Ebl 5

1Na, ‑teyiyinyɔ ‑kpasa 'tʋtʋʋntʋa ma sla 'lɛ de ncɛlɩ sidiin na, ka ɔ ‑kʋ 'lɛ 'dɛ lebhe ɔ 'ka Laagɔ lobho ɩya ɔ 'ka maa 'nyɩ. Ɔla lobholia ‑ɩ ‑glɩ 'lɛ lebhe ɔ 'ka ncɛlɩ 'la vavalɩɩa 'ma, ɔ 'ka ‑teyi yi ɩya mala nyinyia 'ka valɩɛ 'lɩ. 2'Nyɩ ɔmɔ 'titi 'ta 'lɛ ‑cɩcɩ ‑ka na, ɔ cɩ mino ɔ cɩ maa ‑ɔ 'ta 'lɛ wɔlɩ ‑ci 'nyɩ ‑ɔ mlɔ 'lɛ na 'la gbʋ gbada. 3Dɛ ɩ ‑fata 'lɛ lebhe ɔmɔ 'titi ɩya 'lɔlʋa ‑tɛtɛa 'la nyinyia 'la gbʋ, ɔ yi ‑teyi. 4Nclɔɔ 'titi 'manɩ 'ta ɔla 'wluun ɩya ɔ 'ka ɔcɩ 'ŋlɩ ‑naa zʋ, ‑ma Laagɔ ‑ɔ la 'lɛ nclɔɔ 'nyɩ ɔ lii 'lɛ, saa ɩ 'plɩ 'lɛ Awlɔɔn 'la gbazɔ na.

5Dɛ Klisi ‑ma, ɔmɔ 'titi 'ta 'lɛ ɔcɩ ‑teyiyinyɔ ‑kpasa 'la 'klʋagbaa 'nyɩ, ‑ma ɔmɔa ‑ɔ 'clɔɔ 'lɛ lebhe: 'Na cʋ ‑n ‑glɩ 'lɛ, ‑amʋ, ‑yaka, n yɔɔ ‑valɩɔ na, ɔmɔ ‑ɔ 'nyɩɔ 'lɛ ma. 6Ɔ ya ‑awlɛɔ dabhlo 'cla lebhe: ‑N ‑glɩ ‑teyiyinyɔ 'lʋkʋlʋkʋ ɩya 'lʋkʋlʋkʋ, Mɛlɩkɩzedɛkɩ 'bhisa. 7Na, daa ɔ ‑kʋa 'lɛ ‑dʋdʋa 'kʋ na, ɔmɔ ‑ɔya 'ciin 'la 'mɩɔ ‑gaa 'lɛ nɩkplaan. Ɔ ya bhibhie, ɔ ya zɩzla 'nyɩ ɔ ya 'lɛ ɔmɔa ‑ɔ -cɩ kaa 'mɔɔ 'lɛ 'kwɩa nɩkplaan ‑salɩɛ mino na la, 'nyɩ ɔmɔ ‑naa yɔɔ 'lɛ neeŋonu, ɔla ‑ncɩdʋdʋkʋlalɩɛa 'la gbʋ. 8Ɔ ‑glɩa Laagɔ 'la 'Cʋ 'bhlɩmɔɔn, ‑ma 'kwlɩbhɩɛa nɩkplaan, ɔ ya zʋlɩɛ ca. 9Na, ɔ glalɩ 'lɛ ɩmɩ ‑naa ‑tɛtɛa 'kʋ na, ɔ yanɩ maa ‑ɔ ‑ka 'lɛ ɔla zʋlɩɛ na 'la gbʋ, gbʋʋnsalɩɛa ‑ɩ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ɩla 'wlʋlʋda 'plɩ, 10‑ofi lebhe Laagɔ ya 'cla lebhe ɔ ‑glɩ ‑teyiyinyɔ ‑kpasa, Mɛlɩkɩzedɛkɩ 'bhisa.

A mʋnɩ 'kʋklʋʋn pɔɔtɛtɛa nɩkplaan

11Wɔlɩ ‑naa 'kʋ, ‑a ‑ka wɔɔbhutukpa ɩya a ka nyɩtɛ, ‑ma ɩla ‑zɔnsalɩɛa 'tɛ, sa ala 'nuda kalɩ cɩ na. 12Daa tootoa, a cɩanɩa ‑sa ‑yaka ala 'wluun 'la canya 'plɩ, ‑ma a 'matɩ ka ‑azla le ma ca anyɩ Laagɔ 'la wɔɔnyɩtʋa 'la ‑bɛkawɔlɩa. A 'tanɩ nyɩ 'titi 'la linya ‑glɩ, ‑ma a yanɩ ‑awlɛ nyɩanyɩacuo 'plɩ. 13‑Masa ncaatʋtʋʋntʋa ‑ɔ nyɩ ka ka 'lɛ na, ɔ cɩ 'ta wɔlɩa ‑ɩ 'nylugolu 'lɛ 'kʋ na nyɩtɛlɩɛ mino, sa 'cipɔlaa ɔ ‑glɩ ka 'lɛ na. 14‑Ma ncɛlɩa ‑ɔ glɛɛ 'lɛ na, maa ‑ɔ li 'lɛ nyɩ 'titi, maa ‑ɔ ‑cinɩ 'lɛ ɩmɩa ‑ɩ nanɩ 'lɛ ɩya ɩmɩa ‑ɩ ‑nyu 'lɛ na nɩkplaangbazlɩlɩsa.

Currently Selected:

Ebl 5: NTLD13

Highlight

Copy

Compare