Gal 6
6
1Bholiecɩnyɩ, gbazɩ ma ka nclɔɔ nyinyi nʋda 'lɩ na, anyɩa ‑ɔ ‑ka 'lɛ 'Wugoa na, anyɩ cɩ 'kɔɔ 'lɛ Laagɔ 'la ‑gugwiea 'kʋ zʋ pɔɔwɔtɛ nɩkplaan. ‑Ma a zʋlʋ acɩ pɔlɛ 'kʋ, sa a cɩ mino 'nyɩ anyɩ ‑masɛ a cɩ gbɩɩnclalɩɛɛn bhlili. 2Nclɔɔ nclɔɔ bhɛ ɔ 'yʋ 'la ‑gbaakʋ. A ‑ka sɛɛ nʋ na, Klisi 'la ‑jlɩmaa a 'plɩlɩ 'lɛ 'kʋ. 3Sa, gbazɩ nclɔɔ ‑ka ɔcɩ nclɔɔ la, ɔmɔa ‑ɔ 'ta 'lɛ lʋʋ ‑ylɛylɛ ‑glɩ na, ɔmɔ 'titi ɔcɩ ɔ 'nyiglili 'lɛ. 4‑Ma 'naa nclɔɔ nclɔɔ kope ɔmɔ 'titi ɔla nʋnʋgbɩa 'ciin 'nyɩ ka ɔ 'kɩɩ wɔlɩa gbʋa ɔ cɩ 'lɛ ɔcɩ 'ŋwleenfalɩ na, nɩkplaan 'lɩlɩ, ɔmɔ 'titi 'la 'sasʋʋn ɩ cɩ 'lɛ sɛɛ 'plɩ, ‑ma ‑n 'ta ‑buun nclɔɔ bhlo 'la 'sasʋʋn, 5sa nclɔɔ nclɔɔ ‑cɩ ka 'lɛ ɔmɔ 'titi ɔla ‑gbaakʋa bhɛ.
6'Naa ɔmɔa ma ca 'lɛ Wɔɔnyɩtʋa na, 'ma ɔla 'nanɩa 'fɩan nɩkplaan ɩya ɔ 'nyɩmʋ ɔmɔa ‑ɔ cɔɔ 'lɛ na. 7A 'la 'nyiglilia acɩ: Laagɔ 'talɩ 'ta ɔcɩ 'ciin ɩya ma 'kɔɔ nyanɩ, sa ɩmɩa nclɔɔ golo 'lɛ na, ɩmɩ ɔ cɩ 'ka 'lɛ ‑sa. 8Ɔmɔa ‑ɔ golo 'lɛ ɩmɩa ‑ɩ ‑ka 'lɛ ɔla 'nyɛkɛa 'tʋ na, ɔ cɩ 'ka ɩmɩa ‑ɩ 'wlʋlʋ 'lɛ 'nyɛkɛa nɩkplaan na, 'lɩ. Ɩmɩ ‑glɩ 'lɛ 'kwɩ. ‑Ma ɔmɔa ‑ɔ golo 'lɛ ɩmɩa ‑ɩ ‑ka 'lɛ 'Wugoa 'tʋ na, ɔ cɩ 'ka ɩmɩa ‑ɩ 'wlʋlʋ 'lɛ 'Wugoa nɩkplaan na, 'lɩ: Ɩmɩ ‑glɩ 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 9‑A nʋ 'nanɩ ɩya 'nyɛkɛ 'la 'kɔtɔa anyɩ, sa ɩla daa ‑ka ŋeni na, ‑a cɩ ka ‑sa. Na, ‑a ‑kla kpaan 10ɩya daa ‑a mino ka 'lɛ na, a nʋ ncɛlɩa 'fɩan 'nanɩ ɩya maa 'tasɩɩ ‑a ‑ya maasɔ 'wlalɩ 'lɛ pɔɔtɛtɛa 'kʋ na.
Bhɩalɩwɔlɩ ɩya ‑ayopalɩɛ
11A kopeka 'ylɩca 'kadɩ ‑naa: ‑Amʋ 'titii zie 'lɛ anyɩ. 12Ncɛlɩa ‑ɔ 'matɩ 'lɛ lebhe ma kope maa 'ciin 'nyɛkɛa 'la 'sasʋʋn na, maa ‑glɩ 'lɛ ncɛlɩa ‑ɔ cla 'lɛ lebhe ɩ ‑fata lebhe ma 'dɩ anyɩ 'kʋ 'saantiin na. Wɔlɩa bhlogbɩɩa ‑tɛɛa ma 'matɩ 'lɛ na, ɩmɩ ‑glɩ 'lɛ lebhe ma 'la ka Klisi 'la dabhlalɩsua 'la gbʋ gbaylɩsalɩɛ 'lɩ. 13Sa maa 'titia ‑ɔ gba 'lɛ 'nyɩ ma dɩ 'lɛ maa 'kʋ na, 'ma 'plɩlɩ 'ta ‑jlɩmaa 'kʋ. ‑Ma ka ma ‑wa 'lɛ lebhe, a 'dɩɔ 'kʋ ɩya ma 'ka ala 'nyɛkɛa nɩkplaan 'klʋagba 'lɩlɩ. 14‑Ɔ ‑glɩ 'lɛ ‑amʋ na, n 'matɩ 'ta 'pʋpʋkʋ 'klʋagba 'la ‑buun -naana bhlogbɩɩ ‑n 'ta le ‑ala ‑Kwlenyɔ Zozi Klisi 'la dabhlalɩsua 'naa na. Ʋla gbʋ na, ‑laagɔzɔan ya 'na da 'ku le saa ‑amʋ ‑ma n ya 'lɛ ‑laagɔzɔan 'la da 'ku na. 15Ɩmɩa ɩ ‑glɩ 'lɛ wɔlɩ 'titi na, ‑n 'ta le ma 'dɩ nclɔɔ 'kʋ ‑aana ma 'la 'dɩɔ 'kʋ, ‑ma ɔ 'plɩ ncaalelo. 16Maa ‑ɔ namʋnʋ 'lɛ ‑jlɩmaa ‑naa 'la 'sasʋʋn na, pupue ɩya ŋaazɩɩnlɩlɩɛ ŋeni maa 'kʋ ɩya Izlayɛlɩ*, Laagɔ 'la ncɛlɩa ‑ma.
17Na, ‑ɩ bhɔlʋnɩ 'lɛ ‑da na, nclɔɔ bhlogbɩɩ 'la ‑bhɩanɩɩn 'kwlɩ, sa ‑amʋ, 'kpafɩa ɩ ‑kʋʋn 'lɛ cɩ na, pala lebhe Zozi Klisi 'la nclɔɔ n ‑glɩ 'lɛ.
18Bholiecɩnyɩ, 'naa ‑ala ‑Kwlenyɔ Zozi Klisi 'la 'nyupalɩɛa kʋ anyɩa 'fɩan 'kʋ. Ɩ kʋ sɛɛ.
Currently Selected:
Gal 6: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
