Ebl 10
10
‑Teyiyimlaa ‑sa 'ta nclɔɔ nyinyi cɩ
1‑Jlɩmaa palalɩ 'nanɩa ‑ɩ ‑cɩ ka 'lɛ ci na, ɩla 'klipɛ, ‑ma ‑n 'ta ama ‑a 'ta 'lɛ 'nanɩa 'titi ‑glɩ, ‑masa aya ala 'kʋ 'la ‑teyiyimlaa bhlogbɩɩa ma va 'lɛ Laagɔ 'lʋkʋlʋkʋ lio nɩkplaan na, mino 'ta ɩya a 'ka maa ‑ɔ mɛ 'lɛ ‑sa Laagɔ cɩ na, 'la ‑kplɔlɩɛa 'kʋglalɩ. 2Ɩ 'taa sɛɛ ‑kʋ na, ma 'ta 'kanɩa ‑teyiyimlaa 'la 'bhlalɩɛa 'nylugolu bha? ‑Masa maa ‑ɔ nʋ 'dɛ 'la gʋgwlɛa na, ma yanɩa 'lɛ 'kplookʋ ‑kplɔ na, ma cɩ 'tanɩa nyinyi bhlogbɩɩ 'la wɔɔgugwie kalɩ. 3‑Ma, ka ‑teyiyimla ‑naa luoli 'lɛ maa mala nyinyia lio 'fɩan. 4‑Masa bhliiŋodiea ɩya 'bhɔɔnbhʋa 'la ‑dolua cɩ 'ta nyinyi 'dɛ ‑salɩɛ mino na.
5Dɛ, Klisi 'ka 'lɛ ‑laagɔzɔan ci na, ɔ ya 'lɛ 'cla lebhe:
‑Teyiyilɩɩa ɩya vavalɩɩa, ‑n 'tɩɩ wabha,
‑ma, ‑n yaan 'nyɛkɛ ma.
6 Mlaa ma sie 'lɛ ɩla ‑lɩɩbhuoa
ɩya nyinyivalɩɛ 'la ‑teyiyimlaa 'tɔɔ 'tʋ ‑pla.
7 Na, n ya 'cla lebhe:
'Oo Laagɔ, 'lɩkaan!
N ya ci le n 'ka ‑naa pɔɔsa nʋ,
sa 'na wɔlɩ ‑ɩ ‑zieo 'lɛ ‑afluwaa ‑a ‑gigelio 'lɛ na nɩkplaan.
8‑Bɛɛ, ɔ nabhe:
‑N 'ta ‑teyiyilɩɩ, vavalɩɩ, mlaa ma sie 'lɛ ɩla ‑lɩɩbhuoa
ɩya nyinyivalɩɛ 'la ‑teyiyimlaa wabha,
ɩ 'tɔɔ 'tʋ ‑pla.
'Bhlɩmɔɔn, ‑a cibhlili lebhe vavalɩɩ ‑naa, ‑jlɩmaa 'clalɩ 'lɛ.
9Ɔ ya ‑awlɛ 'cla lebhe: «'Lɩka, n ya ci le n 'ka ‑naa pɔɔsa nʋ.»
Ɔ ya ‑bɛka ‑gʋgwlɛa 'dɛ ‑sa 'nyɩ ɔ ya 'lɛ ‑mɔsɔ ‑naanɛa ɛla 'jeen zʋ. 10Na, Laagɔ 'la pɔɔsaa Zozi Klisi nʋ 'lɛ na, ɔla 'nyɛkɛa ɔ va 'lɛ Laagɔ 'kplookʋ, ‑bluu bhlogbɩɩ na, ɩmɩ nɩkpkaan ‑a 'lɩlɩ 'lɛ ‑kplɔlɩɛ.
11'Nyɩ daa ‑daa ‑teyiyinyaa ‑tɛtɛa 'nylugo 'lɛ clɩɩa 'fɩan, ma nʋ 'lɛ mala lobholia, 'nyɩ ma va 'lɛ Laagɔ ‑teyiyimlaa ‑ɩ mino 'ta 'lɛ nyinyi 'dɛ ‑salɩɛ na, 12ɔmɔ, daa ɔ ‑kaa 'lɛ ɔcɩ ‑sa 'nyɩ ɔ ‑kaa 'lɛ Laagɔ 'nyɩ ‑bluu bhlogbɩɩ, nyinyi 'la gbʋ na, Laagɔ 'lipasɔ 'kʋ ɔ ‑kʋnɩ 'lɛ sa, 13'nyɩ ɔ ‑bɛnɩ 'lɛ lebhe Laagɔ 'ka ɔla ‑zɔbhɛlɩgbanyaa ɔla kplia ‑zɔn zʋ. 14Na, ‑bluu bhlogbɩɩ 'titi ɔ valɩ 'lɛ ɔcɩ Laagɔ 'nyɩ ɩ ya 'lɛ maa ɔ ‑kplɔ 'lɛ na, 'la ‑kplɔlɩɛa 'kʋglalɩ 'kplookʋ. 15Ɩmɩ ‑naa 'la ‑danʋfʋɛ ‑Kplɔkplɔ ‑Wugoa* ‑ma li 'lɛ, daa ʋ 'cla 'lɛ lebhe:
16 ‑Kwlenyɔa nabhe:
Clɩɩ ‑naa 'la leen,
'lɩka mɛnʋa n ‑ya maasɔ cɩ kanɩ 'lɛ li na.
'Na ‑jlɩmaa, mala pɔlɩa ɩya mala wɔɔgugwiea nɩkplaan n cɩ 'kanɩa 'lɛ zie.
17 'N cɩ 'tanɩ mala nyinyia ɩya mala ‑ngasitʋlɩɛa luoli.
18'Nyɩ daa nyinyi ya 'lɛ valɩɛ 'lɩ na, ma 'matɩ vavalʋʋ nyinyi 'la gbʋ.
‑A mɛ Laagɔ cɩ
19Na, bholiecɩnyɩ, ‑a ‑kanɩ ‑delikʋtɛlɔ 'kadie le Zozii 'la ‑dolua 'la gbʋ na, ‑a cɩnɩ ‑kplɔkplɔdaa ble. 20Ɔ ya ‑anyɩ, ‑slalaa nɩkplaan, jabhʋ 'la ‑gugolele ‑sa, ɔla 'nyɛkɛa nɩkplaan. 21Na, ‑a ‑kanɩ ‑teyiyinyɔ 'kadie Laagɔ 'la ‑palʋa 'kʋklʋʋn. 22'Dɛndlana, ‑a mɛnɩ Laagɔ cɩ, ‑nʋawlɛpɔlɛ ɩya ‑delikʋtɛlɔ 'kadie nɩkplaan, ‑aya pɔlɛa ‑ɛ ya 'lɛ wɔɔgugwie ‑nyinyea ‑tɛtɛa cɩ ‑wɔlʋɔ na ɩya 'nyɛkɛa ‑kplɔkplɔnyu ya 'lɛ cɩ wɔlʋ na. 23‑A 'la cɔbhaa ‑ma ‑a nyɩtɛ ‑ala pɔlɛkʋtɛlɔa 'la wɔlɩa ‑owe -owe, sa ɔmɔa ‑ɔ ta 'lɛ ‑ndanyɩa na, ma cɩɔ ‑delikʋtɛbhalɩ na. 24‑A 'lɩlɩlɩ 'klʋ ɩya ‑a zʋzʋlʋ 'tɛtɩɩn ɩya ‑a ka walʋ ɩya nʋnʋgbɩ 'nanɩ kalɩ. 25‑A 'la tea ‑ala 'wluwlalɩkandia, saa ɩ ya 'lɛ ‑anʋa 'la nʋnʋgbɩ 'plɩ na, ‑ma ‑a zʋzʋlʋ 'tɛtɩɩn, daa a ‑jlɛnɩ 'lɛ clɩɩa 'nyɩ ɩ mɛ 'lɛ cɩ na.
26‑A yanɩ 'lɛ ‑nʋawlɛa cibhlili, 'nyɩ ‑a ‑kanɩ nyinyi nʋ ‑gblɩgblɩsa na, ‑buun -teyiyilʋʋ bhlogbɩɩ 'tanɩ ‑kʋ, ɩya ʋ 'kanɩ ‑anyɩ nyinyia cɩ ‑sa, 27‑ma 'tɩtɩa ɩya ‑kosu 'kadiea ‑ʋ ‑cɩ ka 'lɛ Laagɔ 'la gbatlɩmʋnʋnyaa ‑sie na, ɩla ‑bɛlɩɛa 'la ŋanɔa ‑tɛɛ 'nyɩ ‑ʋ bhla ‑anyɩ. 28Moyizi 'la ‑jlɩmaa ‑ylɔɔkpa nclɔɔ ‑kaa tʋ, 'nyɩ wɔlɩa ‑ka ‑danʋfʋɛcɩ ‑mɔsɔ, ‑aana ‑mɔta ‑ka, maa 'lɩɩ 'tɔɔ ŋaazɩɩn, 'nyɩ ma bhlɔɔ na. 29Na, ɔmɔa ‑ɔ 'ta 'lɛ Laagɔ 'la 'Cʋa bu, ‑ɔ 'ta 'lɛ mɛnʋa 'la ‑dolua nɩkplaan ɔ ‑kplɔlʋ 'lɛ na bu 'nyɩ ‑ɔ ya 'lɛ 'wugoa nɩkplaan Laagɔ 'la ‑dananɔa 'wlʋlʋ 'lɛ na vla na, gbaylɩsalɩɛa, ‑anɩsaa a gugua 'lɛ lebhe ɔ cɩ 'kaa 'lɩ bha? 30‑Masa, ‑a ‑cio, ɔmɔa ‑ɔ cla 'lɛ lebhe:
‑Amʋ, ‑ɔ ‑sa 'lɛ kpa,
‑amʋ ‑ɔ cɩ ka 'lɛ nclɔɔ nclɔɔ 'la dlua ‑plʋ!
Ɔmɔ ‑ɔ 'cla ‑awlɛ 'lɛ lebhe:
‑Kwlenyɔ cɩ 'ka ɔla 'lɔlʋa 'tɩtɩpla.
31'Nyɩ ɩ 'tɛ ɩ ‑nyɩɔ nclɔɔa ‑ɔ bhlili 'lɛ ‑Jajalaagɔa wlɩɩn na.
32A luoli ɩmɩa ‑ɩ 'plɩlɩa 'lɛ anyɩ 'kʋ bhɔdaa na. Zezezelia 'la 'lɩmlɩɩn, 'nyɩ takadie ya 'lɛ anyɩ ŋeni. 33A 'ta ‑jleen ‑kʋ, ma 'ka anyɩ sʋkpa ɩya ma 'ka anyɩ gbaylɩsa na, maa ma nʋ 'lɛ sɛɛ na, mala klalɩlɩɛ nɩkplaan a ‑kʋ 'lɛ. 34‑Masa aya ‑palʋʋnpapanya ya mala 'kwlɩbhɩɛa 'kʋ 'wlalɩ, 'nyɩ pɔlɛkʋmɛnɔ nɩkplaan, a ya ŋonu le ma ‑salɩ anyɩ ala 'nanɩa, sa ‑a ‑ci lebhe a ‑lio 'bhɛlɩa ‑ɩ nanɩ 'lɛ 'nyɩ ‑ɩ gwlɛlɩ na. 35Na, ala 'talɩa ala ‑delikʋtɛlɔa 'cin ɩya ʋ 'la mlɔa, sa ʋ cɩ 'ka anyɩ dluuplʋlɩɛ 'kadie ‑lalɩ. 36‑Masa, a 'ka Laagɔ 'la pɔɔsa nʋ, ɩya ‑ndanyɩa ɔ ta 'lɛ na, 'ka 'lɛ 'kʋglalɩ na, ɩ ‑fata lebhe a cibhlili pɔɔklasa.
37Sa, ‑ɔ ‑tonɩ ‑awlɛ clɩɩklipɛ, 'pɛpɛ 'titi,
ɩya ɔmɔa ‑ɔ ‑cɩ ka 'lɛ ci na, ɔ 'ka ci. Ɔ cɩ 'ta didleli.
38 'Na 'kʋnylugolunyɔa, ɔla pɔɔtɛtɛa ‑cɩ ka 'lɛ gba
ɩya ɔ 'ka jabhʋa 'lɩ,
‑ma ɔ ‑kaan kɔkʋʋn ‑tla na, ɔ 'tanɩ 'na 'wugoa 'tʋ ‑ka.
39'Nyɩ ‑anyɩ, ‑a 'ta ncɛlɩa ‑ɔ tla 'lɛ Laagɔ kɔkʋʋn le ‑ɔ ka mlɔ na ‑glɩ, ‑ma pɔɔtɛtɩnya ‑a ‑glɩ 'lɛ, le ‑a ‑ka gbʋʋnsalɩɛa 'lɩ.
Currently Selected:
Ebl 10: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
