. 8'Nyɩ, maa ‑ɔ ma 'lɛ lɩɩa 'la 'kʋgba cea na, ma ‑glɩ ncɛlɩa ‑ɔ ‑cɩ ka 'lɛ 'ku na, ‑ma ‑anɔ ‑naa, ɔ ‑glɩ nclɔɔa ma cla 'lɛ lebhe ɔ 'ku 'ta na. 9Na, ka ‑a ‑wa 'lɛ ‑a ka 'cla lebhe Levii 'titia ‑ɔ ma 'lɛ lɩɩa 'la 'kʋgba cea na, ɔmɔ ‑ma, Ablaamʋ nɩkplaan, ɔ yaa ‑plʋmʋ. 10Sa, ɔ ‑kʋ ka kaa ɔ tokadɔ Ablaamʋ nɩkplaan, 'nyɩ Mɛlɩkɩzedɛkɩ yɔɔ 'lɛ ‑gugwie 'kʋ mʋnʋ.

11Na, ɩ kaa ‑kʋ lebhe Levii 'la valɩnɩkpaanyaa 'la ‑teyiyilɩɛa ‑kaa ɩmɩa Laagɔ 'matɩa 'lɛ na 'kʋglalɩ na, sa ɩmɩ 'kʋ ‑jlɩmaa ‑a ‑nyɩɔ 'lɛ 'lɔlʋa na 'slalɩɔa 'lɛ na, 'lɩsaa 'la gbʋ ma manɩa ‑awlɛ 'lɛ Mɛlɩkɩzedɛkɩ 'bhisa 'kʋ 'la ‑teyiyinyɔ, 'nyɩ maa 'ma 'ta 'lɛ Awlɔɔn 'bhisa 'kʋ ‑naanʋa 'kplookʋ bha? 12‑Masa, saa ma 'plɩplɩlɩ 'lɛ ‑teyiyinyɔ na, ɩ ‑ka kaci na, ɩ ‑fata lebhe ‑jlɩmaa ‑ma, a kaci na. 13'Nyɩ ɔmɔa ma sa 'lɛ ‑da na, 'lɔkpaa 'kʋa ɔ 'wlʋlʋ 'lɛ na, ma 'ta ka ‑azla 'yɛpɩ 'la nclɔɔ bhlogbɩɩ gʋgwlagbatɩa 'la lobholia 'kʋ la. 14‑Anyɩa 'fɩan, a ‑ci sɛɛ lebhe ‑ala ‑Kwlenyɔa, Zuda 'la 'lɔkpaa 'kʋ ɔ 'wlʋlʋ 'lɛ, 'nyɩ Moyizi ‑kʋa 'lɛ ‑teyiyinyaa 'la wɔlɩa nyɩtɛda na, ɔ 'ta 'lɔkpa ‑naa 'ŋlɩ sla.

15Na, wɔlɩa ‑a nyɩtɛ 'lɛ na, ɩla ‑nʋawlɛa ‑kʋ ‑awlɛ 'dɛ 'kpataa, sa ‑daa ‑teyiyinyɔa ‑ɔ 'wlʋ 'lɛ ‑zɔn na, ɔya Mɛlɩkɩzedɛkɩ 'wlʋlʋ. 16'Nyɩ ‑n 'ta valɩnɩkplaa 'la ‑jlɩmaa 'la gbʋ ɔ 'ta 'lɛ ‑teyiyinyɔ 'plɩ, ‑ma jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na ʋla 'tɛtɩa la gbʋ. 17Masa Zieziewɔlɩa* li ɔla ‑danʋfʋɛ 'nyɩ ɩ cla lebhe:

‑N ‑glɩ ‑teyiyinyɔ 'lʋkʋlʋkʋ ɩya 'lʋkʋlʋkʋ,

Mɛlɩkɩzedɛkɩ 'bhisa.

18‑Sa ‑godogodojlɩmaa 'wlʋ 'lɛ 'dɛ, ‑ofi lebhe a 'tanɩa 'tɛtɩ ‑ka 'nyɩ a ‑kʋanɩa 'dɛ 'kpɔkpɔ. 19‑Masa ‑jlɩmaa 'taa wɔlɩ ‑ylɛylɛ 'kʋglalɩ na. ‑Ma, pɔlɛkʋtɛlɔa ‑ʋ zi 'lɛ ‑tɛtɛa 'fɩan 'kʋ na yanɩ ala 'jeen 'plɩ, ʋmʋ ‑a 'plɩlɩ 'lɛ 'kʋ 'nyɩ ‑a mɛ 'lɛ Laagɔ cɩ.

20'Nyɩ ɩmɩ ‑naa 'ka 'lɛ ‑nʋɔ na, ka ‑ndanyɩtalɩɛ ‑gbɩɩ 'lɛ 'kʋ. ‑Da -naanʋaa 'ka 'lɛ ‑teyiyinya 'plɩ na, ‑ndanyɩtalɩɛ 'tɩɩ 'kʋ ‑gbɛ. 21‑Ma ɔmɔ, ɔmɔa ‑ɔ ‑sɔɔ 'lɛ na ya ‑ndanyɩ 'ta 'nyɩ ɔ ya 'cla lebhe:

‑Kwlenyɔa ya ta lebhe: ‑N ‑glɩ ‑teyiyinyɔ 'lʋkʋlʋkʋ ɩya 'lʋkʋlʋkʋ. 'Nyɩ 'ɔ cɩ 'tanɩ ne kwlacala.

22Na, ‑anɩ ‑naa nɩkplaan na, Zozii ‑glɩ mɛnʋa ‑ʋ zi 'lɛ mɛnʋa ‑tɛtɛa 'kʋ na, 'la ‑awobha.

23‑Awlɛ ‑daa ‑teyiyinyaa ‑zua, ‑ofi lebhe 'kwɩ 'nyɩ 'taa maa ‑jioli le ma kʋa. 24‑Ma ɔmɔ, ɔ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ɔla ‑teyiyilobholia 'ta bhɩada ‑ka. 25Dɛ ɔ mino 'lɛ 'nyɩ ɔ sa 'lɛ maa ‑ɔ 'plɩlɩɔ 'lɛ 'kʋ 'nyɩ ‑ɔ mɛ 'lɛ Laagɔ cɩ na gbʋʋn 'kplookʋ, ‑masa ɔ ‑kʋ 'lʋkʋlʋkʋ le ɔ 'ka mala da bhibhie na. 26Na, ‑sa 'la ‑teyiyinyɔ ‑kpasa 'titi ɩ ‑fataa 'lɛ lebhe a kalɩa. Ɔ ‑glɩ ‑kplɔkplɔnyɔ, ɔ 'ta gbʋ bhlogbɩɩ 'la 'wlu ‑ci, ɔ 'ta ka ‑azla nyinyi nʋ, ɔya nyinyinʋnya ya cɩsasalɩ, 'nyɩ ɔ ‑zilonɩ lɩɩa ‑tɛtɛa 'fɩan 'kʋ. 27‑Daa ‑teyiyinyaa tocɩa 'fɩan yi clɩɩa 'fɩan ‑teyi, ‑bɛɛ maa 'titi ɩya 'lɔlʋa 'la nyinyia 'la gbʋ. ‑Ma ɔmɔ, ɔ 'matɩ 'ta ɩmɩ ‑naa, sa daa ɔ ‑sa 'lɛ ɔcɩ na, ɔ yaa ɩmɩ ‑naa nʋ 'kplookʋ. 28Na, daa ‑jlɩmaa ple 'lɛ ncɛlɩa ‑ɔ 'ta ka 'lɛ 'kʋglalɩ na, ‑teyiyinyakpasɩ na, ‑jlɩmaa 'la leen, wɔɔnyɩtʋa Laagɔ talɩ 'lɛ 'kʋ na, ʋ ple 'Cʋa ɔ ya 'lɛ 'kʋglalɩlɩɛ bhɩalɩ na, ‑teyiyinyɔ kpasaa ‑ɔ ‑kʋ 'lɛ 'lʋkʋlʋkʋ ɩya 'lʋkʋlʋkʋ na.

Currently Selected:

Ebl 7: NTLD13

Highlight

Copy

Compare