Ebl 3
3
Zozii zi Moyizi 'kʋ
1Ɩla gbʋ na, ‑kplɔkplɔbholiecɩnyɩ, anyɩa ‑ɔya ‑anyɩ 'wlalɩ 'lɛ lalɩɛa ‑ɩ 'wlʋlʋ 'lɛ ‑laagɔɔn na 'kʋ na, a kope Zozii 'ciin. Ɔmɔ ‑ɔ ‑glɩ 'lɛ Laagɔ 'la lobhulobhunyɔa* ɩya ‑teyiyinyɔ ‑kpasaa 'la pɔɔtɛtɛa ‑a ‑ka 'lɛ na. 2Zozii ya ɔmɔa ‑ɔ slɔɔ 'lɛ de na pala lebhe ɔ cɩɔ ‑delikʋtɛbhalɩ, saa Moyizi ‑kʋa 'lɛ Laagɔ 'la 'lɔlʋa sidiin 'nyɩ ɔ palɔɔ 'lɛ lebhe ɔ cɩɔ ‑delikʋtɛbhalɩ na. 3‑Ma Zozii 'la 'klʋagbaa a zi Moyizi 'naa 'kʋ, sa nclɔɔa ‑ɔ sla 'lɛ 'sle na, ɔmɔ ‑ɔ ‑ka 'lɛ 'ŋlɩ, 'nyɩ ‑ɔ zi 'lɛ 'slea 'titi 'kʋ. 4'Nyɩ nclɔɔ ‑ɔ sla 'lɛ 'sle, ‑ma Laagɔ ‑ɔ ‑glɩ 'lɛ ‑tɛtɛa 'fɩan 'la 'slanyɔ. 5Na, ɔla 'slibhuoa nɩkplaan, Moyizi ‑glɩa lobhocoa Laagɔ cɩa 'lɛ ‑delikʋtɛbhalɩ le ɔ 'kaa ɩmɩa ‑ɩ -cɩ kaa 'lɛ -nyɩtɛɔ na 'la ‑danʋfʋɛ li na. 6‑Ma Klisi ‑glɩ Laagɔ 'la 'cʋ, ɔ ya pala lebhe ɔ cɩɔ ‑delikʋtɛbhalɩ, 'slea ɔ zʋɔ 'kʋklʋʋn na, ala 'klʋlɩlɩɛa nɩkplaan. ‑Anyɩ ‑glɩ 'lɛ ɔla 'slea, ɩ ‑ka ‑kʋ le ‑a kɔɔ ‑delikʋtɛbhalɩ 'nyɩ ‑a ‑ka ɩla pɔlɛkʋtɛlɔa nɩkplaan kpolili na.
Pɔɔtɛtɛ -ɛ lamʋ 'lɛ nyɔkwɛ
7Ɩla gbʋ na, saa ‑Kplɔkplɔ ‑Wugoa* nyɩtɛ 'lɛ lebhe:
‑Yaka, a ‑ka Laagɔ 'la ‑blɩɩzɔn 'nu na,
8 a 'la tlibhalɩa 'nyukwli le 'bhlɛsʋa nɩkplaan a vʋvʋalɩa
‑amʋa 'lɛ na 'bhisa,
daa 'pʋpʋa nɩkplaan, a claan 'lɛ gbɩɩn,
9 'nyɩ a tokadɔcɩ vʋvʋalɩɩn 'lɛ 'nyɩ ma claan 'lɛ gbɩɩn na.
'Bhlɩmɔɔn, ma ya 'na nʋnʋgbɩa
10 liowli gwlɩ ‑mɔsɔ ‑gbaaglɩɩn 'ciin 'lɩ ‑ma.
Dɛ n 'manɩ 'lɛ 'dɛ 'la ‑zɔkpaa dɔgbɛ 'kʋ
'nyɩ n ya 'lɛ 'cla lebhe: Clɩɩa 'fɩan, mala pɔlɩa tlʋbhalɩɩn cɩ da.
Ma 'ta 'na ‑gugoa bhli.
11 Na, 'na dɔgbɛa nɩkplaan, n ya ta lebhe:
Maa cɩ 'ta kɩnɩ 'na nyɔkwɛa nɩkplaan ble.
12Bholiecɩnyɩ, a zʋlʋ pɔlɛ 'kʋ, ɩya anyɩ sidiin, bhlogbɩɩ 'la kalɩa pɔɔnyinye, ‑ɛ 'ta 'lɛ pɔɔtɛtɛ ‑ka, 'nyɩ ‑ɛ tlʋbhalɩ 'lɛ ‑Jajalaagɔa cɩ da na. 13‑Ma saa clɩɩ plɩ 'lɛ na, a zʋzʋlʋ 'tɛtɩɩn, daa ‑yaka plicio ka 'lɛ na, ɩya nyinyi 'la 'nyiglilia anyɩ sidiin 'la nclɔɔ bhlogbɩɩ ɩya ɔ 'la tlibhalɩa 'nyukwli. 14Sa, ‑a yanɩ Klisi 'la ‑plɔnya 'plɩ, ɩ ‑ka ‑kʋ le ‑a ‑ka ‑zaagbʋsa ‑ala daa ‑a 'nylugo 'lɛ bhɔdaa na, kpaan 'nylugo ‑aan 'nyɩ bhɩalɩclɩɩa ‑ka ŋeni na, 15saa Zieziewɔlɩa* bhli 'lɛ 'kʋ lebhe:
‑Yaka, a ‑ka Laagɔ 'la ‑blɩɩzɔn 'nu na,
a 'la tlibhalɩa 'nyukwli le 'bhlɛsʋa nɩkplaan a vʋvʋalɩ 'mɔɔ
'lɛ na 'bhisa.
16‑Ma ‑anʋasaa, ‑ɔ 'nuanɩa 'lɛ 'nyɩ ‑ɔ yɔɔ 'lɛ vʋvʋalɩ bha? Maa ‑tɛtɛa Moyizi ‑bɔɔ gba 'lɛ, 'nyɩ ‑ɔ 'wlʋ 'lɛ Ejibhitibhlɩa 'kʋ na, ‑n 'ta maa bha? 17'Nyɩ ‑anʋasaa Laagɔ 'manɩanɩa 'lɛ dɔgbɛa 'kʋ liowlia ‑gwlɩɩa ‑mɔsɔa ‑gbaaglɩɩn bha? Maa ‑ɔ nʋa 'lɛ nyinyia, 'nyɩ mala ‑blaanyɛkɛa 'kɔsɔlʋa 'lɛ 'pʋpʋa nɩkplaan sa na, ‑n 'ta maa bha? 18'Nyɩ ‑anʋasaa ɔ taanɩa 'lɛ ‑ndanyɩa lebhe maa cɩ 'ta ɔla nyɔkwɛa nɩkplaan ble bha? Maa ‑ɔ 'taa 'mɔɔ 'lɛ zʋ na, ‑n 'ta maa bha? 19Na, ‑a lɩnɩ lebhe ma 'ta blelɩɛ mino, ‑ofi lebhe ma 'ta pɔɔtɛtɛ 'lɩ.
Currently Selected:
Ebl 3: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.